သွက်ဂွံကၠောန်ဗဒှ်ပေါဲရုဲမာဲမာန် EAO ဂမၠိုၚ် သွက်ဂွံရီုဗၚ်ကဵုဂှ် ကံၚ်ဇြဳပၞာန် ဟီုကၠုၚ်

နေဗျဳဒဝ်၊ သေပ်တေမ်ဗာ (၂၃)

ပ္ဍဲကဵုဒေသ ဂကောံရပ်လွဟ်ကောန်ဍုၚ်အရၚ် (EAO) ဂမၠိုၚ်မၞုံတံဂှ် သွက်ဂွံကၠောန်ဗဒှ်ပေါဲရုဲမာဲ ဒဳမဝ်ကရေဇြဳဗော်ဇဳ ဗၠးၜးဗဗွဲဓဝ် ဗွဲမအံၚ်ဇၞးမာန် သွက်ဂွံပံၚ်တောဲရေၚ်တၠုၚ်ကဵုဂှ် ကံၚ်ဇြဳပၞာန် ကေုာံ RCSS တံ သဳကၠဳလဝ်ရောၚ် လလောၚ်ပ္တိတ်လဝ်ရ။

ကမ္မတဳပ္ညဳပ္ညပ်ထ္မံက်ရုပ်ရဴ ပရေၚ်ၜိုဟ်လလမ် ကေုာံ ပရေၚ်ညဳသၟဟ်ဂကူ ကံၚ်ဇြဳပၞာန်ဂှ်ကဵု ဂကောံညးစၞး ကံၚ်ဇြဳကလေၚ်ဒက်ပ္တန်ရးသေံ (RCSS) တံ ဆဵုဂဗသဳကၠဳလဝ် ပ္ဍဲကဵုနေဗျဳဒဝ် ပ္ဍဲဂိတုသေပ်တေမ်ဗာ ၂၁ တေံရ။

ကံၚ်ဇြဳပၞာန်ဂှ် ပ္တိုန်ထ္ၜးသဳကၠဳလဝ် ပရူပရာ သွက်ဂွံကၠောန်ဗဒှ်ပေါဲရုဲမာဲ ပ္ဍဲကဵုဒေသ ဒၞါဲ EAO တံနွံ ဗွဲမအံၚ်ဇၞးမာန်ဂှ်ကဵု သွက်ဂွံကၠောန်ဗဒှ် အသေအဟာန် တ္ၚဲကၠောံသၞာံ လိက်ကသုက်ဒေါအ်ပန်ပှော်အလုံဍုၚ်မွဲ NCA ပေၚ် (၈) သၞာံ တံမဒှ်ရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ပ္ဍဲကဵု EAO ထ္ပက်လဝ်စၟတ်တဲ ဒေါအ်ပန်ပှော်ဂမၠိုၚ် မသဳကၠဳဒၟံၚ်ပရေၚ်ၜိုဟ်လလမ် ကုကံၚ်ဇြဳပၞာန်တံဂှ် ပါဲနူကဵု RCSS တုဲ ဟိုတ်နူဂကောံဇြဟတ်မၞုံတံ ဟွံမွဲဂှ်ရ သွက်ဂွံကဵုအရီုဗၚ် သွက်ပေါဲရုဲမာဲဂှ် ဒှ်ကိစ္စစိုပ်တရဴဟွံသေၚ်ပုဟ်ဂှ် သ္ၚဳဂၠိပ်လဝ်ရ။

“ ဂွံရီုဗၚ် ပေါဲရုဲမာဲဟီုဂှ်ဝွံ အာတ်ဒုၚ်ဂုဏ် EAO တံဟီုကီုလေဝ် ပါဲနူကဵု RCSS တုဲတှ်ေ ပ္ဍဲကဵု EAO ထ္ပက်စၟတ်တဲတံဂှ် ဂကောံဇြဟတ်နွံဂှ် မွဲဟွံမွဲပုဟ်။ ပ္ဍဲညးတံဂှ် တိဍာ်တွဵုဒၞက်ဟီုဂှ် ဟွံမွဲပုဟ်။ ဟိုတ်ဂှ်ရ တၚ်အာတ်မိက် သွက်ဂွံကဵုအရီုဗၚ် စပ်ကဵုပေါဲရုဲမာဲကံၚ်ဇြဳပၞာန် EAO တံ ဂွံကဵုရီုဗၚ်ပါလုပ်ဟီုဂှ် ၜိုတ်အရေဝ်သၟးရဏောၚ်။ ဒှ်ကိစ္စ စိုပ်တရဴဟွံသေၚ်ပုဟ်ဂှ် အဲညာတ်ရ” သာ်ဝွံ ညးသ္ဂးရ။

