ကအ်သံၚ်၊ သေပ်တေမ်ဗာ (၂၂)
ဟိုတ်နူပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲကွာန်မလိဝါန်၊ ပွိုၚ်ဍုၚ်ကအ်သံၚ်၊ ရးဒေသဇၞော်တၞၚ်သဳဂှ်တုဲ ညးဒေသဂၠိုၚ်ကဵုကၠံ ဒးဂြိပ်ဒဴပါဲဒလေတ်လဝ် လ္ပာ်ဍုၚ်သေံရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုသေပ်တေမ်ဗာ (၂၀) တေံ နူကဵုဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန် အပ္ဍဲကွာန်မလိဝါန်ဂှ်ရ အကြာဂကောံဒပ်ပံၚ်ကောံစဵုဒၞါဒေသတံဂှ် ပေါဲဗ္တိုက်ၜါလ္ပာ် က္တဵုဒှ်လဝ်ရ။
ဟိုတ်နူပေါဲဗ္တိုက်ဂှ်တုဲ ညးဒေသ နူကဵုကွာန်မလိဝါန် ဗ္ဒါဲ (၅၀) ဒးဂြိပ်တိတ်အာလဝ် လ္ပာ်သေံ နကဵုဂၠုၚ်စက် လွာဲဂှ် မဒှ်ရ။
ဒပ်ကံၚ်ဇြဳပၞာန် မဒးဂိအာလဝ် အပ္ဍဲပေါဲဗ္တိုက်ၜါလ္ပာ်ဂှ်ဝွံ ထပ်ဗပေၚ်ဇြဟတ်တုဲ ဟိုတ်နူထ္ပက်ကၠုၚ်ကရောၚ်ပၞာန် အပ္ဍဲကွာန်ခမံက်ကျဳဂှ်ရ ညးဒေသ (၂၀၀) ပြၚ်ဝွံ ထပ်ဒးဂြိပ်ဒဴဒၟံၚ် လ္ပာ်သေံပၠန်ရ။
ညးဍုၚ်ကွာန်ဒေသ ဂြိပ်တိတ်အာ လ္ပာ်ဍုၚ်သေံတံဂှ် သၟိၚ်တၠအဝဵုသေံတံ ကၠောန်ကဵုလဝ် ပရေၚ်ရီုဗၚ်မၚ်မွဲယာယဳတံရောၚ် ဂွံတီကေတ်ရ။
ပ္ဍဲပေါဲဗ္တိုက်ကအ်သံၚ်ဂှ် လ္ပာ်ကံၚ်ဇြဳပၞာန် (၃) တၠဟွံအောန် ဇီုကပိုက်ချိုတ်လဝ်တုဲ လ္ပာ်ဂကောံဒပ်စဵုဒၞါဒေသတံ ဇီုကပိုက်ကလိဂွံဝပ်ဟွံမွဲပုဟ်ဂှ် ဂွံတီကေတ် အတိုၚ်တၚ်လလောၚ်တြး ဂကောံဒပ်ဇြဟတ်ပၠန်ဂတးတံရ။
ညးဒေသ နူကဵုကွာန်မလိဝါန် ကေုာံ ကွာန်ခမံက်ကျဳ ပွိုၚ်ဍုၚ်ကအ်သံၚ် မၞုံပ္ဍဲပယျဵု သေံ−ဗၟာဂှ်ဝွံ ဟိုတ်နူပေါဲဗ္တိုက် ဂကောံဒပ်စဵုဒၞါဒေသ ဒပ်ကံၚ်ဇြဳပၞာန်တံဂှ်တုဲ မွဲဏှမွဲဏှဟီုဂွံ ဒးဂြိပ်ဒဴပါဲဒလေတ်ဒၟံၚ် လ္ပာ်ဍုၚ်သေံရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai