ပ္ဍဲကျာ်ထဝ် ဒပ်ကံၚ်ဇြဳပၞာန် ဒးဒုၚ်ဗ္တိုက်တုဲ (၅) တၠ ဇီုကပိုက်ချိုတ်မာန်

ကျာ်ထဝ်၊ သေပ်တေမ်ဗာ (၂၁)

ဒပ်ကံၚ်ဇြဳပၞာန် ကၠုၚ်မၚ်တောပ်ဗ္တိုက်ဒၟံၚ် ပ္ဍဲသ္ကဲဂၠံၚ်ကွဳစက်လ္ဂုၚ်−မတ်မလီု၊ ကွာန်(ဒေါင်းတောင်) ၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်တံ ဒးဒုၚ်ဗ္တိုက်တုဲဂှ် ကောန်ဂကောံဒပ်ကံၚ်ဇြဳပၞာန် (၅) တၠ ဇီုကပိုက်ချိုတ်မာန်ရောၚ် ညးတာလျိုၚ် PDF ခရိုၚ်သဓီု ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဒပ်ကံၚ်ဇြဳပၞာန် ကၠုၚ်မၚ်တောပ်ဗ္တိုက်ဒၟံၚ် သွက်ရေၚ်ကွဳစက်ကံၚ်ဇြဳပၞာန်ဂှ် ပ္ဍဲဂိတုသေပ်တေမ်ဗာ (၁၉) အခိၚ်နူဂယး ၜိုတ် (၉) နာဍဳဂှ် ဂကောံဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ ဂွံပရိုၚ်တုဲ အာစိုပ်ဗ္တိုက်လဝ်ရ။

ဟိုတ်နူပရေၚ်ဗ္တိုက်ဂှ်တုဲ ပရေၚ်ပန်ပှော်ၜါလ္ပာ် ပွိုၚ် (၁၀) မိနေတ်ပြၚ် က္တဵုဒှ်လဝ်တုဲ လ္ပာ်ကံၚ်ဇြဳပၞာန်ဂှ် (၅) တၠ ဇီုကပိုက်ချိုတ်တုဲ နူကဵုလ္ပာ်ဂကောံဒပ်ပံၚ်ကောံ KNLA တံ ဇီုကပိုက်ဒးဟွံမွဲတုဲ ဆုတ်ကလေၚ်မာန်လဝ်ရောၚ် သ္ဂးရ။

ကြဴနူပရေၚ်ပန်ပှော်ၜါလ္ပာ်တုဲဂှ် နူကဵုဒပ်ကံၚ်ဇြဳပၞာန်ဂှ် ဆက်ပန်ပှော်လဝ် နကဵုလွဟ်ဇၞော်၊ လွဟ်ဍောတ်တံ ကြာန်န်ဂှ် ဂွံတီကေတ် အတိုၚ်ဂလာန် ကောန်ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံရ။

ပ္ဍဲကဵုပွိုၚ်ဍုၚ်ကျာ်ထဝ် ပရေၚ်ပၞာန်ၜါလ္ပာ် မကြံၚ်မ္ၚိုဟ်ဒၟံၚ်ဂှ် အပ္ဍဲဂိတုဏံ ဒပ်ကံၚ်ဇြဳပၞာန်ဝွံ ဗပေၚ်ဇြဟတ်ပရေၚ်ဂီုကၠီုကီု၊ ပ္ဍဲကဵုဒၞါဲဂၠံၚ်ကွဳစက် မတ်မလီု−လ္ဂုၚ်ဂှ် မၚ်တောပ်ဗ္တိုက်ဒၟံၚ်တံ နွံဒၟံၚ်ရ။

သ္အာၚ်နူဂှ်ပၠန် အပ္ဍဲဂိတုသေပ်တေမ်ဗာ (၁) စဵုကဵုဂိတုသေပ်တေမ်ဗာ (၁၄) ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တံဂှ်တုဲ ညးဒေသ ဗၞတ် (၂၀၀၀) နူကဵုကွာန်ပန်ကွာန် ပါလုပ်သီုကဵု ကွာန်ဇြဳကုန်၊ ငှါတ်ပျဝ်တဝ် ပွိုၚ်ဍုၚ်ကျာ်ထဝ်ဂှ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် အတိုၚ်တၚ်လလောၚ်တြး ခရိုၚ်သဓီု KNU ရ။

ပရိုၚ်−သြၚ်လောန်တိုၚ်(မ်)

ဗီု−Social Media