သွက်ဂွံဆဵုဂဗကဵု က္ဍိုပ်သ္ကိုပ်ကိုဝ်ရဳယျာသၟဝ်ကျာဂှ် ပံက်လဝ်ဂၠံၚ်ရောၚ် သ္ကိုပ်ဝန်ဇၞော်ဂျပါန် ဟီု

တိုဝ်ကျိုဝ်၊ သေပ်တေမ်ဗာ ၂၁

ဟိုတ်နူအစဳဇန်လွဟ်လက်နက် ကိုဝ်ရဳယျာသၟဝ်ကျာတုဲ အခိၚ်ပရေၚ်ဆက်ဆောံၜါဍုၚ် ကြံၚ်မ္ၚိုဟ်ဒၟံၚ်ဂှ် သွက်ဂွံဆဵုဂဗကဵု က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အောန် ဆန္ဒမၞုံဂှ် သ္ကိုပ်ဝန်ဇၞော်ဂျပါန် ဖူနဳယိုဝ်ကဳယှဳဒါ သ္ပဒတန်ဟီုဂးလဝ် ပ္ဍဲကဵုဂိတုသေပ်တေမ်ဗာ ၂၀ တေံရ။

သ္ကိုပ်ဝန်ဇၞော်ကဳယှဳတာဝွံ ကြဴနူဟီုဂး ဒဒှ်ရဆန္ဒမၞုံ သွက်ဂွံကၠောန်သ္ပကောံဓရီုကဆံၚ်သၠုၚ် ကုကိုဝ်ရဳယျာသၟဝ်ကျာဂှ်တုဲ လအ်ဂွံမွဲအံၚ် ပ္ဍဲကဵုကောံဓရီုကုလသမဂ္ဂဂှ် ထပ်ဟီုဂးကၠုၚ်လဝ် တၚ်ကော်ဘိက်ဏံပၠန်ရ။

ကဳယှဳတာ အခိၚ်ဟီုမြော်ဒၟံၚ်ဂလာန် ပ္ဍဲကဵုကောံဓရီုကုလသမဂ္ဂဂှ် ဒဒှ်ရဆန္ဒမၞုံ သွက်ဂွံသောၚ်ကလးပြသၞာ ကုကိုဝ်ရဳယျာသၟဝ်ကျာဂှ်ကီု ပါလုပ်သီုကဵုလၟေၚ်ဒဒှ် အလဵုအသဳပျုၚ်ယာန် တံၚ်ရပ်မၞိဟ် ကောန်အရာပ်ဂျပါန်တံတုဲ သွက်ဂွံပ္ကတ်ပ္ကေၚ် ကုရဲကဵုပရိုၚ်ညးတံ ကၠာတေံဂှ်လေဝ် ထပ်ဟီုဂးစုတ်လဝ်ကီုရ။

“ ရံၚ်အာနူကဵုမတ် ပံက်အာခေတ်တၟိအနာဂတ်တေံ မွဲကရောံမွဲစွံဂှ်မ္ဂး အကာဲအရာလဵုဒှ်ဒှ် အခိၚ်အခါဟွံရုဲ သန္နိဌာန်အဲ မိက်ဂွံဆဵုဂဗဆေၚ်မုက် ကုသမ္မတကေန်ဂျုၚ်အောန်ဂှ် မိက်ဂွံပံက်ထ္ၜးတဴရ” သာ်ဝွံ ကဳယှဳတာ သ္ဂးလဝ်ရ။

သွက်ဂွံကၠောန်သ္ပ ပေါဲသဳကၠဳကဆံၚ်လ္တူဏံ ပြဟ်ဟ်မာန် ပေါဲသဳကၠဳတံဏံဂှ် မိက်ဂွံကၠောန် သၟဝ်ကောပ်ကာဲညးတိုက်ရိုက်ရောၚ်ဂှ် ကဳယှဳတာ ဟီုဂးလဝ်ရ။

