ပ္ဍဲကဵုဍုၚ်ကျာ်ပိ ပရေၚ်အုပ်ဓုပ် KNU စဒၟံၚ်ဂှ် ဒပ်ပၞာန်ထ္ၜးရုပ်ရဴ

ကျာ်ပိ၊ သေပ်တေမ်ဗာ (၂၄)

ကြဴနူပရိုၚ် ကမၠောန်ပရေၚ်အုပ်ဓုပ် ဗော်သွးကောန်ဂကူကရေၚ် KNU ပ္ဍဲဍုၚ်ကျာ်ပိ၊ တွဵုရးကရေၚ် စထ္မံက်ဒၟံၚ်ရုပ်ရဴတံ မံက်တိတ်ကၠုၚ် အဆက်က်တုဲဂှ် ဒပ်ကံၚ်ဇြဳပၞာန်ဝွံ တိတ်ကၠုၚ်နူကဵုအပ္ဍဲဒပ်တုဲ ဂေတ်ဂေၚ်စၟဳတ်လဝ် အပ္ဍဲဍုၚ်ဂှ် ဂွံတီကေတ် အတိုၚ်တၚ်လလောၚ်တြး ညးဒေသတံရ။

ပ္ဍဲကဵုဍုၚ်ကျာ်ပိ မၞုံပယျဵုသေံ−ဗၟာ၊ ပွိုၚ်ဍုၚ်လှာဒကှ် တွဵုရးကရေၚ်ဂှ် လၟေၚ်ကမၠောန်ယန္တယာပရေၚ်အုပ်ဓုပ် ကံၚ်ဇြဳပၞာန်တံ လီုလာ်အာတုဲဂှ် ပ္ဍဲကဵုပရေၚ်အုပ်ဓုပ် မၞုံအပ္ဍဲဍုၚ်တံကဵု ကမၠောန်စဳရေၚ်သၞောဝ်ဓဝ်တံဂှ် KNU ကၠောန်ၜိုတ်ဒၟံၚ်ရ။

ကြဴနူပရိုၚ် KNU တံ ရေၚ်တၠုၚ်ဒၟံၚ် ကမၠောန်ပရေၚ်အုပ်ဓုပ်တံ မံက်တိတ်ကၠုၚ်အဆက်က်တုဲဂှ် ဒပ်ကံၚ်ဇြဳပၞာန် ဂေတ်ဂေၚ်စၟဳတ်လဝ် ဍုၚ်ကျာ်ပိ နကဵုလွဟ်လက်နက်ပေၚ်ၚ်ရ။

ဒပ်ကံၚ်ဇြဳပၞာန်၊ ဒပ်မၚ်ပယျဵု BGF ကေုာံ ဂကောံဒပ်ဗၠာဲသၟိၚ်တံဝွံ ပ္ဍဲဂိတုသေပ်တေမ်ဗာ (၂၁) တေံ ကၠောန်လဝ်ပရေၚ်စၟဳတ် အပ္ဍဲဍုၚ်ကျာ်ပိတံတုဲ ဆက်ဂေတ်ဂြိပ်ဒၟံၚ် အတိုၚ်စက်ယန္တယာပရေၚ်အုပ်ဓုပ် ကံၚ်ဇြဳပၞာန်တံရောၚ်ဂှ် ညးထံက်ဂလာန်ကံၚ်ဇြဳပၞာန်တံ တြးလဝ်ဝါဒရ။

ဒပ်ကံၚ်ဇြဳပၞာန်ဝွံ နူကဵုတမ်ဒပ် ပ္ဍဲဍုၚ်ကျာ်ပိဂှ် ဟွံတိတ်မ္ၚး လအ်ကဵုဂိတုယျဂှ်ကီု၊ လၟေၚ်ဒဒှ်လၟုဟ်ဝွံ ဟိုတ်နူပရိုၚ် ပရေၚ်အုပ်ဓုပ် KNU စဒၟံၚ်ယျတံဂှ်တုဲ နူကဵုဒပ်ကံၚ်ဇြဳပၞာန်ဂှ် စၟဳတ်ရေၚ်တၠုၚ်လဝ် နကဵုလွဟ်လက်နက်ပေၚ်ၚ်ရောၚ်ဂှ် ညးဒေသမွဲတၠ ဟီုရ။

