ညးဒေသပလကဵု လံၚ်လုၚ် (၇)တၠ ဒပ်ပၞာန်ရပ်ဒက်လဝ်

လံၚ်လုၚ်၊ သေပ်တေမ်ဗာ(၂၄)

ရးဒေသဇၞော်တၞၚ်သြဳ၊ ညးဒေသဒၟံၚ်ဍုၚ်ပလကဵု ဍုၚ်လံၚ်လုၚ် (၇) တၠဂှ် နူကဵုဒပ်ကံၚ်ဇြဳပၞာန် ကၠုၚ်ရပ်ဒက်ဏာလဝ် ပ္ဍဲကဵုသ္ၚိဒၟံၚ်ညးတအ် နကဵုဇြဟတ်ပေၚ်ၚ်ရဂှ် ဂွံတီကေတ် အတိုၚ်ကောန်ဍုၚ်တအ် ဟီုသ္ဂးလဝ်ရ။

ဒပ်ကံၚ်ဇြဳပၞာန်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၂) အခိၚ်နူဂယး ၜိုတ် (၆ နာဍဳဂှ် ကၠုၚ်ရပ်ကေတ်ဏာလဝ် ကိုဝ်အောၚ်ကိုဝ်ဝေန်ကဵု ကိုဝ်ဂျဝ်သိုဝ် ဒၟံၚ်အရာပ် (၈) ဍုၚ်လံၚ်လုၚ်တအ်ညးၜါတၠ ပ္ဍဲသ္ၚိဒၟံၚ်ညးတအ်ရ။

တ္ၚဲဂှ် အခိၚ်ဇိုၚ်သဝ်တ္ၚဲဂှ်လေဝ် ဥူနောၚ်မေဝ်၊ ဥထိုဲတုၚ်၊ ကိုဝ်နိုၚ်မေန် ကေုာံ ကိုဝ်လေတ်တအ်ကီု သီုကဵုညးဗြဴမွဲတၠ ထပ်ရပ်ဏာလဝ် ညးဒေသ ဒၟံၚ်ဍုၚ်ပလ (၅) တၠတအ်ပၠန်ရ။

မၞိဟ်ဒပ်ကံၚ်ဇြဳပၞာန်ရပ်ကေတ်ဏာလဝ်တအ်ဂှ် ဒှ်မၞိဟ်သွံဒၟံၚ်ဖျာသာမည အယုက်မၞုံ အကြာဗွိုၚ် ၂၀ ကဵု ၅၀၊ ညးဗ္ဒဗ္ဒာဲ ကေုာံညးကၠောန်ဒၟံၚ်ကမၠောန်ကျပါန်ရဂှ် ညးဒေသတအ် ဟီုရ။

ညးဒေသ ဒပ်ကံၚ်ဇြဳပၞာန်ရပ်ကေတ်ဏာလဝ်တအ်ဂှ် ရပ်ကေတ်ဏာလဝ် နကဵုတၚ်စောတ်စောဲ ဆက်စပ်ကၠောံဍဒၟံၚ်ကဵု ဒပ်စဵုဒၞာညးဍုၚ်ကွာန် PDF တအ်ရ။

ညးရပ်ကေတ်ဏာလဝ်တအ်ဂှ်မ္ဂး ပလံၚ်ဗစိုပ်လဝ် ပ္ဍဲဗဒိုပ်ဗၠာဲသၟိၚ်ဌာနမဆေၚ်စပ် ကေုာံဇရေၚ်ဌာန်စၟဳစၟတ်တုဲ ကဵုဂကောံသ္ၚိကၟိန်အိန်ထံၚ်ညးတအ်လေဝ် ဟွံဂွံအခေါၚ်ဆဵုဂဗရဂှ် ဂွံတီကေတ်နူ ညးဒေသတအ်ရ။

ပ္ဍဲရးဒေသဇၞော်တၞၚ်သြဳဂှ် ပ္ဍဲကဵုမွဲကာလဒပ်ပၞာန်သီအဝဵုဏံ ကောန်အရာပ် ဗ္ဒာဲ ၁၈၀၀ ဒးဒုၚ်ရပ်လဝ်ရဂှ် ဂကောံမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် (AAPP) လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ

စၞောန်ပ္ညုၚ်ဗီု – ဃောထ္ၜးဒၟံၚ်ဆန္ဒ ဒဒှ်ရဒစဵုဒစးကဵုသၞောတ်တၠအဝဵုပၞာန် ပ္ဍဲပွိုၚ်ဍုၚ်လံၚ်လုၚ်