ပ္ဍဲဍုၚ်ကျာ်ပိ ပရေၚ်အုပ်ဓုပ်ကံၚ်ဇြဳပၞာန် ဒေါံညိၚ်အာတုဲ ပရေၚ်အုပ်ဓုပ် KNU စကၠုၚ်

ကျာ်ပိ၊ သေပ်တေမ်ဗာ(၂၃)

ပ္ဍဲဍုၚ်ကျာ်ပိ တွဵုရးကရေၚ် မဒှ်ဍုၚ်ပယျဵုသေံ-ဗၟာ မွဲဍုၚ်ဂှ် ယန္တရာအုပ်ဓုပ်ကံၚ်ဇြဳပၞာန် ဗ္ဂေတ်ဟွံမာန်တုဲ ဗော်သွးကောန်ဂကူကရေၚ် (KNU) စကၠောန်ရေၚ်တၠုၚ်ဒၟံၚ် သၞောတ်ပရေၚ်အုပ်ဓုပ် ကေုာံကုတ်သၞောဝ် ဒဏ်သၞောဝ်ရဂှ် ညးဒေသဍုၚ်ကျာ်ပိတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

လ္တူဍုၚ်ကျာ်ပိ၊ ပွိုၚ်ဍုၚ်လှာဒကှ်၊ တွဵုရးကရေၚ် ကံၚ်ဇြဳပၞာန် လလောၚ်တြးလဝ် ပရေၚ်အုပ်ဓုပ်ပၞာန်ဂှ် သွက်ပရေၚ်အုပ်ဓုပ် KNU ခါန်ကၞက်လဝ်သ္ကိုပ်အုပ်ဓုပ်တုဲ စကၠောန်ရေၚ်တၠုၚ်ဒၟံၚ် ပရေၚ်အုပ်ဓုပ်၊ ပရေၚ်ကုတ်သၞောဝ်ဒဏ်သၞောဝ် အတိုၚ်သၞောဝ်ဥပဒေ KNU တုဲ ဒပ်ကံၚ်ဇြဳပၞာန် ကၠုၚ်စိုပ်ပလာပ်ပထုဲဒၟံၚ်ဟွံမွဲတုဲ နွံဒၟံၚ်ပ္ဍဲတံဒပ်ဟေၚ်ရဂှ် ဂွံတီကေတ်အတိုၚ်ညးဒေသတအ်ဟီုလဝ်ရ။

“KNU ခါန်ကၞက်လဝ် သ္ကိုပ်အုပ်ဓုပ်ရ။ ပ္တံနူကဵုသ္ကိုပ်ဂကောံအရာပ် သ္ကိုပ်ပရေၚ်အုပ်ဓုပ် ပရေၚ်ကုတ်သၞောဝ်ဒဏ်သၞောဝ်တအ်ဂှ် ကၠောန်ကဵုလဝ် ဗီုဂှ်ရ။ ယန္တရာပရေၚ်အုပ်ဓုပ်ဂှ်တှ်ေ အတိုၚ်မူ KNU ရ။ သၞောဝ်လေဝ် အာဒၟံၚ် အတိုၚ်သၞောဝ် KNU ရ။ ဂဗုတ်တအ်လေဝ် နွံဒၟံၚ်ဗွဲမဂၠိုၚ်။ ဂဗုတ်လွဟ်၊ ဂဗုတ်ကၠတ်ဂၠံက်၊ ဂဗုတ်တအ်ဏံ အာဒၟံၚ်အတိုၚ်သၞောဝ် KNU ရ။ ပ္ဍဲဍုၚ်ဂှ် ဂကောံသီုဖအိုတ် နွံဒၟံၚ်ရ။ ဍေံတအ်ကေတ်လဝ် ဓဝ်ကၠိုဟ်ခၠၚ်ညးသ္ကအ်ရ။၊ အာကၠုၚ်ဒၟံၚ်ကဵု ဓဝ်ကၠိုဟ်ခၠၚ်ရ။ အဓိကဂှ် ညံၚ်ဟွံဂွံဒှ်ပေါဲဗတိုက် ညံၚ်ညးဍုၚ်ကွာန်တအ် ဟွံဂွံဒှ်ဒဒိုက် အတိုၚ်ဓဝ်ကၠိုဟ်ခၠၚ်ရ။ ညံၚ်ဟွံဂွံဒှ်ပေါဲဗတိုက် ပ္ဍဲဍုၚ် ညံၚ်ညးဍုၚ်ကွာန်တအ် ဟွံဂွံဒှ်ဒဒိုက်။ ဒၟာနူဂှ်ရ ဂကောံအဓိက (၄)ဂကောံဂှ်ထိၚ်ကဵုလဝ်ရ။ ဒပ်ပၞာန်လုပ်ပလာပ်ပထုဲဒၟံၚ် ဟၟဲပုဟ်။ ဒပ်ပၞာန်ဂှ် နွံဒၟံၚ် ပ္ဍဲဗွိုၚ်ဒပ်ပၞာန်။ ဘာသာဍေံ ဍေံမံၚ်ဒၟံၚ်ရ။ ဍေံတအ်ဟွံစှ်ေကၠုၚ် သၟဝ်ဏံပုဟ်။ ၜိုတ်(၂)သၞာံဒှ်ဒၟံၚ်ယျ”ဂှ် ညးဒေသမွဲတၠ ဟီုလဝ်ရ။

