ပံၚ်၊ သေပ်တေမ်ဗာ (၂၂)
တွဵုရးဍုၚ်မန်၊ ပွိုၚ်ဍုၚ်ပံၚ်၊ လ္တူဂၠံၚ်ဆက်စၠောံ ခရိုၚ်ပံၚ် – သဓီု မၞုံဗ္ဒာဲကွာန်အုမ်တပေန်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၀) အခိၚ်ဗ္တံ ၜိုတ် (၁၀) နာဍဳဂှ် ညးထံၚ်ကဵုပရိုၚ်ပၞာန်မွဲတၠ ဒးဒုၚ်ပန်လဝ် နကဵုလွဟ်သေနာတ်တုဲ ဒးချိုတ်လဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဥူဝေန်ဇြဝ်(ကော်) ဂျက်ကအ် အယုက် ၅၃ သၞာံ ညးကဵုပရိုၚ် ဂကောံဂီုကၠီုပရေၚ်ပၞာန် (စရဖ) နူမုတ္တမ ဒဳစဴကၠုၚ်ကွဳစက် ကွာန်အုမ်တပေန် ညးမွဲဓဝ်ဂှ် သၟာရပ်လွဟ်ဟွံတီယၟုတအ် မၚ်ဒၟံၚ်ဒတုဲတုဲ ပန်ပှော်လဝ် နကဵုလွဟ်သေနာတ်ရ။
ဟိုတ်နူဒးဒုၚ်ပန်လဝ်ကဵုလွဟ်တုဲ ဥူဝေန်ဇြဝ်(ကော်) ဂျက်ကအ်ဂှ် ဒးလဝ်ဘဲဝပ်မကမ် ဖံက်လုပ်ဂွံ ပ္ဍဲက္ဍိုပ် ၂ လစုတ်တုဲ ဒၞာဲဒှ်ပရေၚ်ပရောဂှ်ဟေၚ် ဒးချိုတ်လဝ်လွာဲဂှ်ရ။
အတိုၚ်ညးဒေသပံၚ်တအ် ဟီုလဝ်မ္ဂး ဥူဝေန်ဇြဝ် (ကော်) ဂျက်ကအ် ဒးချိုတ်လဝ်ဂှ် ဟိုတ်နူဗက်ကံက်ကဵုဒၟံၚ်သြန် သွက်ဒပ်ဗၠာဲသၟိၚ်ကံၚ်ဇြဳပၞာန် ပ္ဍဲဒေသဂှ်ကီု၊ ဟိုတ်နူဆက်ဆောံဒၟံၚ် လ္တူညးဍုၚ်ကွာန်တအ် ရိုၚ်ဇိုၚ်ရုန်မဵုဒၟံၚ်တုဲ ယၟုပရေံ ဒယှ်တှ်ဒၟံၚ်ရ။
ကြဴနူဥူဝေန်ဇြဝ် (ကော်) ဂျက်ကအ် ညးထံၚ်ကဵုပရိုၚ်ပၞာန် ဒးဒုၚ်ပန်ဂစိုတ်လဝ်တုဲဂှ် ဒပ်ကံၚ်ဇြဳပၞာန်တအ် စိုပ်ကၠုၚ်တုဲ ဇွဂှ် ပ္ဍိုက်ကေတ်ဏာလဝ် ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်ပံၚ်ရဂှ် ဂွံတီကေတ် အတိုၚ်ညးဒေသတအ်ဟီုရ။
ပ္ဍဲဂိတုသေပ်တေမ်ဗာ စၟတ်တ္ၚဲ ၃ တေံလေဝ် လ္တူဂၠံၚ်ကွဳစက် လဂုၚ် – မတ်မလီု အရာပ်မိုဝ်နိုၚ် ဍုၚ်ပံၚ်ဂှ် ဗၠာဲသၟိၚ်ထိၚ်ရးကိုဝ်ကိုဝ်လွေန်ဂှ် ဟိုတ်နူဒးဒုၚ်ပန်လဝ်ကဵု လွဟ်သေနာတ်တုဲ ဒးချိုတ်လဝ်ရ။
ပွိုၚ်ဍုၚ်ပံၚ်ဂှ် ပ္ဍဲကဵုဂိတုဏံ ဟိုတ်နူကောန်ဒပ်ဗၠာဲသၟိၚ်ကံၚ်ဇြဳပၞာန်တအ်ကီု သီုညးကဵုပရိုၚ်တအ် ဒးဒုၚ်ပန်ဂစိုတ်ဒၟံၚ် မွဲခနမွဲခနတုဲ ဒပ်ကံၚ်ဇြဳပၞာန် ထ္ပက်လုပ်ပၞာန် ပ္ဍဲကွာန်ဥတ္တတာကဵု ကွာန်ယေန်ညုၚ်တုဲ ရပ်ကေတ်ဒၟံၚ်ညးဒေသတအ် အဆက်က်ရ ကၠောန်သ္ပဒၟံၚ်။
ပရိုၚ် – သြၚ်လောန်တိုၚ်(မ်)
ဗီုရုပ် – PAN
sanlontai