အကြာသဓီုကဵု ၜဳကလေၚ် ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ပရေၚ်ဇီုကပိုက်ချိုတ်လဝ် နွံဂၠိုၚ်မာန်

ၜဳကလေၚ်၊ သေပ်တေမ်ဗာ(၂၄)

တွဵုရးဍုၚ်မန်၊ လ္တူဂၠံၚ်ဂၠံၚ်ကွဳစက် လဂုၚ်- မတ်မလီု အကြာပွိုၚ်ဍုၚ်ၜဳကလေၚ်ကဵု ပွိုၚ်ဍုၚ်သဓီုဂှ် ရေၚ်ယာဉ်ကွဳစက်ကံၚ်ဇြဳပၞာန် ဒးဒုၚ်ဖံက်ခတိုဟ်လဝ်မာၚ်တုဲ လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံဂၠိုၚ်မာန်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၂၁)တုဲကၠုၚ်တေံ အခိၚ်ဇိုၚ်သဝ်တ္ၚဲဂှ် ရေၚ်ယာဉ်ကွဳစက်ကံၚ်ဇြဳပၞာန် ကွဳစက် (၉)ဖ္ဍိုက် နူလ္ပာ်လဂုၚ် ဒဳလုပ်ကၠုၚ် လ္ပာ်ပွိုၚ်ဍုၚ်သဓီုဂှ် ဒပ်ပံၚ်ကောံဒပ်ပၞာန်ဗၠးၜကောန်ဂကူကရေၚ် KNLA၊ PDF တအ် ဂွံလဝ်ပရိုၚ် မၚ်ဒၟံၚ်တုဲ ဗတိုက်လဝ်ရ။

ပ္ဍဲကဵုပရေၚ်ဗတိုက်ဏံ ကွဳစက်ပၞာန်မွဲဖ္ဍိုက် ဒးဒုၚ်ဖံက်ခတိုဟ်လဝ်မာၚ် ဇီုကပိုက် ဒးလီုလာ်လဝ်တုဲ ကောန်ဒပ်ကံၚ်ဇြဳပၞာန် ဗ္ဒာဲ (၂၀)ပြၚ် ဒးချိုတ်လဝ်နွံ မာန်ရဂှ် ညးတာလျိုၚ်ဒပ်ပၠန်ဂတးတုၚ်ငှေတ် (HRS) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ကြဴနူဒးဒုၚ်ဖံက်ခတိုဟ်လဝ်မာၚ်တုဲဂှ် နူလ္ပာ်ကံၚ်ဇြဳပၞာန် ၜိုန်ရကလေၚ်ပန်ပှော်လဝ်ကဵု လွဟ်ဇၞော်ဍောတ်ကီုလေဝ် ဒပ်ပံကောံ ဒပ်ဂကောံဇြဟတ်ပၠန်ဂတးတအ်ဂှ် ဇီုကပိုက်ဒးလဝ်ဟၟဲတုဲ ဆုတ်ကလေၚ်တိတ်မာန်လဝ်ရဂှ် ဟီုလဝ်ရ။

ဒပ်ကံၚ်ဇြဳပၞာန် ဒးဒုၚ်ဗတိုက်လဝ်ဂှ် လပှ်ပ္တိုန်ကေတ် ကောန်ဒပ်ဇီုကပိုက်ဒးချိုတ်အာလဝ်တအ် လ္တူကွဳစက်ပၞာန်တၞဟ်တုဲ ဆက်တိတ်အာ လ္ပာ်သဓီုပၠန်ရဂှ် ဂွံတီကေတ် အတိုၚ်ညးဒေသတအ် ဟီုလဴလဝ်ရ။

ပ္ဍဲတ္ၚဲဂှ်ဟေၚ် ဗ္ဒာဲကွာန်ဒေါက်ယာတ်၊ ပွိုၚ်ဍုၚ်ၜဳကလေၚ် ကောန်ဒပ်ဗၠာဲသၟိၚ် ကၠုၚ်ပလံၚ်ကွဳစက်လိုၚ်ဇြေန်ဟၟဲ မွဲဖ္ဍိုက် ဒးဒုၚ်ပန်လန်လဝ်တုဲ ပါလုပ်သီုသၞာဲဒဴမွဲတၠ ဒးလဝ်ဘဲဝပ် (၂)တၠဏီရ။

တွဵုရးဍုၚ်မန် ပ္ဍဲပွိုၚ်ဍုၚ်သဓီုကဵု ပွိုၚ်ဍုၚ်ၜဳကလေၚ်ဂှ် အကြာဏံမွဲၜါတ္ၚဲ ဒပ်ကံၚ်ဇြဳပၞာန်တအ် ဒးဒုၚ်ဗတိုက်ဒၟံၚ် မွဲခနမွဲခနတုဲ လ္ပာ်ကံၚ်ဇြဳပၞာန်လေဝ် သၠုၚ်ပတိုန်လဝ် ပရေၚ်ဂီုကၠီု ပ္ဍဲဍုၚ်မ္ၚးဍုၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – HRS