ဒပ်ကံၚ်ဇြဳပၞာန်ဝွံ တြးလဝ်ဇြဟတ်ဒပ် ကြပ်အလုံဍုၚ်မွဲတုဲ ဒးဆေၚ်မုက်ဗ္တိုက်ဒၟံၚ်ကဵု ဂကောံဒပ်စဵုဒၞါညးဍုၚ်ကွာန်တံတုဲ အခိၚ်လၟုဟ်ဂှ်လေဝ် အပ္ဍဲတွဵုရးသေံဂှ် ကုဒပ်ပၞာန်ဗၠးၜးကောန်ဂကူတအာၚ် TNLA ကေုာံ အပ္ဍဲတွဵုရးကချေၚ်ဂှ် က္တဵုဒှ်ဒၟံၚ်ပေါဲဗ္တိုက် ကုဂကောံဗၠးၜးကချေၚ် (KIO) တံရ။

မွဲလ္ပာ်ပၠန်ဂှ်လေဝ် ပ္ဍဲကဵု EAO ဒေါအ်ပန်ပှော်ဂမၠိုၚ် ဗော်သွးကောန်ဂကူကရေၚ် (KNU) ၊ ဒပ်ပၠတရဴကောန်ဂကူချေၚ် (CNF) ကေုာံ ဒပ်ပၞာန်ကွးဘာ (ABSDF) တံသၟးဟွံက ဗော်တောတက်ကရေၚ်ဍာဲ (KNPP) တံကဵု ဒပ်ကံၚ်ဇြဳပၞာန်တံဝွံ ပ္ဍဲကဵုဒေသကောန်ဍုၚ်အရၚ်တံဏံကဵု ပ္ဍဲကဵုတိဍာ်ထိၚ်ဒက်ဏံဂှ် ပေါဲဗ္တိုက်တံ ဆက်နွံဒၟံၚ်ရ။

ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဂှ် နကဵုကံၚ်ဇြဳပၞာန် အခိၚ်ဒှ်ဒၟံၚ်အကြေပ်အဂြတ်နာနာဂှ် ဒှ်ဒၟံၚ်ဍာ် ဗက်ဂၠါဲဒၟံၚ်ပၞော်တိတ် သွက်ဂွံရုန်ဂ္စါန်တိတ်ဂှ်တုဲ KNU ဂှ်လေဝ် ဗ္တိုက်အာကဵု ကရောံညးဍုၚ်ကွာန်တံရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ဍေံ (စကစ) ကြဴနူသီအဝဵုတုဲ လၟေၚ်ကမၠောန်ပရေၚ်ၜိုဟ်လလမ် ဟွံဒှ်ကလောန်လးလးတံ လိက်ကသုက် လမျီုဟွံလုပ်ရတံဂှ် နွံဒၟံၚ်ဏီဏောၚ်၊ လမျီုလုပ်ဒၟံၚ်ဏီဂးတုဲ ဗ္ဂေတ်လှန်ညးဍုၚ်ကွာန်တံကဵု ဍုၚ်သ္အာၚ်တံတုဲ ဆက်ကၠောန်အာ ကောံဓရီုပရေၚ်ၜိုဟ်လလမ်တံဏောၚ်။ ကၞောတ်တဲ နဒဒှ်ပၞော်တိတ်မွဲ ပေါဲရုဲမာဲပ္တောံ ဟွံလုပ်သၞောဝ်ဂှ်လေဝ် ဆက်တုဲကၠောန်အာဏောၚ်ဂှ် ဒှ်ပွဍေံတံရဏောၚ်။ ဍာံဍာံဂှ် ပိုယ်တံ သာ်လဵုမှ ဒုၚ်တဲဟွံဂွံပုဟ်။ ဟိုတ်ဂှ်ရ ပေါဲရုဲမာဲပ္တောံဍေံတံ မကၠောန်ဗဒှ်ကဵုဂှ်ဒှ်ဒှ်၊ ပေါဲသဳကၠဳပရေၚ်ၜိုဟ်လလမ်တံဂှ် အံၚ်ဇၞးအာဟွံသေၚ်ပုဟ်။ ညးဍုၚ်ကွာန်တံကဵု ပိုယ်တံလေဝ် နကဵုဂၠံၚ်ဍာန်နာနာဂှ် ဆက်လုပ်အာပေါဲဗ္တိုက်တုဲ ဗ္တိုက်ပလီုအာဏောၚ်ဟီုဂှ် ဟွံဒးဒှ်သံသယပုဟ်။ ညအ်ဂှ် ဂလာန်ဗ္ကန်ပိုယ်တံ မိက်ဂွံဟီုရ“ သာ်ဝွံ သ္ဂးရ။

ဂကောံသဳကၠဳပရေၚ်ၜိုဟ်လလမ် ကံၚ်ဇြဳပၞာန်ကဵု ဂကောံ EAO ထ္ပက်လဝ်စၟတ်တဲ (၇) ဂကောံ၊ ဂကောံ EAO ဟွံဂွံထ္ပက်လဝ်စၟတ်တဲ (၃) ဂကောံတံ ပ္ဍဲကဵုပေါဲသဳကၠဳဆဵုဂဗတုဲကၠုၚ်ဂှ် လ္ပာ်ကံၚ်ဇြဳပၞာန် ပ္တိုန်ထ္ၜးသဳကၠဳလဝ် ကိစ္စပရေၚ်ကၠောန်ဗဒှ် ကောံဓရီုပရေၚ်ၜိုဟ်လလမ်ရ။

ပ္ဍဲကဵုပရေၚ်ဆဵုဂဗ ကံၚ်ဇြဳပၞာန် ကေုာံ RCSS တံ အလန်ဏံဂှ်ဝွံ ပ္ဍဲကဵုဒေသ ဒၞါဲဂကောံရပ်လွဟ်ကောန်ဍုၚ်အရၚ် (EAO) တံမၞုံဂှ် သွက်ဂွံပံၚ်တောဲရေၚ်တၠုၚ် ကုပရေၚ်ကဵုအရီုဗၚ်ပရေၚ်ဗ္စာရဏာမၞိဟ်တံမာန် ကေုာံ ၝောံပိုဒ် ထေက်ကဵုဒးပလေဝ် ပ္ဍဲကဵုသၞောဝ်သ္ဇိုၚ်ဒက်ပ္တန် ၂၀၀၈ တံဂှ်လေဝ် သဳကၠဳလဝ်ရ။

သ္အာၚ်နူဂှ်ပၠန် နူကဵုကံၚ်ဇြဳကလေၚ်ပ္တန်ရးသေံ (RCSS) ဂှ် တၚ်သဳကၠဳ လ္တူတၚ်နွံပၟိက် စပ်ကဵုပရေၚ်ပိုန်ဒြပ်၊ ပရေၚ်ဖောအ်ဗြေဝ်တောတက်ဒေသတံဂှ် သဳကၠဳပ္ညဳပ္ညပ်လဝ်ညးသ္ကအ်ရောၚ် ပရိုၚ်တြးဝါဒ ဒပ်ပၞာန်တံ ထ္မံက်ထ္ၜးလဝ်ရ။

ပ္ဍဲဂိတုသေပ်တေမ်ဗာ (၂၂) ဂှ် သဳကၠဳပ္ညဳပ္ညပ်လဝ် ကိစ္စဟွံတုဲဒှ်ဏီတံဂှ်တုဲ ကေတ်အာတၚ်တုပ်စိုတ်ၜါလ္ပာ်တံဏောၚ်ဂှ် လလောၚ်ပ္တိတ်လဝ် ပ္ဍဲကဵုလိက်ပရိုၚ်ကၟိန်ဍုၚ်ပိုၚ် ကေုာံ လာၚ်ရုပ်ရမျာၚ် ကံၚ်ဇြဳပၞာန် မထိၚ်ဒက်လဝ်တံဂှ်ရ။

ပေါဲသဳကၠဳဏံဂှ် က္ဍိုပ်သ္ကိုပ်ဂကောံသဳကၠဳပရေၚ်ၜိုဟ်လလမ်၊ ဝန်ဇၞော်ကာအပ္ဍဲဍုၚ် သ္ကိုပ်ဗိုလ်ဇၞော် ယျာပျေအ် တိုန်စိုပ်လဝ်ဟွံမွဲတုဲ ညးအုပ်ကာ ဒုသ္ကိုပ်ဗိုလ်ဇၞော် မေန်နာၚ် ကေုာံ ကောန်ဂကောံဂမၠိုၚ်၊ နူကဵု RCSS ဂှ် ညးအုပ်ကာလၟိဟ် (၁) သာၚ်သဝ်ၚေန်၊ ကောန်ဂကောံကမ္မတဳကေၚ်ကာကမၠောန်ဗဟဵုတံကဵု ကမ္မတဳက္ဍိုက်ပ်ဗဟဵုတံ တိုန်စိုပ်လဝ်အိုတ်ရ။

ပရိုၚ်−သြၚ်လောန်တိုၚ်(မ်)

ဗီု−MOI