ပ္ဍဲဒပ်ကံၚ်ဇြဳပၞာန် အပ္ဍဲဂိတုဏံ ရဲဂြိပ်နူဒပ်ပၞာန် ဂၠိုၚ်ကၠုၚ်

မတ်မလီု၊ သေပ်တေမ်ဗာ (၂၁)

ပ္ဍဲကဵုဒပ်ကံၚ်ဇြဳပၞာန်သီအဝဵု စိုတ်ဓာတ်စှ်ေကၠုၚ်ဒၟံၚ် သီုကရောံဇြဟတ်ဒပ်လေၚ်ဒိုက်တံဂှ် အပ္ဍဲဂိတုသေပ်တေမ်ဗာဏံ ရဲဂြိပ်တိတ်နူပၞာန်တံ ဂၠိုၚ်ကၠုၚ်ရောၚ် ဂွံတီကေတ် ဇရေၚ်ညးမစုက်လုက်ကဵု ဒပ်ကံၚ်ဇြဳပၞာန်တံရ။

ကောန်ဒပ်ကံၚ်ဇြဳပၞာန်တံဝွံ ဂြိပ်တိတ်နူကဵုအပ္ဍဲပေါဲဗ္တိုက်ကီု၊ လုပ်စိုပ်ဖျေံလွဟ် ဇရေၚ်ဂကောံဇြဟတ်ပၠန်ဂတးတံကီု၊ ထ္ၜးဟိုတ်နာနာသာ်တုဲ ဂြိပ်တိတ်နူဒပ်တံဂှ် နွံကၠုၚ်လဝ်ရ။

အတိုၚ်သြၚ်လောန်တိုၚ်(မ်) ဂၠိုက်ဂၠါဲစၟဳတ်ဂွံဂှ်မ္ဂး ကောန်ဂကောံဒပ်ကံၚ်ဇြဳပၞာန်တံဝွံ ဟိုတ်နူသၞာဲဒဴမၞုံကဵုကဆံၚ် ဒပ်ပၞာန်တံ ဍဵုဍိုက်ကီု၊ စေဝ်ပၞောန်အပ္ဍဲဒပ် သာတေၚ်ဂြတ်ကၠုၚ်ကီု၊ ပရေၚ်စသုၚ်မံၚ်စံၚ်ဂြောဝ်ဂတာတံ ခက်ခုဲကၠုၚ်ကီု၊ စိုတ်မိက်ဂွံဆက်ကၠောန် ဟွံမွဲကီုတံဂှ်တုဲ ဂြိပ်တိတ်တံ ဂၠိုၚ်ကၠုၚ်ဂှ် ဂွံတီကေတ်ရ။

လၟိဟ်ရဲဂြိပ်တိတ်နူဒပ် အပ္ဍဲဂိတုဏံဂှ် ဟွံဂွံတီကေတ် ချိုတ်တ်ပၠိုတ်တ်ကီုလေဝ် အတိုၚ်ညးမစုက်လုက်ကဵု ကံၚ်ဇြဳပၞာန်တံဂှ်မ္ဂး ပ္ဍဲကဵုဒပ်မွဲဒပ်ဂှ် အောန်အိုတ် မၞိဟ်ဂြိပ်တိတ်နူဒပ်ပၞာန် မွဲဟွံက နွံဒၟံၚ်တုဲ အခိၚ်ယိုက်ဂၠေၚ်ဒၟံၚ်တာလျိုၚ် ကောန်ဂကောံဟွံဂွံအဆက်တံလေဝ် နွံကၠုၚ်ရောၚ် သ္ဂးရ။

ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU မဒှ်ဂကောံရပ်လွဟ်ကောန်ဍုၚ်အရၚ်ဝှ်ကြံၚ်ဂှ် ဂြိပ်တိတ်ကၠုၚ် ဇရေၚ် KNU တုဲ ကောန်ဂကောံဒပ်ကံၚ်ဇြဳပၞာန် လုပ်စိုပ်ဖျေံလွဟ်တံဂှ် နွံဒၟံၚ်ဟွံပိုတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“နူကဵုလ္ပာ်ကံၚ်ဇြဳပၞာန်တံဂှ် ကောန်ပၞာန်တံ ဂြိပ်တိတ်ကၠုၚ်ကီု၊ လုပ်ဖျေံလွဟ်တံကီုဂှ် နွံဒၟံၚ်စုၚ်ဒၟံၚ်ဟဂှ်ရ။ ညအ်ဂှ်တှ်ေ လၟိဟ်တံဏံဂှ် ဟွံပိုတ်သ္ကုတ်နွံဒၟံၚ်ရောၚ် ဟီုဂွံရ။ ဆ္ဂး ပိုယ်တံဒးကၠိုဟ်မွဲဂှ် ဖျေံလွဟ်သာ်ဏံတုဲ ရဲဂြိပ်လုပ်ကၠုၚ်တံလေဝ်နွံတုဲ၊ လွဟ်ပါကဵုဒှ် ဟွံပါကဵုဒှ် လ္ၚဵုတံဂှ် ဟွံဂြိပ်မွဲသာ် နွံဒၟံၚ်အပ္ဍဲတေံတုဲ ဒစှ်ေဒစးအဝဵုတုဲ ကောန်ပၞာန်ပတုဲဒၟံၚ်ဖိုဟ် ကုပရေၚ်ပၠန်ဂတးဏံ မွဲနဲမွဲဗီုတံ နွံဒၟံၚ်ကီုဂှ် ပိုယ်တံဒးကၠိုဟ်ကေတ်လဝ်ရ။ ဗီုလဵုဒှ်ဒှ် အဓိကဂှ်တှ်ေ သွက်ဂွံဒတူလိုၚ် လ္ပာ်ညးဍုၚ်ကွာန်ပိုယ်တံရဏောၚ်။ ဒတူလိုၚ်လ္ပာ်ညးဍုၚ်ကွာန်ပိုယ်တံဟီုမ္ဂး ဒၞါဲလဵုမံၚ်ၚ် ဒှ်ဒၟံၚ်အထံက်အရီု ကုပရေၚ်ပၠန်ဂတးဟီုဂှ် ပိုယ်တံလေဝ် မိက်ဂွံကဵုတီရ။ ဟိုတ်ဂှ်ရ သာ်လဵုဒှ်ဒှ် ပ္ဍဲကဵုဒၞါဲဗ္တိုက်ပလီု သၞောတ်တၠအဝဵုပၞာန် နကဵုနဲကဲနာနာသာ်တံဂှ် ဗွဲတၟေၚ် ကောန်ဒပ်စကစတံလေဝ် နကဵုလွဟ်လက်နက်ဂမၠိုၚ် ကၠုၚ်စိုပ်ဇရေၚ်ပိုယ်တုဲ ပံၚ်တောဲဏောၚ်ဟီုမ္ဂး ညအ်ဂှ် ခိုဟ်အိုတ်ရဟီုကီုလေဝ် နဲကဲဏံမွဲဓဝ်သၟးလေဝ် ဟွံသေၚ်ပုဟ်။ နကဵုဂၠံၚ်ဍာန်တၞဟ်ဟ်တံလေဝ် ကၠောန်မာန်ဂှ် နွံတၟာဂလိုၚ်ရ။ အကာဲအရာပိုယ်တံ ကၠောန်မာန်တံဂှ်လေဝ် ပိုယ်တံ ဆက်တုဲကဵုအာဇြဟတ်ဏောၚ် “ သာ်ဝွံ ပဒိုဝ်သဝ်တဝ်နဳ ဟီုရ။

ပ္ဍဲကဵုဒပ်မဟာ (၆) ဗော်သွးကောန်ဂကူကရေၚ် KNU မွဲသၟးဂှ် ပ္ဍဲဂိတုသေပ်တေမ်ဗာ (၄) ၊ (၆) ကေုာံ (၈) တံဂှ် ကောန်ဂကောံဒပ်ကံၚ်ဇြဳပၞာန် (၄) တၠ လုပ်စိုပ်ကၠုၚ် သီုကဵုလွဟ်လက်နက်တံရောၚ်ဂှ် လလောၚ်ပ္တိတ်လဝ်ရ။

ကောန်ဂကောံဒပ်ကံၚ်ဇြဳပၞာန် (၄) တၠ ကၠုၚ်စိုပ်ပံၚ်တောဲ ဇရေၚ်ဒပ်ပၞာန်ဗၠးၜးကောန်ဂကူကရေၚ် KNLA တံဂှ်ဝွံ ရံၚ်ကဵုအာယုက်မ္ဂး အကြာ ၂၀ ကဵု ၃၃ သၞာံမၞုံတံတုဲ ဟိုတ်နူဟွံဒးဂၞပ် ကုသၞောတ်ပရေၚ်အုပ်ဓုပ်ဍဵုဍိုက် ဒပ်ကံၚ်ဇြဳပၞာန်တံဂှ်တုဲ လုပ်စ္ၜုဲစ္ၜော်ဇရေၚ်ညးဍုၚ်ကွာန်တံတုဲ ဒဵုကဵုသၞောတ်တၠအဝဵုပၞာန် သုန်ဂြာံအာဂှ် ပံၚ်တောဲပါလုပ်အာကဵု ကရောံသၟာပၠန်ဂတးရပ်လွဟ်ကောန်ဍုၚ်အရၚ်တံရောၚ်ဂှ် လလောၚ်ပ္တိတ်လဝ်ရ။

KNU ဝွံလေဝ် ကောန်ပၞာန် နူကဵုဒပ်သၟဝ်တဲကံၚ်ဇြဳပၞာန်လဵုဟွံဟီု ထောံလသာဒပ်တုဲ ကၠုၚ်စိုပ်ပံၚ်တောဲ ဇရေၚ်ညးဍုၚ်ကွာန်တံ သီုကဵုလွဟ်လက်နက်မကမ်တံဂှ် ဒုၚ်တၠုၚ်ဒၟံၚ် ဗွဲမဂီုကၠီုတုဲ သွက်ဂွံဆက်ဒတူလိုၚ်ဂတတေံဂှ်လေဝ် ရီုဗၚ်ထံက်ပၚ်ကဵုအာဏောၚ်ဂှ် ဟီုဂးလဝ်ရ။

အလုံမွဲကၟိန်ဍုၚ်ဂှ် အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံပြၚ်ဏံ ဒပ်ကံၚ်ဇြဳပၞာန်ကဵု ကောန်ဒပ်ဗၠာဲသၟိၚ် ၁၄၀၀၀ ပြၚ် လုပ်စိုပ်စ္ၜုဲစ္ၜော်လဝ် ဇရေၚ်ညးဍုၚ်ကွာန်တံရောၚ် ပ္ဍဲဂိတုသေပ်တေမ်ဗာ (၇) တုဲကၠုၚ်တေံ အလဵုအသဳညဳသၟဟ်ဂကူ NUG လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNU