ရုၚ်တြေံ ဌာန်ဂအုပ်ခရိုၚ်သဓီု KNU ဂှ် ကံၚ်ဇြဳပၞာန် ဂြာတ်လဝ်မခတိုဟ် နကဵုက္ၜၚ်ကျာ

သဓီု၊ သေပ်တေမ်ဗာ (၂၃)

ကံၚ်ဇြဳပၞာန် ကၠုၚ်စိုပ်ဂြာတ်ဏာလဝ်မခတိုဟ် နကဵုက္ၜၚ်ကျာဗ္တိုက် ကုဒၞါဲရုၚ်တြေံ ဌာန်ဂအုပ်ဒပ်မဟာ (၁) ဗော်သွးကောန်ဂကူကရေၚ် KNU မၞုံဗ္ဒါဲကွာန်ပယျေတ်ခိုဝ်၊ ပယျဵုပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီု၊ တွဵုရးဍုၚ်မန်ဂှ်ရောၚ် ညးတာလျိုၚ် ခရိုၚ်သဓီု KNU တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

က္ၜၚ်ကျာဗ္တိုက်ကံၚ်ဇြဳပၞာန်မွဲဖ္ဍိုက်ဝွံ တ္ၚဲဏံ ပ္ဍဲဂိတုသေပ်တေမ်ဗာ (၂၂) အခိၚ်လဒေါဝ်တ္ၚဲ ၜိုတ် (၁၂) နာဍဳဂှ် ဂြာတ်ဖျေံလဝ်မခတိုဟ် (၂) မ ဒၞါဲရုၚ်တြေံ ဌာန်ဂအုပ်ခရိုၚ်သဓီု KNU တုဲ ဗ္တိုက်ဏာလဝ်ရ။

ဟိုတ်နူဒးဒုၚ်ဂြာတ်လဝ်မခတိုဟ် နကဵုက္ၜၚ်ကျာဂှ်ရ စမြိုၚ်လ္ၚဵု ဇီုကပိုက်လီုလာ်အာတုဲ ဟိုတ်နူမၞိဟ်မံၚ်ဟွံမွဲရဂှ်တုဲ ဇီုကပိုက်ကလိဂွံဝပ်ဟွံမွဲပုဟ်ဂှ် ညးတာလျိုၚ် ခရိုၚ်သဓီု KNU မွဲတၠ ဟီုရ။

ဟိုတ်နူပရေၚ်ဗ္တိုက်ထောံမခတိုဟ် ကံၚ်ဇြဳပၞာန် နကဵုက္ၜၚ်ကျာဂှ်တုဲ ညးဒေသပယျေတ်ခိုဝ်ဂမၠိုၚ်ဝွံ ဂွိၚ်ဂွါဲဖေက်လကိုတ် က္တဵုဒှ်လဝ်တုဲ ညးဍုၚ်ကွာန်လ္ၚဵုတံဂှ် ပြံၚ်မံၚ်လဝ် ဒၞါဲစမြိုၚ်ခိုၚ်ကၠိုက်က်တံကဵု ပ္ဍဲဥမၚ်တံ နွံဒၟံၚ်ဂှ် ဂွံတီကေတ်ရ။

ကံၚ်ဇြဳပၞာန်ဝွံ တုဲကၠုၚ် ပ္ဍဲဂိတုအဝ်ဂါတ် (၂၄) တေံလေဝ် ကၠုၚ်စိုပ်ဂြာတ်လဝ်မခတိုဟ် ကုရုၚ်တြေံ ဌာန်ဂအုပ်ခရိုၚ်သဓီု KNU ဂှ် နကဵုက္ၜၚ်ကျာ (၂) ဖ္ဍိုက်ဂှ်ရ စမြိုၚ်လ္ၚဵု ဇီုကပိုက်လီုလာ်တံ က္တဵုဒှ်လဝ်ရ။

ဒပ်မဟာ (၁) ဒပ်ပၞာန်ဗၠးၜးကောန်ဂကူကရေၚ် KNLA သၟဝ်တဲခရိုၚ်သဓီု KNU ဝွံ အပ္ဍဲကာလသီအဝဵုဏံ ဒှ်ဒပ်မဟာ KNU ပံၚ်တောဲကဵု ဂကောံဇြဟတ်ပၠန်ဂတးတံတုဲ ဗ္တိုက်ဒၟံၚ် ဒပ်ကံၚ်ဇြဳပၞာန်မွဲရ။

ပရိုၚ်−သြၚ်လောန်တိုၚ်(မ်)

ဗီု−KNU