ပ္ဍဲတွဵုရးဍုၚ်မန် ပ္ဍဲကဵုပွိုၚ်ၜါသတ္တာဟ ညးဒေသ ဗ္ဒာဲ (၄၀)တၠ ဒးဒုၚ်ရပ်လဝ်

မတ်မလီု၊ သေပ်တေမ်ဗာ (၂၃)

ပ္ဍဲတွဵုရးဍုၚ်မန် ပ္ဍဲကဵုပွိုၚ်ၜါသတ္တာဟတုဲကၠုၚ်တေံ ဟိုတ်နူကံၚ်ဇြဳပၞာန် ထ္ၜးဟိုတ်နာနာသာ် ရပ်ကေတ်ဏာလဝ်တုဲ ကောန်အရာပ် ညးဍုၚ်ကွာန် ဗ္ဒာဲ (၄၀)တၠ ဒးဒုၚ်ရပ်လဝ်ရဂှ် ဂွံတီကေတ် အတိုၚ်တၚ်ညးဒေသတအ်ဟီုရ။

အတိုၚ်တၚ်ဂၞၚ်သြၚ်လောန်တိုၚ်(မ်) ပကောံပကေဝ်ဂွံလဝ်မ္ဂး နူကဵုဂိတုသေပ်တေမ်ဗာ စၟတ်တ္ၚဲ (၇)စဵုကဵု စၟတ်တ္ၚဲ (၂၁) ပ္ဍဲပွိုၚ်ၜါသတ္တာဟဏံ ညးဒေသ နူပွိုၚ်ဍုၚ်ပံၚ် (၂၀)တၠ၊ နူပွိုၚ်ဍုၚ်ကျာ်ထဝ် (၁၀)တၠ၊ နူပွိုၚ်ဍုၚ်သဓီု (၅)တၠ၊ နူပွိုၚ်ဍုၚ်ဇြပ်ဗု (၃)တၠ အပံၚ်ဖအိုတ် (၃၈)တၠ ဒးဒုၚ်ရပ်လဝ်ရ။

ပရေၚ်ရပ်စပ်လဝ် ပ္ဍဲပွိုၚ်ဍုၚ်ပံၚ်ကဵု ပွိုၚ်ဍုၚ်ကျာ်ထဝ်ဂှ်မ္ဂး ကြဴဴနူကောန်ဒပ်ကံၚ်ဇြဳပၞာန် ကေုာံဒလာန် ညးကဵုပရိုၚ်တအ် ဒးဒုၚ်ပြိုက်ဂစိုတ်လဝ်တုဲ ရပ်ကေတ်ဏာလဝ် ညးဒေသတအ် နကဵုတၚ်ထ္ၜးဟိုတ် ဆေၚ်ဆက်ဒၟံၚ်ကဵု ဒပ်စဵုဒၞာညးဍုၚ်ကွာန် PDF တအ်နွံရ။

သ္အာၚ်နူဂှ်ပၠန် ပ္ဍဲကဵုပရေၚ်ရပ်စပ်လဝ် ပ္ဍဲပွိုၚ်ဍုၚ်သဓီုကဵု ပွိုၚ်ဍုၚ်ဇြပ်ဗုဂှ်မ္ဂး နကဵုဂဗုတ် ကလေၚ်ပါ်တြးပရိုၚ် ပရောပရာစပ်ကဵု အလဵုအသဳညဳသၟဟ်ကောန်ဂကူ NUG ကေုာံ PDF တအ် ပ္ဍဲကဵုမုက်လိက်ဇာနှိက်ပရေၚ်မၞိဟ်ကီု၊ ချူစုတ်လဝ်တၚ်သမ္တီကီုရ ရပ်ကေတ်ဏာလဝ်။

ညးဒေသဒးဒုၚ်ရပ်လဝ် ဗွဲမဂၠိုၚ်တအ်ဂှ် သ္အာၚ်နူသၞောဝ်ဥပဒေဗတိုက်သရိုဟ် ပွပ္ကီုပရာပ်တုဲ ကံၚ်ဇြဳပၞာန်ရပ်ပံက်လဝ်ဂဗုတ် နကဵုသၞောဝ်ဥပဒေ ရာဇသာတ်ဇၞော် ၝောံပိုဒ် ၅၀၅ (က) ပ္ဍဲကဵုဗဒိုပ်ဗၠာဲသၟိၚ်မဆေၚ်စပ်တအ်ရ။

ညးဒေသ ဒးဒုၚ်ရပ်လဝ်လ္ၚဵုတအ်ဂှ်မ္ဂး ပလံၚ်ဗစိုပ်လဝ် ဇရေၚ်ဒၞာဲပရေၚ်စၟဳစၟတ်တုဲ ညးအဆက်ပိုတ်ဒၟံၚ်ကဵု ဂကောံသ္ၚိကၟိန်အိန်ထံၚ်ညးတအ် ပေၚ်ၚ်လေဝ် နွံဒၟံၚ်ရဂှ် ညးဒေသတအ် ဟီုလဝ်ရ။

တွဵုရးဍုၚ်မန်ဂှ် ပ္ဍဲမွဲကာလဒပ်ပၞာန်သီအဝဵု ပွိုၚ်ၜါသၞာံကဝက်ပြၚ်ဏံ ကောန်အရာပ်ညးဍုၚ်ကွာန် ဒးဒုၚ်ရပ်လဝ် (၈၁၈) တၠရဂှ် ဂကောံမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် (AAPP) လလောင်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၁)တေံရ။

ပရိုၚ် – သြၚ်လောန်တိုၚ်(မ်)

ဗီုရုပ် – ချာန်နေဝ်တြးဝါဒ