မတ်မလီု၊ သေပ်တေမ်ဗာ (၂၂)
ၚုဟ်စၞောန်သြောံသ္ဇိုၚ် ကံၚ်ဇြဳပၞာန် မခုတ်လဝ်ဂှ်ဝွံ ပ္ဍဲအရာကၠောန်ပ္တိတ်တဵုလွဳသြောံတံဂှ် ဟိုတ်နူခရိတ်အိုတ်ဂၠိုၚ်ဒၟံၚ်ဂှ်ရ ဒှ်ၚုဟ် အရာထေက်ကဵုဒှ်တံ ဟွံသေၚ်တုဲ ညံၚ်ညးတဵုလွဳတံ ဂွံကျ ကၠောန်ဒၟံၚ်ရောၚ် သၟာဗ္ၚတံ ပါ်ပါဲဒၟံၚ်ရ။
ဂအုပ်ဂကောံသြောံသ္ၚုဍုၚ်ဗၟာဂှ် ပ္ဍဲအခိၚ်သြောံကသီုသၞာံဏံ ၚုဟ်စၞောန်သြောံသ္ဇိုၚ် မ္ဒးရာန်တံဂှ် လလောၚ်ပ္တိတ်ကၠုၚ် နကဵုစၟတ်တ္ၚဲ ဂိတုသေပ်တေမ်ဗာ (၁၉) တေံရ။
ပ္ဍဲအရာခုတ် ၚုဟ်စၞောန်သြောံသ္ဇိုၚ်တံဂှ် ဂကူသ္ၚုကြံၚ် (ဧည့်မထ) ကဵု ဂကူသ္ၚု (ငစိန်) (၁၀၀) နဂှ် နူကဵု (၁၃) ကိုဋ် စဵုကဵု (၁၅) ကိုဋ်၊ သ္ၚု(ပေါ်ဆန်) ဨရာဝတဳဂှ် နူကဵု (၁၆) ကိုဋ် စဵုကဵု (၁၈) ကိုဋ်၊ သ္ၚုယှိုဲဗိုဝ် (ပေါ်ဆန်) နူကဵု (၁၈) ကိုဋ် စဵုကဵု (၂၀) ကိုဋ် သွက်ဂွံရာန်ဂှ် ခုတ်လဝ်ၚုဟ်ရ။
သွက်ဂွံခုတ်ၚုဟ်စၞောန်သြောံသ္ဇိုၚ်မာန် နကဵုတၚ်စၞောန်ကံၚ်ဇြဳပၞာန်တံဂှ် ညံၚ်ၚုဟ်ဖျာ ဂွံညိၚ်ဝတ် ဂကောံမဆက်စပ်ကဵု သြောံသ္ၚုတံ ပ္ညဳပ္ညပ်သဳကၠဳတုဲ ဒးပ္တန်လဝ်ၚုဟ် မဒးရးတံရောၚ်ဂှ် ဂအုပ်ဂကောံသြောံသ္ၚုဍုၚ်ဗၟာ သ္ဂးရ။
သၟာဗ္ၚတဵုသြောံမွဲတၠဂှ် ပ္ဍဲအရာတဵုလွဳသြောံတံဂှ် ဟိုတ်နူခရိတ်အိုတ်ဂၠိုၚ်ဒၟံၚ်ကွေံကွေံဂှ်ရ ဒၟါနူၚုဟ်စၞောန် မခုတ်လဝ်လၟုဟ်ဂှ်တုဲ သာ်လဵုမှတၟော်ဟွံကိတ်တုဲ ဒှ်ဒၟံၚ်အကာဲအရာ ကျဒၟံၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပိုယ်တံ ဂွံဂွံ (၁၀၀) နဂှ် ဒးတဵု (၂) ဨကဏောၚ်။ (၂) ဨကဂှ် ဒးသုၚ်စောဲ ရဲဗ္တံမ (၂၄) တၠဏောၚ်။ မပလုမ်ဂှ်တှ်ေ (၂) ဨကဂှ် ဒးကေတ် (၄) နဏောၚ်။ မပလုမ်ဂှ် မွဲန (၃၀၀၀၀) ။ ၚုဟ်ပိုက်မဂှ် (၁၀၀) တှ်ေ (၈၀၀၀) ။ ရဲဗ္တံမ (၂) ဨက နကဵုနှေန် (၁၀၀၀၀) ဂှ် (၂၄) တၠ။ ပ္ဍဲကဵုဏံ သုၚ်စောဲကၠေၚ်တိမ္ဂး (၂) ဨကဏံဂှ် ဝါဲဂကူလဵုဒှ်ဒှ် ဖန်ရပ်စပ်မ္ဂး (၃) ရိုက်တှ်ေ (၃) ကိုဋ်ဂှ် အိုတ်အာယျ။ ၚုဟ်ဇိက်ထဲဂှ် (၂) ဨကတှ်ေ (၆၀၀၀၀) ဒးယျ။ ၚုဟ်ရတ်ဂှ် မွဲဨကတှ်ေ ၜိုတ် (၅၀၀၀၀) ဒးကဵုဏောၚ်။ ၚုဟ်လိုန်သြောံဂှ်လေဝ် ဟိုတ်နူၚုဟ်ကၠေၚ်တိုန်အာတုဲ သၞာံဏံဂှ် ကဵုနာဍဳတှ်ေ သာတုဲကေတ်ဂၠိုၚ်ဏောၚ်။ အိုတ်ဂၠိုၚ်နူ သၞာံတုဲတေံဏီဏောၚ်။ ရပ်စပ်ထောံ ခရိတ်အိုတ်တံဏံဖအိုတ်တုဲ သွက်ရဲဗ္ၚပိုယ်တံဂှ် မဂွံဗ္တံရဂှ် ဟွံသှ်ေဒၟံၚ်တုဲ သာ်လဵုပတုဲ ဂွံကၠောန်ဒၟံၚ်ဨကဖအိုတ်ဂှ်ဏီရော။ ကဵုၚုဟ်တမ်ဗီုဏံဂှ် ခုတ်ထောံၚုဟ်သာ်ဏံဏောၚ်ဟီုတှ်ေ ရဲဗ္ၚပိုယ်တံဂှ် ကဵုၚုဟ်လၟုဟ်ဏံတှ်ေ ဒးဟီုသောၚ်ၚ်မ္ဂး သ္ၚုကြံၚ်ၚ် (ဧည့်မထ) ဏံရဂှ် ၜိုတ် (၂၀) ဟွံဂွံတှ်ေ ပိုယ်တံ ဗီုလဵုမှတၟော်ဟွံကိတ်ပုဟ်“ သာ်ဝွံ သ္ဂးရ။
သ္အာၚ်နူဂှ်ပၠန် ၚုဟ်ခရိတ်တၞဟ်ဟ် ပါလုပ်သီုကဵုၚုဟ်ကပေါတ်တမ်တံ ဂွံစှ်ေအာဂှ် ဟွံကၠောန်ကဵုမွဲသာ် တၠကမၠောန် နူကဵုဂကောံသြောံသ္ၚုတံ ခုတ်ဒၟံၚ်ၚုဟ်သြောံတံ အတိုၚ်ၚုဟ်ညးတံနွံပၟိက်ဂှ်ဝွံ ဒှ်ဟွံထေက်ပုဟ်ဂှ် ညးဆက်ဟီုရ။
ဂအုပ်ဂကောံသြောံသ္ၚုဍုၚ်ဗၟာဂှ် ခုတ်ထောံၚုဟ်စၞောန်သာ်ဏံဂှ်ဝွံ လ္တူပရေၚ်ကၠောန်ပ္တိတ် တဵုလွဳတံဂှ် ညံၚ်သၟာဗ္ၚတံ သ္ဂောံဂွံပရဲ မထေက်ကဵုဂွံတံဂှ်ကီု၊ သွက်ညးဗုတ်တြးကၠောန်ပ္တိတ်သွံရာန်တံ ဂွံဂွံပရဲပရာ မထေက်ကဵုဂွံတံဂှ်ကဵု သွက်ညးစသုၚ်တံ ဂွိုအ်ဒးဇြိုၚ်တံရောၚ် သ္ဂးလဝ်ရ။
သၟာဗ္ၚတဵုလွဳဒၟံၚ်သြောံမွဲတၠဂှ်လေဝ် သ္ၚု (ဧည့်မထ) အခိၚ်ဂွံဒၟံၚ်ၚုဟ် ၜိုတ် (၂၀) ကိုဋ်ပြၚ်ဂှ် ကဵုသွံရာန်ဒၟံၚ် အကြာ (၁၃) ကိုဋ်ကဵု (၁၅) ကိုဋ်ဂှ်ရ ဍဵုဍိုက်ဒၟံၚ် သၟာဗ္ၚတံရောၚ်ဂှ် ဟီုရ။
“ၚုဟ်သြောံဂှ် (ဧည့်မထ) တှ်ေ ၚုဟ်ဂွံဒၟံၚ်လၟုဟ်ဂှ် ၜိုတ် (၂၀) ကိုဋ်နွံရ။ ဆ္ဂး ဍေံတံ ခုတ်ထောံ အကြာ (၁၃) ကိုဋ်ကဵု (၁၅) ကိုဋ်ဟီုတှ်ေ ရဲဗ္ၚတံဂှ် အခက်အခုဲနွံအာရ။ ဍေံတံ ခုတ်ထောံသာ်ဏံမ္ဂး ၚုဟ်တၞဟ်ဟ်တံရော သ္ဂောံခုတ်နွံဟာ။ ဥပမာ ဝါဲဓာတ်ဂှ် နူကဵုမူစိ စိုပ်ၜိုတ်လဵုဂှ် သွံဟွံဂွံ သာ်ဏံတံရ။ ဗီုဏံဟွံမွဲမွဲသာ် ခုတ်ထောံ ၚုဟ်သြောံမွဲဓဝ်ရတှ်ေ ၚုဟ်တဵုလွဳပိုယ်တံဂှ် ဂၠိုၚ်အာဏောၚ်။ ၚုဟ်ဝါဲဓာတ် ၚုဟ်တမ်တံဂှ် က္ဍၚ်။ ၚုဟ်ကောန်ကလောန်ဂှ်လေဝ် က္ဍၚ်။ တုဲပၠန် ကောန်ကလောန်ဂှ်လေဝ် ဂၠါဲဝါတ်ဒၟံၚ်ဏောၚ်။ အခိၚ်ကျာတ်ကၠုၚ်သာ်ဏံဂှ် ကောန်ကလောန်တံဂှ်လေဝ် ကဵုၚုဟ်က္ဍၚ်ၚ်တုဲ ဒးလိၚ်ဒၟံၚ်ရ။ သွာၚ်သှ်ေဒၟံၚ်တံဂှ် မုမှဟွံထိၚ်ပုဟ်။ ဗ္ၜတ်ဂွံညဳ ဟွံပ္ညဳကဵုပုဟ်ဟီုမ္ဂး ဒးရံၚ်နကဵုသၟာဗ္ၚမွဲတှ်ေ ဒှ်အာသဘဴ ဍဵုဍိုက်ဒၟံၚ် သၟာဗ္ၚတံရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ဂကောံသြောံသ္ၚု မခုတ်ဒၟံၚ်ၚုဟ်စၞောန်သြောံလၟုဟ်တံဂှ်ဝွံ ဒှ်ဂကောံ မဒက်လဝ် နကဵုတၠကမၠောန်ဂမၠိုၚ်တုဲ ဟွံသၟာန်စ အကာဲအရာသၟာဗ္ၚဗလးတိဏံမွဲသာ် ခုတ်ထောံၚုဟ်ဂှ်ရ ညံၚ်သၟာဗ္ၚတံ ဂွံကျ ကၠောန်ဒၟံၚ်ရောၚ်ဂှ် ညးပါ်ပါဲလဝ်ရ။
ၚုဟ်စၞောန်သြောံသ္ဇိုၚ် မခုတ်လဝ်ဂှ်ဝွံ ဟိုတ်နူဟွံကိတ်ညဳဂှ်ရ ပ္ဍဲကဵုရာသဳကၠောန်သြောံကၠုၚ်စိုပ်ဏံ ဒးဂဗကၠုၚ် အကာဲအရာ ဒးဖအောန်ဖျေံသြောံတံတုဲ ၜိုတ်သ္ဂောံစ ဟွံဒေါအ်ဟွံဂွံတံဂှ်ရ တဵုလွဳကၠုၚ်မ္ဂး သြောံသ္ၚုအောန်ကၠုၚ်တံလေဝ် က္တဵုဒှ်ကၠုၚ်မာန်ရောၚ် သၟာဗ္ၚတံ သ္ဂးအိုတ်ရ။
ဂအုပ်ဂကောံသြောံသ္ၚုဍုၚ်ဗၟာဂှ် လ္တူနူကဵုၚုဟ်ညးတံ မခုတ်လဝ်ဂှ် ကဵုၚုဟ်ဂၠိုၚ်ၚ်တုဲ ရာန်ကေတ်မ္ဂး သွက်ဂွံထ္မံက်ပ္တိတ် ပ္တိုန်ထ္ၜးဂှ်ကဵု ပရေၚ်သွံရာန်သြောံသ္ၚုတံဂှ်လေဝ် သွက်ဂွံရာန်အာ အတိုၚ်လၟေၚ်ကမၠောန်တံအိုတ်ဂးတုဲ လလောၚ်ပ္တိတ်လဝ်ဏီရ။
ပ္ဍဲတွဵုရးဍုၚ်မန် တိဨက တဵုလွဳသြောံကသီုဂှ် ဗ္ဒါဲ (၇) ကိုဋ်ပြၚ် နွံဒၟံၚ်တုဲ လၟေၚ်သၞာံ သြောံ (၄) ကိုဋ်နပြၚ် တိတ်ဒၟံၚ်ရ။ သြောံမတိတ်ကၠုၚ်တံဂှ် ဗုတ်တြးတုဲ ပလံၚ်ပ္တိုန်သွံကဵုဒၟံၚ် ပ္ဍဲရးဒေသ ကေုာံ တွဵုရးလ္ၚဵုတံရ။
ဆ္ဂး သၟာဗ္ၚတဵုလွဳသြောံတံဂမၠိုၚ်ဝွံ ဟိုတ်နူပရေၚ်ဒပ်ပၞာန်သီအဝဵုတုဲ ၚုဟ်မးသြန်ဍုၚ်ဗၟာ စှ်ေကၠုၚ်ဂှ်ကီု၊ ၚုဟ်ကပေါတ်တမ် သၠုၚ်တိုန်ဒၟံၚ် ဂၠိုၚ်ကဵုဆဂှ်ရ ဒးဒုၚ်စသိုၚ်ဒၟံၚ် ညံၚ်ရဴကမၠောန်တၞဟ်ဟ်တံ ဇၞော်ကဵုဇြဟတ်ကီုရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai