ပ္ဍဲဍုၚ်ကျာ်ဍုၚ်ကဵု ကြုၚ်ဒဵု လွဟ်ဇၞော်စှ်ေတုဲ ကောန်ၚာ် (၂) တၠ ဇီုကပိုက်ကလိဂွံဝပ်

ကြုၚ်ဒဵု၊ သေပ်တေမ်ဗာ (၂၁)

တွဵုရးကရေၚ် ပ္ဍဲဍုၚ်ကျာ်ဍုၚ်ကဵု ဍုၚ်ကြုၚ်ဒဵုဂှ် လွဟ်ဇၞော် နူကဵုဒပ်ကံၚ်ဇြဳပၞာန်တံ မပန်ပှော်လဝ်ဂှ် ဒတုံဗ္တိုဟ်ထ္ကးအာလဝ်တုဲ ကောန်ၚာ် (၂) တၠ ကလိဂွံလဝ်ဝပ်ရောၚ် ခရိုၚ်ဒူပလာယာ KNU လလောၚ်ပ္တိတ်လဝ် ပ္ဍဲဂိတုသေပ်တေမ်ဗာ (၂၀) တေံရ။

တုဲကၠုၚ်ပ္ဍဲဂိတုသေပ်တေမ်ဗာ (၁၆) တေံ ဒပ်သၟဝ်တဲကံၚ်ဇြဳပၞာန် မဖျေံလဝ်ဒပ် ပ္ဍဲဘာဗ္တောန်လိက် ကွာန် (တောင်ကြာအင်း) ၊ ပွိုၚ်ဍုၚ်ကြုၚ်ဒဵု ခရိုၚ်ဒူပလာယာ KNU ဂှ် ပန်ပှော်စုတ်လဝ် ပ္ဍဲကွာန်ညးဍုၚ်ကွာန်တံ မသ္ပဒတဴဒၟံၚ်တံ နကဵုလွဟ်ဇၞော် (၆၀ မမ) ဂှ်တုဲ ဒတုံဗ္တိုဟ်ထ္ကးအာလဝ် ပ္ဍဲကွာန်နံၚ်တလာရောၚ် ပါလုပ် ပ္ဍဲတၚ်လလောၚ်တြးဂှ်ရ။

ဟိုတ်နူလွဟ်ဇၞော်ကံၚ်ဇြဳပၞာန် ဒတုံဗ္တိုဟ်ထ္ကးအာလဝ် အပ္ဍဲကွာန်နံၚ်တလာဂှ်တုဲ မၞိဟ်တြုံအာယုက် ၁၅ သၞာံမွဲတၠ ကလိဂွံအာဝပ် ဒးအာကဝေက်မကမ် ပ္ဍဲကဵုကၞေၚ်ရ။

ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကဵုကွာန် မၞုံအပ္ဍဲပွိုၚ်ဍုၚ်ကြုၚ်ဒဵု KNU တံဂှ်ဝွံ ပန်ပှော်ဒၟံၚ် လွဟ်ဇၞော် ပ္ဍဲကဵုကွာန်ညးဍုၚ်ကွာန်တံ မမံၚ်တန်တဴဒၟံၚ်တံ ကြပ်အရိုဟ်တ္ၚဲ နွံဒၟံၚ်ဂှ်ရ ညးဍုၚ်ကွာန်ဒေသဂမၠိုၚ်ဝွံ ဒးဂွိၚ်ဂွါဲဖေက်လကိုတ်ဒၟံၚ်တုဲ မၞိဟ်ဒးဂြိပ်ဒဴဒၟံၚ်တံလေဝ် နွံဒၟံၚ်ရောၚ် ခရိုၚ်ဒူပလာယာ သ္ဂးရ။

ပ္ဍဲကဵုတ္ၚဲဂှ်ရ နူကဵုတမ်ဒပ် ခလရ (၅၆၁) သၟဝ်တဲ သ္ကိုပ်ဗျူဟာ ဒဝ်ဇြေန်နာၚ် စကခ (၁၃) ကံၚ်ဇြဳပၞာန် ဖျေံသ္ဇိုၚ်ဍုၚ်ကျာ်ဍုၚ်ဂှ် ပန်ပှော်လဝ် နကဵုလွဟ်ဇၞော် (၆၀) မမ ကြာန်န်ဂှ်ရ ဒတုံဗ္တိုဟ်ထ္ကးအာလဝ် ပ္ဍဲကဵုဗ္ဒါဲဒဒန်ဍုၚ်ကျာ်ဍုၚ်တုဲ သၟတ်ဗြဴအာယုက် (၁၅) သၞာံမွဲတၠ ဒၟံၚ်ဍုၚ်ကျာ်ဍုၚ် ကလိဂွံလဝ်ဝပ် ပ္ဍဲကဵုဂဒအ်ဗြာတ်လ္ပာ်ပုၚ်ရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။

နကဵုစၞောန် သ္ကိုပ်ဗျူဟာ ဒဝ်ဇြေန်နာၚ် နူကဵုဗျူဟာဖျေံသ္ဇိုၚ်ကျာ်ဍုၚ်၊ ပွိုၚ်ဍုၚ်ကအ်ကြိက် KNU ဂှ် ပန်ပှော်စုတ်လဝ် လွဟ်ဇၞော် အပ္ဍဲကဵုကွာန်ဒၞါဲညးဍုၚ်ကွာန်တံ မမံၚ်တန်တဴဒၟံၚ်ဂှ်ကီု၊ ဟိုတ်ဟွံမွဲမွဲသာ် ရပ်ဒက်ကော်ဏာ ညးဍုၚ်ကွာန်ဟွံမွဲကဵုဒုဟ်ဒဏ်တံတုဲ ဍဵုဍိုက်ပျဲပျာံဒၟံၚ်တံလေဝ် နွံလဝ်ရောၚ် KNU သ္ဂးလဝ်ရ။

အပ္ဍဲဂိတုအဝ်ဂါတ် တုဲကၠုၚ်တေံ နူကဵုဂကောံသ္ကိုပ်နဲဗျူဟာ−၂ ဒဝ်ဇြေန်နာၚ် သၟဝ်တဲ စကခ (၁၃) ဖျေံသ္ဇိုၚ်ဍုၚ်ကျာ်ဍုၚ်ဂှ် ဟိုတ်ဟွံမွဲမွဲသာ် ရပ်ဒက်ဍဵုဍိုက်ပျဲပျာံလဝ် ညးဍုၚ်ကွာန်ဒေသ (၂) တၠ မအာကၠုၚ်ဒၟံၚ် လ္တူဍုၚ်ကျာ်ဍုၚ်ဂှ်တုဲ ကလေၚ်ဗလးကဵုလဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

ပရိုၚ်−သြၚ်လောန်တိုၚ်(မ်)

ဗီု−KNU