အပ္ဍဲပရေၚ်ပန်ပှော်ၜဳကလေၚ်ဂှ် ကောန်အရာပ် (၂) တၠ ဒးမကမ်ကလိဂွံဝပ်

ၜဳကလေၚ်၊ သေပ်တေမ်ဗာ (၂၂)

အပ္ဍဲပရေၚ်ပန်ပှော် မက္တဵုဒှ်လဝ် ဗ္ဒါဲကွာန်(ဒေါက်ရပ်) ကေုာံ ကွာန်အဠူလေဝ် ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ညးဍုၚ်ကွာန်ကောန်အရာပ် (၂) တၠ ဒးမကမ်ကလိဂွံလဝ်ဝပ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ပ္ဍဲဂိတုသေပ်တေမ်ဗာ (၂၁) အခိၚ်နူဂယး ၜိုတ် (၁၀) နာဍဳဂှ် နူကဵုဂကောံဒပ်ပံၚ်ကောံ PDF, ဒပ်ပၞာန်ဗၠးၜးကောန်ဂကူကရေၚ် KNLA တံ ကၠဟ်လဝ်မခတိုဟ် (၆) မ နကဵုဒရုၚ် ကုဒပ်ကံၚ်ဇြဳပၞာန် မမၚ်တောပ်ဗ္တိုက်ဒၟံၚ် ဗ္ဒါဲကွာန်အဠူလေဝ်ဂှ်တုဲ ဗ္တိုက်လဝ်ရ။

မွဲအဆက်ဓဝ် ပ္ဍဲကဵုတ္ၚဲဂှ် လဒေါဝ်တ္ၚဲ ၜိုတ် (၁၂) နာဍဳဂှ်လေဝ် ဂကောံဒပ်ပံၚ်ကောံ KNLA တံ အာစိုပ်ဗ္တိုက်လဝ် သၞေဟ်ကၚ်စၟဳတ်ကံၚ်ဇြဳပၞာန် မၞုံဗ္ဒါဲသၞေဟ်ကံက်အခေါန်လုပ်ဍုၚ်တြေံ၊ ကွာန်(ဒေါက်ရပ်) နကဵုလွဟ်ဇၞော်လွဟ်ဍောတ်တံရ။

ဟိုတ်နူပရေၚ်ဗ္တိုက်ဂှ်တုဲ ပရေၚ်ပန်ပှော်ဗ္တိုက်ၜါလ္ပာ် က္တဵုဒှ်လဝ် ဗ္ဒါဲမွဲနာဍဳပြၚ်တုဲ ကွဳစက်အာတရဴတံ ဒးလဝ်မကမ် ကေုာံ ညးဍုၚ်ကွာန်အာတရဴတံ ဇီုကပိုက်ကလိဂွံလဝ်ဝပ်တံ နွံလဝ်ရ။

အပ္ဍဲပရေၚ်ပန်ပှော်ၜါလ္ပာ်ဂှ် ညးတြုံအာတရဴ (၂) တၠဝွံ ဟိုတ်နူကလိဂွံလဝ်ဝပ်ဒးမကမ်ဂှ်ရ ပလံၚ်ဗစိုပ်ကဵုလဝ် ဇရေၚ်ရုၚ်ဂဥုဲညးဍုၚ်ကွာန်ပွိုၚ်ဍုၚ်ၜဳကလေၚ်ရ။

ဟိုတ်နူပရေၚ်ပန်ပှော်ဂှ်တုဲ ဂၠံၚ်ကွဳစက် လ္ဂုၚ်−မတ်မလီု ကၟာတ်ဆိုအ်အာ လအ်ကဵုနာဍဳ က္တဵုဒှ်လဝ်တုဲ ကွဳစက်အာတရဴလ္ၚဵုတံဂှ် ကလေၚ်ဂတးကၠုၚ်က္ဍိုပ်တံ နွံဒၟံၚ်ဂှ် ဂွံတီကေတ် အတိုၚ်ဂလာန်ညးအာတရဴတံရ။

လ္တူလၟေၚ်ဒဒှ်ပရေၚ်ပန်ပှော် ၜဳကလေၚ်ဂှ် မ္ၚးနူဂကောံဒပ်ပံၚ်ကောံ ဂကောံဇြဟတ်ပၠန်ဂတးတံဂှ် လ္ပာ်ကံၚ်ဇြဳပၞာန်တံလေဝ် လလောၚ်ပ္တိတ်လဝ် မွဲမွဲသာ် ဟွံမွဲဏီရ။

ပရိုၚ်−သြၚ်လောန်တိုၚ်(မ်)

ဗီု−SBM