တုဲကၠုၚ် သၞာံ ၂၀၀၂ သ္ကိုပ်ဝန်ဇၞော်ဍုၚ်ဂျပါန်တြေံ ဂျူနဳချဳရိုဝ် ကိုဝ်အဳသူမဳဝွံ အာစိုပ်ဂေတ်ဝေၚ် ပျုၚ်ယာန်တုဲ ဆဵုဂဗလဝ်ကဵု ကေန်ဂျုၚ်အဳ မအံက်ကေန်လၟုဟ်ဂှ်တုဲဂှ် ဖျေံစၟတ်လဝ် ဂၠံၚ်တရဴပရေၚ်ဆက်ဆောံ ဍုၚ်ဂျပါန် ကဵုအရီုဗၚ်ပရေၚ်ပိုန်ဒြပ် လၟေၚ်ၚ်တံဂှ်ရ။

ကြဴနူလၟေၚ်တရဴဏံတုဲ ကောန်ဍုၚ်ဂျပါန် (၅) တၠ ကလေၚ်ဗၠးကၠုၚ်လဝ်တုဲ လၟေၚ်တရဴကိုဝ်အဳသူမဳ ဗွဲကြဴဂမၠိုၚ် ပ္ဍဲကဵုကြပ်ပ်က္တဵုဒှ်ပၠန်တံဂှ် ပရေၚ်ကလုတ်တမာန် လီုလာ်အာလဝ်ရ။

လ္တူပရေၚ်ဒးဒုၚ်ရပ်တံၚ်တံဂှ် ကိုဝ်ရဳယျာသၟဝ်ကျာ ကၠုၚ်စိုပ်သောၚ်ကဵုမာန်ဟွံသေၚ်ပုဟ်ဂးတုဲ လ္ပာ်အလဵုအသဳဂျပါန် ဟိုတ်နူတၚ်ဂွိၚ်ဂွါဲသာ်ဏံတံတုဲ လၟေၚ်တရဴဂှ် လီုအာလဝ်ရ။

ကိုဝ်ရဳယျာသၟဝ်ကျာဝွံ နူကဵုသၞာံ ၂၀၀၆ တေံရ ကၠောန်သ္ပလဝ် ပရေၚ်စမ်ၜတ်နျူကလဳယျာတံဂှ်တုဲ သ္ကဵုဒှ်လဝ် စဵုကဵုကဆံၚ် ဆေၚ်မုက်ဒိဓဗတ်တံဂှ်ရ။

သ္အာၚ်နူဂှ်ပၠန် ကိုဝ်ရဳယျာသၟဝ်ကျာဝွံ ဟိုတ်နူကၠောန်ဒၟံၚ် ပရေၚ်စမ်ၜတ်ကမ်လှောဝ်တံ အဆက်က်ဂှ်ရ အပ္ဍဲဂိတုဟွံလအ်ကၠုၚ်တံဏံဂှ်လေဝ် ပရေၚ်ဆက်ဆောံၜါဍုၚ် ပရေၚ်ကြံၚ်မ္ၚိုဟ်တံ က္တဵုဒှ်လဝ်ရ။

ပ္ဍဲကဵုလက်ထက်သမ္မတဂျဵုဗိုၚ်ဒေန်ဂှ်လေဝ် သွက်ဂွံကၠောန်သ္ပပရေၚ်ဆဵုဂဗအမေရိကာန် လအာတုပ်ဂှ် ကော်ဘိက်လဝ်ကီုလေဝ် ကိုဝ်ရဳယျာသၟဝ်ကျာ စိုတ်လုပ်စအောန်ကၠုၚ်လဝ် မဒှ်ရ။

သမ္မတတြေံ ဒဝ်နေဝ်ထြာပ်ဂှ် ပရေၚ်လုပ်တရပ် ကုကေန် လ္ဂောံကဵုပရေၚ်ပူဂဵု ဓမ္မတာဟွံသေၚ်တံ နွံလဝ်တုဲ ဆဵုဂဗလဝ် စဵုကဵုပိဝါတုဲ သီုကဵုကေၚ်ဟီုဂးကၠုၚ်လဝ် ဂလာန်ထိုၚ်သး ကုကေန်ဂျုၚ်အောန်ဂှ်ရောၚ် မဒှ်ရ။

Ref: AFP/ DIjitaljournal