သွက်ပေါဲသဳကၠဳကဆံၚ်လ္တူ ပူတေန် ကေုာံ ကေမ်ဂှ် ကိုဝ်ရဳယျာသၟဝ်ကျာ ကၠောန်ဗဒှ် ကောံဓရီုဖျေံစၟတ်မူဝါဒ

သဵု(လ်) ၊ သေပ်တေမ်ဗာ (၂၃)

ကလေၚ်သ္ၚဳဂၠိပ် လၟေၚ်တရဴက္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အောန် အာစိုပ်လဝ် ရုယှာ ဟွံလအ်ဏီဂှ်တုဲ သွက်ဂွံလ္ၚတ် အစဳဇန်အနာဂတ် မသ္ကဵုပရေၚ်ဆက်ဆောံ အကြာၜါဍုၚ်တံ ခိုၚ်ကၠိုက်တဴဂှ်တုဲ ဂကောံဖျေံစၟတ်မူဝါဒကၟိန်ဍုၚ် ဒဒှ်ရကၠောန်ဗဒှ်လဝ် ကောံဓရီုမွဲဂှ် ပ္ဍဲဂိတုသေပ်တေမ်ဗာ (၂၁) တေံ မဳဒဳယျာကၟိန်ဍုၚ်ပိုၚ်တံ ထ္မံက်ထ္ၜးလဝ်ရ။

တုဲကၠုၚ် ပ္ဍဲတ္ၚဲဗုဒ္ဓဝါတေံ သ္ကိုပ်စၞောန်ပ္ညုၚ်ဌာန ကမ္မတဳကောံဓရီုဗျူရိုဝ်ပရေၚ်ဍုၚ်ကွာန် ဗော်ကောန်ကမၠောန်ဂွံအဝဵု ကေမ်သံၚ်နာမ်ဂှ် ပ္တိုန်ထ္ၜးလဝ် လိက်ဒုၚ်စဳရေၚ် စပ်ကဵုလၟေၚ်တရဴက္ဍိုပ်သ္ကိုပ်ကေမ် အပ္ဍဲပေါဲဆဵုဂဗသဳကၠဳ ကုသမ္မတရုယှာဗလာဒဳမာပူတေန်ဂှ်ရောၚ် ဌာန်ပရိုၚ် KCNA ထ္မံက်ထ္ၜးလဝ်ရ။

ပွမအာစိုပ်ဂေတ်ဝေၚ်သာ်ဏံဂှ်ဝွံ ပ္ဍဲအနာဂတ်ခေတ်တၟိဏံ ပရေၚ်ဆက်တောံ ရုယှာ ကေုာံ ကိုဝ်ရဳယျာသၟဝ်ကျာဂှ် သ္ကဵုပြံၚ်လှာဲကၠေံကဆံၚ်ဗျူဟာတံဂှ်တုဲ ဒဒှ်ရကေတ်နၚ် အပြံၚ်အလှာဲ အကာဲအရာပရေၚ်ဍုၚ်ကွာန်ပထဝဳဂၠးတိတံပေၚ်ၚ်ဂှ် လိက်ဒုၚ်စဳရေၚ်ဂှ် နိဿဲထ္မံက်ထ္ၜးလဝ်ရ။

ပ္ဍဲကဵုလိက်ဒုၚ်စဳရေၚ်ဂှ် ဆက်မိတ်လဝ် သီုကဵုကိုန်စဳမာန်ဍာ်ဇမၠိၚ် သွက်ပရေၚ်ဖောအ်ဗြေဝ်တောတက် ပရေၚ်ဆက်ဆောံ ကိုဝ်ရဳယျာသၟဝ်ကျာ−ရုယှာဂှ်ကီုရ။

အပ္ဍဲလၟေၚ်တရဴဍုၚ်ရုယှာ ပွိုၚ် (၁၀) တ္ၚဲ ပ္ဍဲကဵုပရေၚ်ဆဵုဂဗ ကေမ် ကေုာံ ပူတေန်တံ ပ္ဍဲကဵုကဝ်သမိုဝ်ဒေါမ် မၞုံဒေသအာမ်မာ ကၞောတ်ဗၟံက်ဍုၚ်ရုယှာဂှ်ဝွံ ကြဴနူသၞာံ ၂၀၁၁ ကေမ်ဂွံကၠုၚ်အဝဵုတုဲဂှ် ဒှ်ပေါဲသဳကၠဳကဆံၚ်လ္တူ မကၠောန်ဗဒှ်လဝ် ဂၠိၚ်အိုတ်မွဲရောၚ် ဂွံတီကေတ်ရ။

တၚ်နၚ်လစှ်ေ နူကဵုပေါဲဆဵုဂဗတံဂှ် လလောၚ်ပ္တိတ်လဝ် ပြာပြာကတ်တ်ဟွံမွဲကီုလေဝ် ကြဴနူပေါဲသဳကၠဳကဆံၚ်လ္တူတုဲဂှ် အကြာၜါဍုၚ် ရေၚ်တၠုၚ်အာ ပရေၚ်ပံၚ်တောဲစပ်ကဵုအကာသ ကေုာံ ပရေၚ်ပၞာန်တံရောၚ်ဂှ် ပူတေန် ထ္မံက်ပ္တိတ်ဟီုဂးလဝ်ရ။

ကေန်ဂျုၚ်အောန်ဝွံ နူကဵုရုယှာဂှ် ကေတ်နၚ်အရီုဗၚ်ဇွောံမတံသၟးဟွံက နဲပညာသွက်က္ၜၚ်ဗၠိုပ်ဍာ် ရပ်စပ်ဇြဟတ်ဓာတ်နျူကလဳယျာ ကေုာံ နဲပညာဂြိုဟ်ပ္တောံတံဂှ် ဂွံလဝ်တုဲယျဂှ်လေဝ် သ္ၚဳဂၠိပ်ဒၟံၚ်အိုတ်ရ။

နကဵုကိုဝ်ရဳယျာသၟဝ်ကျာလေဝ် ရီုဗၚ်ထံက်ပၚ်အာ ရုယှာ ကမ်လှောဝ်ပလီုကွဳစၚ်ခြပ်ပသဲတံ ဗွဲမဂၠိုၚ်ဂၠေၚ် ဂၠိုၚ်ကဵုပြကောဋိကိုဋ်မာန်ဂှ် နိဿဲကေတ် ပရိုၚ်တမ်ရိုဟ်ထံၚ်ပရိုၚ်အမေရိကာန်တံတုဲ မဳဒဳယျာဂမၠိုၚ် ထ္မံက်ထ္ၜးလဝ် ပ္ဍဲကဵုသတ္တာဟတုဲကၠုၚ်ဏံရ။

တၚ်တုပ်စိုတ်သာ်ဏံဂှ်ဝွံ ဝးပ္ကဝ်လဝ် တၚ်ကၟာတ်လဒဵုကေတ်အရေဝ် ကံၚ်ဇြဳဂီုကၠီုကုလသမဂ္ဂ လ္တူပျုၚ်ယာန်ဂှ်တုဲ သွက်ကၟိန်ဍုၚ်ၜါဍုၚ်ဏံဂှ် ဖဵုအဆက်ဂမၠိုၚ် နွံကၠုၚ်ဏောၚ်ဂှ် ကိုဝ်ရဳယျာသၠုၚ်ကျာ၊ ဂျပါန် ကေုာံ အမေရိကာန်တံ ကဵုလဝ်သတိရ။

Ref: asb/pd