ပ္ဍဲဍုၚ်ကျာ်ပိဂှ် ပါလုပ်သီုဒပ်ရပ်လွဟ် KNU ဒပ်ပၞာန်ဗၠးၜးကောန်ဂကူကရေၚ် KNLA ၊ ဒပ်ကံၚ်ဇြဳပၞာန်၊ ဒပ်မၚ်ပယျဵု (BGF) ကေုာံဗော်ဍုၚ်မန်တၟိ(NMSP) ထ္ပက်လဝ်စၟတ်တဲကဵုကံၚ်ဇြဳပၞာန်တုဲ ဆဵုဂဗဒၟံၚ်ကုကံၚ်ဇြဳပၞာန်ဂၠိုၚ်ၚ်ကဵုဝါကီု၊ ဒပ်ပၞာန်ဒတုဲဖိုလ်ဒဳမဝ်ကရေဇြဳကရေၚ် (DKBA)ကီု၊ ဒပ်ကံၚ်ဇြဳၜိုဟ်လလံကရေၚ် (KNU/ KNLA PC)တအ်လေဝ် နွံဒၟံၚ်ရ။

လၟုဟ်ဏံ လ္တူဍုၚ်ကျာ်ပိဂှ် တံဒပ်ကံၚ်ဇြဳပၞာန် (၁)တံဒပ် ကေုာံဗဒိုပ်ဗၠာဲသၟိၚ် မွဲဗဒိုပ်နွံတုဲ ပ္ဍဲကဵုသၞေဟ်ကၚ်လုပ်ဍုၚ်ဂှ် BGF ကဵု DKBA၊ ပ္ဍဲကဵုသၞေဟ်ကၚ်ချေက်ပွေက်စေဝ်ပယျဵုသေံ-ဗၟာဂှ် ဒပ်ကံၚ်ဇြဳပၞာန်ကဵု BGF တအ် ဖျေံလဝ်ဗဒိုပ်တုဲ ပါဲနူဒပ်ပၞာန်ဗၠးၜးကောန်ဂကူကရေၚ် KNLA တုဲ ဂကောံရပ်လွဟ်သ္အာၚ်တအ်လေဝ် ချဳဒရာၚ်အာကၠုၚ်ဒၟံၚ်ရ။

ပ္ဍဲဍုၚ်ကျာ်ပိဂှ် သွက်ပရေၚ်ဂီုကၠီုဍုၚ် ကေုာံပရေၚ်အုပ်ဓုပ်ဂှ် နကဵုဂကောံရပ်လွဟ် သီုဖအိုတ်တအ် ကေတ်လဝ်ဓဝ်ကၠိုဟ်ခၠၚ်ညးသ္ကအ်တုဲ ပံၚ်တောဲရေၚ်တၠုၚ်ဒၟံၚ် နွံရဂှ်​လေဝ် ဂွံတီကေတ်ရ။

လ္တူဍုၚ်ကျာ်ပိဂှ် ပ္ဍဲကဵုဂိတုဂျာန္နဝါရဳကဵု ဂိတုဖေဖဝ်ဝါရဳတုဲကၠုၚ်ဏံ ဒပ်ပံၚ်ကောံ KNLA တအ် လုပ်စိုပ်စံၚ်ပလီုဗတိုက်လဝ် ရုၚ်ဌာနဆေၚ်စပ် ကေုာံဗဒိုပ်ဗၠာဲသၟိၚ် သၟဝ်တဲကံၚ်ဇြဳပၞာန်တုဲဂှ် ယန္တရာပရေၚ်အုပ်ဓုပ်ကံၚ်ဇြဳပၞာန်လ္တူဍုၚ်ဂှ် လမျီုဟွံလုပ်တုဲ အခိၚ်လၟုဟ်ဏံ KNU လုပ်ရေၚ်တၠုၚ်ဒၟံၚ် ပ္ဍဲပရေၚ်အုပ်ဓုပ်၊ ပရေၚ်စဳရေၚ်သၞောဝ်ဓဝ်ရ။

ကြဴနူပရေၚ်ပရောဏံ က္တဵုဒှ်တုဲ ပ္ဍဲကဵုဍုၚ်ကျာ်ပိဂှ် သ္ကိုပ်အုပ်ဓုပ်ကံၚ်ဇြဳပၞာန်ခါန်ကၞက်ဟၟဲတုဲ သ္ကိုပ်အုပ်ဓုပ်ဍုၚ်ဂှ် ကံၚ်ဇြဳပၞာန် ဟွံဂွံခါန်ကၞက်လဝ်ဏီရဂှ် ဂွံတီကေတ် နူညးဒေသတအ်ရ။

“DKBA တအ် PC တအ်တှ်ေ ပံၚ်တောဲတုဲ ဂီုကၠီုဍုၚ်ရ။ ပရေၚ်ဂီုကၠီုဍုၚ် ဒုစ္စရိုတ်ဒှ်ကၠုၚ် ပ္ဍဲဍုၚ်သီုဖအိုတ်ဂှ် ဍေံတအ်ပံၚ်တောဲတုဲ ကၠောန်ဒၟံၚ်ရ။ ပရေၚ်ဂီုကၠီုဂှ် BGF ကေတ်လဝ်တာလျိုၚ် အဓိကရ။ ဂကောံသှ်ေနူဂှ် ပံၚ်တောဲကဵုရ။ အာဒၟံၚ်ကဵုဓဝ်ကၠိုဟ်ခၠၚ်။ ဥပမာဍေံ ဒပ်ပၞာန်ဂှ် ဘာသာဍေံဍေံမံၚ်။ ပရေၚ်ဂီုကၠီုပ္ဍဲဍုၚ်ဏံ ဂဗုတ်ရာဇဝတ်တအ် မုတအ်ဂှ် (KNU) ဍေံတအ်ရ ဆက်ကၠောန်အာဏောၚ်ဟီုတုဲ ဒှ်ဒၟံၚ်ဗီုပြၚ်ဂှ်ရ။ ဒၟာနူဂှ်ရ ဒပ်ပၞာန်ဂှ် ညိလေဝ်ဟွံစှ်ေကၠုၚ်လ္ပာ်ဏံပုဟ်။ သ္ကုတ်လ္ပာ်ဏံတှ်ေ ယန္တရာဂှ် ဂေတ်ဒၟံၚ် ဗီုဏံရ။ ရုၚ်ဌာနဆေၚ်စပ်(ကံၚ်ဇြဳပၞာန်ဂှ်) ဟၟဲရပုဟ်။ သ္ကိုပ်အုပ်ဓုပ်(ကံၚ်ဇြဳပၞာန်)ဂှ် ပြံၚ်တုဲ။ သ္ကိုပ်အုပ်ဓုပ်ဍုၚ် ဟၟဲဏီပုဟ်။ ဟွံဂွံခါန်ကၞက်လဝ်ဏီပုဟ်”ဂှ် ညးဒေသမွဲတၠဂှ် ဟီုရ။

ညးမၞုံအခေါၚ်ဟီုဂး KNU ဖဒိုဝ်သဝ်တဝ်နဳလေဝ် ပ္ဍဲကဵုဍုၚ်ကျာ်ပိဂှ် ယန္တရာပရေၚ်အုပ်ဓုပ်ကံၚ်ဇြဳပၞာန် လီုလာ်ဆောတ်ယောၚ်ဒၟံၚ်တုဲ ဟိုတ်နူပရေၚ်ပၠံၚ်ၜးကၠတ်ဂၠံက် ဂၠိုၚ်တိုန်ကၠုၚ်ဒၟံၚ်ဂှ်ရ လၟုဟ်ဏံ နကဵုတၚ်အာတ်မိက်ညးဍုၚ်ကွာန်တအ် KNU စဳရေၚ်ကဵုဒၟံၚ်သၞောဝ်ဓဝ်ရဂှ် ဟီုထ္ၜးလဝ်ရ။

ဍုၚ်ကျာ်ပိဂှ် နွံဒၟံၚ် ပ္ဍဲတိဍာ်ခရိုၚ်ဒူပလာယာ ဒပ်မဟာ (၆) KNU ပွိုၚ်ဍုၚ်လှာဒကှ်၊ တွဵုရးကရေၚ်တုဲ ပ္ဍဲကဵုဂိတုဖေဖဝ်ဝါရဳ သၞာံ (၂၀၂၃)ဂှ် ကံၚ်ဇြဳပၞာန် လလောၚ်တြးပ္တိတ်လဝ် မာယှေဝ်လဝ်တုဲ ကြဴနူဒပ်ပၞာန်သီအဝဵုတုဲ သ္ကုတ်လကြဴဏံလေဝ် ပ္ဍဲကဵုဍုၚ်ကျာ်ပိကဵု ပ္ဍဲဒေသမၞုံမွဲဗွိုၚ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်သ္ကာတ်မြဟ်က္တဵုဒှ်လဝ်ရ။

ပ္ဍဲတွဵုရးကရေၚ်ဂှ် သ္အာၚ်နူဍုၚ်ကျာ်ပိတုဲ ပ္ဍဲကဵုဍုၚ်ဘာပန် ခရိုၚ်ဘာပန်လေဝ် ယန္တရာပရေၚ်အုပ်ဓုပ်ကံၚ်ဇြဳပၞာန် ဗ္ဂေတ်ဟွံမာန်တုဲ ပ္ဍဲကဵုဍုၚ်လ္ၚဵုတအ်ဂှ်လေဝ် ဗၞတ်ဗ္ၜတ်အပိုၚ်ခြာကံၚ်ဇြဳပၞာန် အုပ်ဓုပ်မာန် သှ်ေၜက်ဒၟံၚ် ဆၜိုတ်ညိညဓဝ်ဟေၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – Social Media