လ္တူပရေၚ်ကိုဝ်ရဳယာသၟဝ်ကဵု ရုယှာ ပံၚ်တောဲပ္ကတ်ပကေၚ်ပၞာန်ဂှ် အမေရိကာန်၊ ကိုဝ်ရဳယာသၠုၚ်ကျာ ကေုာံဂျပါတအ်ဒှ်ဓဝိၚ်

သိုဝ်၊ သေပ်တေမ်ဗာ(၂၃)

လ္တူပရေၚ်အကြာကိုဝ်ရဳယာသၟဝ်ကျာကဵု ရုယှာတအ် ပံၚ်တောဲရေၚ်တၠုၚ်ပရေၚ်ပၞာန် ပါလုပ်သီုပရေၚ်သွံရာန်လွဟ်လက်နက်ဂှ် အမေရိကာန်၊ ကိုဝ်ရဳယာသၠုၚ်ကျာ ကေုာံဂျပါန်တအ် ပရေၚ်ဒှ်ဓဝိၚ် သၠုၚ်ဂၠိုၚ်တိုန်ဒၟံၚ်ရ။

လ္တူပရေၚ်ပံၚ်တောဲ ပၞာန်ကိုဝ်ရဳယာသၟဝ်ကျာကဵု ရုယှာတအ်ဂှ် ဝန်ဇၞော်ဍုၚ်သ္အာၚ်အမေရိကာန် ဘလေန်ကာန်၊ ဝန်ဇၞော်ဍုၚ်သ္အာၚ်ကိုဝ်ရဳယာသၠုၚ်ကျာ ပေတ်ဂျေန် ကေုာံဝန်ဇၞော်ဍုၚ်သ္အာၚ်ဂျပါန် ယိုဝ်ကိုဝ်ကာမဳကာဝါတအ် ကၠောန်ဗဒှ်လဝ် ပေါဲသဳကၠဳ ကဆံၚ်လ္တူ ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၂၂) မွဲတန်ရ။

ပ္ဍဲကောံဓရီုဂှ် ဇၟာပ်ကမၠောန်ပြဝ ကၠောန်ရေၚ်တၠုၚ် ဘပဠဒၟံၚ် ပရေၚ်ဂီုကၠီု ဒစဵုဒစးဒၟံၚ်ကဵု တၚ်သ္ဂုတ်သွာတ် ကံၚ်ဇြဳဂီုကၠီုကုလသီုဖအိုတ်ဂှ် သွက်ဂွံကလေၚ်ပလန်အာတဲဗိုန်န် တုပ်လဝ်စိုတ်ညးသ္ကအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးဌာနဝန်ဇၞော်တအ်ရ။

က္ဍိုပ်သ္ကိုပ်ကိုဝ်ရဳယာသၟဝ်ကျာ ကေန်ဂျုၚ်အာန်ဂှ်မ္ဂး အာစိုပ်လဝ်ရုယှာ လအ်လဝ်ပွိုၚ်မွဲသတ္တာဟတုဲ သဳကၠဳလဝ်ကဵု သမ္မတရုယှာ ဗလာဒဳမာပူတေန် အစဳဇန်သွက်ဂွံရေၚ်တၠုၚ်ပံၚ်တောဲအာ ပရေၚ်ပၞာန်ရ။

ပရေၚ်ဆဵုဂဗဏံဂှ် သွက်ဂွံကလေၚ်ထပ်ဗပေၚ် လွဟ်လက်နက်၊ မကမ် အောန်ယအ်စှ်ေလဝ် ပ္ဍဲပေါဲပၞာန်ယူကရုၚ်ဂှ် ရုယှာ တုပ်လဝ်စိုတ် သွက်ဂွံကေတ်နၚ် နူကဵုကိုဝ်ရဳယာသၟဝ်ကျာရ။

ကြဴနူတုပ်လဝ်စိုတ်သာ်ဏံတုဲဂှ် ညးပိုၚ်ပြဳအဝဵုအမေရိကာန်ကဵု ကိုဝ်ရဳယာသၠုၚ်ကျာတအ် ပ္တိုန်ထ္ၜးကၠုၚ်လဝ် ကိစ္စဏံ ပ္ဍဲကဵုပေါဲသဳကၠဳ ကဆံၚ်လ္တူရ။

သွက်ပေါဲပၞာန်ယူကရုၚ်ဂှ် ယဝ်ရကိုဝ်ရဳယာသၟဝ်ကျာ ဂလိုၚ်ပတိုန်ကဵု အစဳဇန်ရီုဗၚ်ကဵုလွဟ် ကုရုယှာမ္ဂး ဒှ်ကၠုၚ်ပရေၚ်ဂၠာဲသၞ အတိုၚ်ပရေၚ်ပၞာန် တိုက်ရိုက်မွဲတုဲ ကိုဝ်ရဳယာသၠုၚ်ကျာ ကေုာံမဟာမိတ်တအ်ဂှ် သွက်ကိစ္စဏံ ဒုၚ်အာတဲဟွံသေၚ်ရဂှ် သမ္မတကိုဝ်ရဳယာသၠုၚ်ကျာ ယွောန်ဇြောန်ယိုဝ် ဟီုလဝ် ပ္ဍဲကဵုတ္ၚဲဗုဒ္ဓဝါဂှ်ရ။

Ref: Reuters/kg