ဍာ်ဗု၊ သေပ်တေမ်ဗာ(၂၃)
ရးဒေသဇၞော်တၞုၚ်သြဳ၊ ပွိုၚ်ဍုၚ်ဍာ်ဗု၊ ပ္ဍဲလ္ပာ်ဒေသသၞေဟ်ဍာ်ဒမျိုဟ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ညးဒေသ နူကွာန် (၅)ကွာန်ဂမၠိုၚ် ဒးဂြိပ်ဒဴပါဓလေတ်ဒၟံၚ်ရဂှ် ဂွံတီကေတ် နူဒပ်စဵုဒၞာဒေသတအ်ရ။
ဒပ်ကံၚ်ဇြဳပၞာန် ဇြဟတ်ဒပ်မၞုံ ၆၀ ပြၚ်ဂှ် သ္ပတံနူ ဂိတုသေပ်တေမ်ဗာ စၟတ်တ္ၚဲ (၂၁)တေံ ပါ်လဝ်ကရောၚ်ပၞာန် (၃)ကရောၚ်ပၞာန်တုဲ ပန်ဖျေံလွဟ်ဇၞော်ဍောတ် လ္ပာ်ကွာန်ဝဇြောန်တဝ်၊ ဨကနိ၊ ခမောက်ချောၚ်တုဲ ထ္ပက်လုပ်ကၠုၚ်ဒၟံၚ် ကရောၚ်ပၞာန်ရ။
ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်တုဲ ညးဒေသ နူကွာန်မပ္တံကဵုဝဇြောန်တဝ်၊ ယျၚေဝ်၊ ခမောက်ချောၚ်၊ ဝေတ်ချောၚ်၊ ဨကနိတအ် ဒှ်ဓဝိၚ်ဖေက်လကိုတ်တုဲ ဂြိပ်ဒဴပါဲဓလေတ်ဒၟံၚ် ပ္ဍဲဂြိုပ်ဒၞာဲမကြပ်ညောန် ကေုာံ ဒၞာဲဌာန်ဗၠးဘဲတအ်ရ။
ဟိုတ်နူဒပ်ကံၚ်ဇြဳပၞာန်ထ္ပက်လုပ်ကၠုၚ် ကရောၚ်ပၞာန်တုဲ ဒဵုကဵုအခိၚ်လၟုဟ် ၜိုန်ပေါဲဗတိုက်ၜါလ္ပာ် ဟွံက္တဵုဒှ်ဏီလေဝ် အကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်ရဂှ် ညးတာလျိုၚ်လလောၚ်ပရိုၚ် ဒပ်စဵုဒၞာညးဍုၚ်ကွာန်ပွိုၚ်ဍုၚ်ဍာ်ဗု ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုအဝ်ဂါတ် တုဲကၠုၚ်တေံလေဝ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်ဍာ်ဗုဂှ် စံၚ်ပလီုဏာလဝ် သ္ၚိဒၟံၚ်ညးဒေသတအ် (၂၇) မရ။
ရးဒေသဇၞော်တၞၚ်သြဳဂှ် ပ္ဍဲကဵုဂိတုအဝ်ဂေတ် ပွိုၚ်မွဲဂိတုတုဲကၠုၚ်တေံဂှ် ပါဲနူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်ဂှ် ဟိုတ်နူပေါဲဗတိုက်ၜါလ္ပာ်တုဲ ညးဒေသ ၃၆၀၀၀ ပြၚ် ဒးဂြိပ်ဒဴပါဲဓလေတ်လဝ်ရဂှ် ဂကောံသုတေသန ပ္ဍဲဒေသဂှ် လလောၚ်တြးပ္တိတ်လဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai