ပ္ဍဲတွဵုရးဍုၚ်မန် ထၜိုတ်မွဲပံၚ် စပံက်ၚုဟ် နကဵု ၁၇၀၀ ဒ္ကေဝ်ပြၚ်

မတ်မလီု၊ သေပ်တေမ်ဗာ (၂၃)

ပ္ဍဲကဵုရာသဳထၜိုတ်စသၞာံဏံ ပ္ဍဲကဵုတွဵုရးဍုၚ်မန် ထၜိုတ်မွဲပံၚ်ဂှ် စပံက်လဝ်ၚုဟ် နကဵု (၁၇၀၀) ဒ္ကေဝ်ရောၚ် တၠကမၠောန်ရဝ်ဗာတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တွဵုရးဍုၚ်မန် တိဨကတဵုထၜိုတ် (၅) ကိုဋ်ပြၚ် မၞုံဂှ်ဝွံ ကၠောန်ဒၟံၚ်ကမၠောန်ကၠအ်ထၜိုတ် လၟေၚ်သၞာံ နူကဵုလဒေါဝ်ဂိတုသေပ်တေမ်ဗာ စဵုကဵုဂိတုမေအိုတ်ရ။

ပ္ဍဲကဵုရာသဳထၜိုတ်စ သၞာံဏံဂှ် ထၜိုတ်ထအၚ်ယက် Local 3 တိတ်ပ္ဍဲဒေသဂၠိုၚ်တံဂှ် မွဲပံၚ် ၁၇၂၀ ၊ ထၜိုတ်စဲတ္ၚဲ Local 3 မွဲပံၚ်ဂှ် ၁၇၀၀၊ ထၜိုတ်ထအၚ်ယက် ကဆံၚ် RSS 1 ဂှ် ပံက်လဝ်ၚုဟ် နကဵု ၁၈၄၀ ဒ္ကေဝ်ရ။

တၠကမၠောန်ထၜိုတ်မွဲတၠဂှ် ၚုဟ်ထၜိုတ်လၟုဟ်ဂှ်ဝွံ ၜိုန်ရဒှ်ၚုဟ်ဒးရးမွဲကီုလေဝ် ပ္ဍဲကဵုဒေသဟွံညိၚ်ဝတ်တံဂှ် သွက်ဂွံခွါတ်ထၜိုတ်ဂှ် အခက်အခုဲနွံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အခိၚ်ဏံ ပ္ဍဲရာသဳစဏံဂှ် အရာမ္ဒးပလေဝ်ပလေတ်နွံဂှ် ၜိုတ်ပလေဝ်လဝ်ရနွံညိကီု။ တုဲပၠန် ၚုဟ်ဏံဂှ် ညိၚ်ဟာ၊ ဟွံညိၚ်ပုဟ်ဟာဟီုဂှ် နွံဒၟံၚ်ဏီ။ နကဵုၚုဟ်ၜိုတ်ဏံတှ်ေ ၚုဟ်ဒးဒးရးရးမွဲရဂှ် ညာတ်ရ။ သွက်ရဲဂူယာတံဂှ် ဂိလေဝ်ဟွံဂိပုဟ်၊ သာလေဝ်ဟွံသာပုဟ်။ ၜိုတ်ကဆံၚ်ဏံရတှ်ေ မုမှသ္ဇက်ဒးဟီုဟွံမွဲပုဟ်။ ပ္ဍဲကဵုဒၞါဲလ္ၚဵုလ္ၚဵု ပ္ဍဲကဵုဒၞါဲခွါတ်ထၜိုတ်ဂွံတံဂှ် ပလေဝ်ပလေတ်ဒၟံၚ် သွက်ဂွံခွါတ်ထၜိုတ် ညးညးအဲအဲဂှ် ဂွံဆဵုကေတ်ရ။ ဒၞါဲလ္ၚဵုတံဂှ် ခွါတ်ဟွံဂွံတုဲ ဒၞါဲဟွံဂံၚ်အာချိုတ်တ်ပၠိုတ်တ်ဂှ်လေဝ် နွံဂှ်နွံကၠုၚ်မာန်ဏောၚ်။ ညံၚ်ရဴသၞာံတုဲတေံကီု မၚ်ကျောဝ်အကာဲအရာတုဲ ဒးကၠောန်ဏောၚ်ဂှ် ညာတ်ကေတ်ရ “ သာ်ဝွံ သ္ဂးရ။

တၠကမၠောန်ကၠအ်ထၜိုတ်တံဝွံ သွက်ဂွံကလေၚ်စ ကမၠောန်ကၠအ်ထၜိုတ်တံဂှ် ဗက်ကော်ဒၟံၚ် ကောန်ကလောန်စိုန်သ္ကီုတံကီုလေဝ် ဒးဂဗဒၟံၚ်ကဵု ပြသၞာကောန်ကလောန်အောန်တံတုဲ ကၠအ်လ္ၚဵုတံဂှ် ဟိုတ်နူကော်ကောန်ကလောန်ဟွံဂွံဏီတံဂှ်ရ ပလေဝ်ပလေတ်ကၠအ်တံဂှ် ကၠောန်ဟွံမာန်ဏီပုဟ်ဂှ် ညးတဵုထၜိုတ်တံ သ္ဂးအိုတ်ရ။

တၠကမၠောန်ထၜိုတ်မွဲတၠပၠန်ဂှ်လေဝ် ပ္ဍဲကဵုရာသဳထၜိုတ်သၞာံဏံ မ္ၚးနူကမ္ပဏဳဂမၠိုၚ်ဂှ် လ္ပာ်မၞိဟ်ရာန်တံ ဗ္ကန်လဝ်ကၠာကၠာတံဂှ် စဵုကဵုဟွံမွဲအောန်ဒၟံၚ်တုဲ ပ္ဍဲကဵုဗွဝ်ဖျာဂှ်လေဝ် ပရေၚ်သွံရာန် ညိၚ်ဒၟံၚ်ရောၚ် ဟီုရ။

“ညးမွဲမှ ဟွံဂွံခွါတ်ဏီပုဟ်။ လၟုဟ်မှ ဂွံပလေဝ်လဝ်ညိကီု။ ဟွံတိတ်ဏီပုဟ်။ လၟုဟ်မှ ဂွံကဵုဝါဲ။ ဗြဲကျာတၟးဂွံ (၂) တ္ၚဲညိကီုဟီုတှ်ေ ကဵုဝါဲတုဲ ဂွံၜိုတ် (၁၀) တ္ၚဲတုဲမှ ခွါတ်ဂွံဏောၚ်။ သွက်ဂွံခွါတ်ထၜိုတ်ဂှ် ညံၚ်ဂွံဒှ်ဒၟံၚ်ဒတုဲတုဲ ပလေဝ်ပလေတ်လဝ်ဒတုဲရ။ ကၠာတေံ အခိၚ်ဏံဟီုမ္ဂး ပရေၚ်သွံရာန်တံဂှ် စဒၟံၚ်ယျ။ ရာန်ဗ္ကန်ဒၟံၚ် ကၠာကၠာတံယျ။ ဖုၚ်တံဗြုဒၟံၚ်ဍတ်တ်ယျဏောၚ်။ သၞာံဏံဂှ် ကမ္ပဏဳလဵုလေဝ် ဟွံဆက်မွဲပုဟ်။ ရဲရာန်လဵုလေဝ် ဟွံဆက်ပုဟ်။ ဗြုဗ္ကန်လဝ်ကၠာကၠာဂှ်လေဝ် ဟွံဂွံမိၚ်ကေတ်ရပုဟ်။ လၟုဟ်ဂှ် ဗ္ကန်လဝ်ကၠာကၠာဂှ် ၜိုတ်မၞိဟ်သွံရာန်ညိညတံရ ကၠောန်တုဲ လ္ပာ်ကမ္ပဏဳဇၞော်ဇၞော်၊ လ္ပာ်သေဌဳတံဂှ် ဟွံဗ္ကန်လဝ်ပုဟ်။ ဍေံတံမူဟိုတ်ဟွံသ္ပရောဟီုဂှ် ဟွံတီပုဟ်။ ဒှ်ဒၟံၚ်ပရေၚ်သွံရာန်ရဟီုမ္ဂးလေဝ် ၜိုတ်ရဲကြိုၚ်စွံလဝ်သၞာံတုဲတေံရဏောၚ် ဒှ်ကလောန်။ ပ္ဍဲကဵုတဲတၠကၠအ်တံဂှ် ထၜိုတ်ဟွံမွဲရပုဟ် “ သာ်ဝွံ သ္ဂးရ။

ဍုၚ်သေံကဵု ဍုၚ်ကြုက်တံ ၜိုန်ရရာန်ဒၟံၚ် ထၜိုတ်သှ်ေဒၟံၚ် အပ္ဍဲဗွဝ်ဖျာတံ နွံဒၟံၚ်ကီုလေဝ် ဟိုတ်နူအကာဲအရာပရေၚ်ဂီုကၠီုကဵု ပရေၚ်စၟဳတ်တံတုဲ ပရေၚ်ကူသာန်သွံရာန်တံဂှ် အခက်အခုဲနွံဒၟံၚ်ရောၚ် ဂွံတီကေတ် ဇရေၚ်တၠကမၠောန်ရဝ်ဗာတံရ။

မွဲလ္ပာ်ပၠန်ဂှ် ညးတဵုလွဳထၜိုတ်ဂမၠိုၚ်ဝွံ အပ္ဍဲကာလသီအဝဵုဏံ ကပေါတ်ဗၞိက်တမ်တံ ၚုဟ်တိုန်ကၠုၚ် ဂၠိုၚ်ကဵုဆကီု၊ မ္ၚးနူကဵုၚုဟ်လိၚ်ကောန်ကလောန်ဂှ် ခရိတ်အရပ်စပ်နာနာ ဇၞော်သၠုၚ်တံဂှ်လေဝ် ဒးဒုၚ်စသိုၚ်ဒၟံၚ် ဇၞော်ကဵုဇြဟတ်ရ။

တွဵုရးဍုၚ်မန်ဝွံ လၟေၚ်သၞာံ ထၜိုတ်တိတ်ဒၟံၚ် လျိုၚ်တာန် မွဲကိုဋ်ပြၚ် နွံဒၟံၚ်တုဲ ထၜိုတ်တိတ်ကၠုၚ်တံဂှ် ပလံၚ်ဗစိုပ်သွံတြးဒၟံၚ် ဍုၚ်ကြုက် ဂၠိုၚ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီု−CJ