ပ္ဍဲပေါဲဗတိုက်ပွိုၚ်မွဲဂိတုဏံ ပ္ဍဲကဵုတိဍာ် KNU လ္ပာ်ကံၚ်ဇြဳပၞာန် ဒးချိုတ်လဝ် ဂၠိုၚ်ကဵုကၠံ

ကဝ်ဒူလေဝ်၊ သေပ်တေမ်ဗာ (၂၄)

ပ္ဍဲကဵုတိဍာ်ဒပ်မဟာ (၆)၊ ခရိုၚ်ဒူပလာယာ ဗော်သွးကောန်ဂကူကရေၚ် KNU ဂှ် ပ္ဍဲကဵုဂိတုအဝ်ဂါတ် တုဲကၠုၚ်ပွိုၚ်မွဲဂိတုဏံ ပေါဲဗတိုက်ၜါလ္ပာ် အပံၚ်လၟိဟ် (၇၀) ဝါ က္တဵုဒှ်လဝ်တုဲ လ္ပာ်ကံၚ်ဇြဳပၞာန် ဒးချိုတ်လဝ်ဂၠိုၚ်ကဵုကၠံရဂှ် ဂွံတီကေတ် အတိုၚ်တၚ်လလောၚ်တြး ဌာနလလောၚ်ပရိုၚ် ခရိုၚ်ဒူပလာယာ KNU ရ။

ဂိတုအဝ်ဂါတ် နူကဵုစၟတ်တ္ၚဲ (၁) စဵုကဵုစၟတ်တ္ၚဲ (၃၁) တုဲကၠုၚ်ဏံဂှ် ပ္ဍဲကဵုတိဍာ်ဒပ်မဟာ (၆) KNU ဂှ် အကြာဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ပၞာန်စဵုဒၞာကောန်ဂကူကရေၚ် KNDO ဒပ်ပံၚ်ကောံဂကောံဇြဟတ်ပၠန်ဂတးတအ်ကဵု ဒပ်ကံၚ်ဇြဳပၞာန်ဂှ် အပံၚ်လၟိဟ်ပေါဲဗတိုက်ဇၞော်ဍောတ် က္တဵုဒှ်လဝ် ဗၞတ် (၇၀) ဝါရ။

ပ္ဍဲကဵုပေါဲဗတိုက် ပွိုၚ်မွဲဂိတုဏံ နူကဵုဒပ်ကံၚ်ဇြဳပၞာန် ညးမၞုံကဆံၚ်ဗိုလ်ဇၞော် (၃)တၠ၊ အကြာပ်ဒပ် မွဲတၠကီု သီုဗၠာဲသၟိၚ်ထိၚ်ရး မၞုံကဆံၚ်အကြာပ်ဒပ်မွဲတၠ ဒးချိုတ်လဝ် (၁၉၁)တၠတုဲ ပါလုပ်သီုသ္ကိုပ်တံဒပ်မွဲတၠ၊ ဒုသ္ကိုပ်တံဒပ်မွဲတၠ ဒးလဝ်ဘဲဝပ် (၁၆၃) တၠရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ပ္ဍဲကဵုပေါဲဗတိုက်တအ်ဂှ် လ္ပာ်ဒပ်ပံၚ်ကောံ KNLA၊ KNDO တအ်ဂှ် ဒးသၠးပူဇဴဏာလဝ်လမျီု သွက်သ္ဂောံက္လိဂွံ ဖေတ်ဒရေဝ်ဒဳမဝ်ကရေဇြဳ (၇) တၠ သၠုၚ်ၚ်ပြဲပြဲတုဲ ဒးလဝ်ဘဲဝပ် (၂၂) တၠရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

သ္အာၚ်နူဂှ်ပၠန် ကွဳစက်ပရေၚ်ပိုၚ်ပြဳကံၚ်ဇြဳပၞာန် သုၚ်စောဲဒၟံၚ် သွက်ပရေၚ်ပလံၚ်ပဗစိုပ်ဆက်စၠောံ ကေုာံယန္တရာပရေၚ်အုပ်ဓုပ် (၉) ဖ္ဍိုက်ဂှ်လေဝ် ဒပ်ပၠန်ဂတးပံၚ်ကောံတအ် ပလီုပလာ်မာန်လဝ်ရဂှ် ဂွံတီကေတ် အတိုၚ်တၚ်လလောၚ်တြးရ။

ထ္ၜးဟိုတ်ကဵုပရေၚ်ဂီုကၠီု ဗဒိုပ်ကံၚ်ဇြဳပၞာန် ကေုာံ တိဍာ် ဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲဒပ်မဟာ (၆) ခရိုၚ်ဒူပလာယာတအ်တုဲ ဒပ်ကံၚ်ဇြဳပၞာန် လောန်ၜက်ချဳဒရာၚ်ကၠုၚ်ပရေၚ်ပၞာန်တအ်ဂှ် ဒပ်ပၠန်ဂတးပံၚ်ကောံ KNLA ၊ KNDO တအ် က္ဍိုက်ဗတိုက်လဝ်၊ အာဗတိုက်လဝ်ကဵုဒရုမ်၊ အောပ်ပန်ပှော်လဝ်ကဵုသနိုက်ဗာ မပ္တံသာ်ဏံ ကၠောန်ရေၚ်တၠုၚ်ဒၟံၚ် အရိုဟ်ဒဒှ်တ္ၚဲရဂှ် လလောၚ်တြးလဝ်ရ။

ဒပ်ကံၚ်ဇြဳပၞာန်ဂှ် လၟိဟ်မၞိဟ်ဇီုကပိုက်ချိုတ် ဒးလဝ်ဘဲဝပ် ဂၠိုၚ်တိုန်ကၠုၚ်ဗက်ဂှ် ကောန်ဒပ်ကံၚ်ဇြဳပၞာန် ပ္ဍဲဗဒိုပ်တအ်လေဝ် ဟိုတ်နူသၞာဲဒဴကဆံၚ်လ္တူတအ် အုပ်ဓုပ်ဍဵုဍိုက်တုဲ စိုတ်ဓာတ်စှ်ေ ဂြိပ်တိတ်နူကဵုဒပ် မအုပ်ဓုပ်ဒၟံၚ်ကဵုအဝဵု ကေုာံပ​ရေၚ်ပ္ကီုပရာပ်ဂှ်တုဲ ကၠုၚ်ပံၚ်တောဲ ဒၟံၚ်ကဵု ဗော်သွးကောန်ဂကူကရေၚ် KNU ကေုာံ ဇရေၚ်ဒပ်ပၠန်ဂတးပံၚ်တောဲတအ်လေဝ် နွံဗွဲမဂၠိုၚ်ရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

သ္ဂံၚ်ကောန်ဒပ်ကံၚ်ဇြဳပၞာန် စ္ဍးဒဴတိတ် နူဗဒိုပ်ပၞာန်တုဲ ကၠုၚ်စိုပ်ပံၚ်တောဲကဵု ဂကောံဇြဟတ်ပၠန်ဂတးတအ် သီုလွဟ်လက်နက်တအ် ဂှ်လေဝ် တုဲတဴကဵုဂကူလွဟ်လက်နက် ပါကၠုၚ်တုဲ ရီုဗၚ်ထံက်ပၚ်ကဵုဒၟံၚ် ဗွဲမကိတ်ညဳကဵု အပိုၚ်ခြာကာလၚုဟ်မးဂှ် ဂွံတီကေတ် အတိုၚ်တၚ်လလောၚ်တြးဂှ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU