ပ္ဍဲကဵုပရေၚ်ယာဉ်ဍာ်ပရဟ် ဗ္ကပ်လဝ် ပ္ဍဲၜဳချေန်တွောန်ဂှ် ကလေၚ်ဆဵုဂဗလဝ် ဇွဗ္ဒာဲ ၃၀ တၠ

မေန်ကေန်၊ သေပ်တေမ်ဗာ(၂၁)

ရးဒေသဇၞော်သေတ်ဂါၚ်၊ ပွိုၚ်ဍုၚ်မေန်ကေန်၊ ပ္ဍဲၜဳချေန်တွောန် မၞုံဗ္ဒာဲကွာန်ပါန်သေတ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၉) တ္ၚဲတုကၠုၚ်တေံ အခိၚ်နူဂယး ၜိုတ် (၉) နာဍဳဂှ် ယာဉ်ဍာ်ပရဟ် (ညးဒေသကော်)က္ၜၚ်ဖလာပ် ဗ္ကပ်စှ်ေလဝ်တုဲ ကလေၚ်ဂဗဆဵုလဝ် ဇွ ဗ္ဒာဲ ၃၀ တၠရဂှ် ဂွံတီကေတ်နူညးဒေသတအ်ရ။

ပၞောဝ်ကဵုက္ၜၚ်ကံၚ်ဇြဳပၞာန် ပ္ဍိုက်နၚ်လဝ် မၞိက်စၞာံဒုန် (ကျောက်စိမ်း)ကေုာံ ကပေါတ်နွံကဵုၚုဟ်မး နူလ္ပာ်ခန္တဳ (၁၃) ဖ္ဍိုက် မွဲဖ္ဍိုက်ဂှ်မ္ဂး ပ္ဍိုက်နၚ် ညးအာတရဴတအ် နူကဵုသၞေဟ်ပါန်သေတ်ကဵု သၞေဟ်ကွာန်တောၚ်ဖျူတုဲ ဃောတိတ်ကၠုၚ်ဂှ် ဒးဗ္ကပ်စှ်ေလဝ်ရ။

“က္ၜၚ်ဖလာပ်ဂှ် ပ္ဍိုက်နၚ်လဝ် ကွးဘာတိုန်တက္ကသိုလ် အကြာဗွိုၚ်ကွာန်ပါန်သေတ်ကဵု ဖလာပ်တအ်၊ ဂကောံအိန်ထံၚ်ပျူသဝ်ထဳတအ် သီုကဵုညးယိုက်ဝန် Non CDM တအ်တုဲ အခိၚ်ပလေဝ်ပလေတ်ဒၟံၚ် သွက်ဂွံဆက်တိတ်တရဴဂှ် ဟိုတ်နူထိၚ်လျိုၚ်ဟွံမာန် တေက်ဒးတၟံတုဲ ဒးဗကပ်လဝ် ဂွံမိၚ်လဝ်ရ။ ပြဟ်ဟ်ဏံ ကလေၚ်ဂွံလဝ် ဇွၜိုတ်ပိစှ်ောတၠရ”ဂှ် ညးဒေသမွဲတၠ ဟီုလဝ်ရ။

ပ္ဍဲကဵုယာဉ်ဍာ်ပရဟ် ဗ္ကပ်စှ်ေလဝ်ဂှ် သ္အာၚ်နူကောန်ဒပ်ကံၚ်ဇြဳပၞာန်တုဲ ကောန်အရာပ်ညးဍုၚ်ကွာန် ၁၀၀ ပြၚ်ပါလုပ်ဒၟံၚ်တုဲ ပ္ဍဲကဵုဂှ် ညးဒေသ ၅ တၠဂှ်မ္ဂး ၜိုန်ရကလေၚ်ဟံၚ်ဂွံလဝ် ဂျိုၚ်ၚ်ကီုလေဝ် ညးကၠေံဒၟံၚ် နွံဗွဲဂၠိုၚ်ဏီရဂှ် ဂွံတီကေတ် အတိုၚ်ညးဒေသတအ်ဟီုလဝ်ရ။

အခိၚ်လၟုဟ်ဏံ ဒပ်ကံၚ်ဇြဳပၞာန်ကဵု ဂကောံပျူသဝ်ထဳတအ် ကၠောန်သ္ပဒၟံၚ် ပရေၚ်ရီုဗၚ်ဟံၚ်ပြာ် ပ္ဍဲမွဲဗွိုၚ်ဒၞာဲက္ၜၚ်ဗ္ကပ်စှ်ေလဝ်ဂှ်တုဲ ပ္ဍဲကဵုကွာန် မၞုံဇိုၚ်ၚ်ကရပ်ဂှ်လေဝ် ကရောၚ်ပၞာန်ကံၚ်ဇြဳပၞာန်တအ် တြးလဝ်ဒပ်ရဂှ် ညးဒေသတအ်ဟီုလဝ်ရ။

ဟိုတ်နူက္ၜၚ်ဖလာပ်ဗ္ကပ်စှ်ေလဝ်တုဲ က္ၜၚ် (၁၂)ဖ္ဍိုက် ဒဳကၠုၚ်လဝ်မွဲစွံတအ်ဂှ်လေဝ် ဖျေံလဝ်ဒြၚ်တၟံ ဗ္ဒာဲကွာန်ပါန်သေတ်ရဂှ် ဂွံတီကေတ်ရ။

ကံၚ်ဇြဳပၞာန်ဂှ်မ္ဂး ဟိုတ်နူယာဉ်ဍာ်ပရဟ်မွဲဖ္ဍိုက် ဗၠိုက်စှ်ေအာ ပ္ဍဲၜဳချေန်တွောန်ဂှ်ရ ကၠောန်ဒၟံၚ်ပရေၚ်ရီုဗၚ်ဟံၚ်ပြာ်ရဂှ် လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၀)တ္ၚဲဏံ အခိၚ်နူဂယးဂှ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media