“ဍေံတံ (စကစ) မွဲလှ်ေမှ ဟွံတိတ်နူအပ္ဍဲဒပ်ဂှ် လအ်ဒၟံၚ်ယျ။ ကြဴနူပရိုၚ်တံဏံ မံက်တိတ်ကၠုၚ်တုဲဂှ် တိတ်ထ္ၜးရုပ်ရဴ အပ္ဍဲဍုၚ်တုဲ စၟဳတ်ဒၟံၚ်ဒှ်ဂွံရ။ လ္တူဍုၚ်ဂှ်တှ်ေ သ္ကိုပ်အုပ်ဓုပ်ကံၚ်ဇြဳပၞာန်ခါန်ကၞက်တံဂှ် ဟွံမွဲရပုဟ်။ သ္ကိုပ်အုပ်ဓုပ် KNU တံ ခါန်ကၞက်လဝ်ဂှ်ရ နွံ။ ဒှ်ကၠုၚ်အမှုအရာမ္ဂးတှ်ေ အာတေၚ်ဒၟံၚ် ဇရေၚ် KNU သၟးရ” ဂှ် ညးဒေသမွဲတၠ ဟီုရ။

ဂကောံဒပ်ပံၚ်ကောံ KNLA တံ ကြဴနူလုပ်စိုပ်ဗ္တိုက် ဗ္ဒိုပ်ဗၠာဲသၟိၚ် ကေုာံ ရုၚ်ဌာနမဆေၚ်စပ် ကံၚ်ဇြဳပၞာန် လ္တူဍုၚ်ကျာ်ပိ ပ္ဍဲဂိတုဂျာန္နဝါရဳ ကေုာံ ဂိတုဖေဖဝ်ဝါရဳတေံတုဲဂှ် စက်ယန္တယာပရေၚ်အုပ်ဓုပ် ကံၚ်ဇြဳပၞာန် မၞုံအပ္ဍဲဍုၚ်တံ ဂေတ်ဂြိပ်ဟွံမာန်ရတုဲ KNU ဂှ် ကၠောန်ကၠုၚ်လဝ် ပရေၚ်အုပ်ဓုပ်၊ ပရေၚ်စဳရေၚ်သၞောဝ်ဓဝ်တံရ။

အတိုၚ်ဂလာန်ညးသ္ၚဳဂၠိပ်တံဂှ်မ္ဂး ဒပ်ကံၚ်ဇြဳပၞာန် တိတ်မ္ၚးဒပ်တုဲ ကၠောန်ၜိုတ်ကၠုၚ် ပရေၚ်ပြုပြေၚ်ပၞာန် အပ္ဍဲဍုၚ်ဂှ်ဝွံ ဒှ်ဟိုတ်နူဇြဟတ်ဂရိုဟ်လ္တူတေံလေဝ်မာန်တုဲ သွက်ဂွံကၠောန်သာ်ဏံဂှ် ဒးပ္ညဳပ္ညပ်လဝ်ကဵု ဂကောံရပ်လွဟ်ဂမၠိုၚ် ပါလုပ်သီုကဵု KNU တံမာန်ရောၚ်ဂှ် သ္ဂးရ။

ပ္ဍဲကဵုဍုၚ်ကျာ်ပိဂှ် ဒပ်ပၞာန်ဗၠးၜးကောန်ဂကူကရေၚ် KNLA မဒှ်ဒပ်ရပ်လွဟ် KNU ဂှ်ကီု၊ ဒပ်ကံၚ်ဇြဳပၞာန်၊ ဒပ်မၚ်ပယျဵု (BGF) ကေုာံ ဗော်ဍုၚ်မန်တၟိ (NMSP) ၊ ဒပ်ပၞာန်ဒတုဲဖဵုဒဳမဝ်ကရေဇြဳ (DKBA) ၊ ဒပ်ကံၚ်ဇြဳဂီုကၠီုကရေၚ် (KNU/KNLA PC) မထ္ပက်လဝ်စၟတ်တဲ NCA တုဲ အာစိုပ်ဆဵုဂဗလဝ်ကဵု ကံၚ်ဇြဳပၞာန် ဂၠိုၚ်ၚ်ကဵုဝါတံလေဝ် နွံဒၟံၚ်ကီုရ။

ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳဂှ် ပ္ဍဲကဵုဍုၚ်ကျာ်ပိဂှ် ယန္တယာအုပ်ဓုပ်ကံၚ်ဇြဳပၞာန်တံ လီုလာ်ဆုတ်ယုတ်ကၠုၚ်တုဲ ဟိုတ်နူပရေၚ်ကၠတ်ဂၠံက်ပၠံၚ်ၜးတံ ဂၠိုၚ်ကၠုၚ်ဂှ်ရ နကဵုတၚ်အာတ်မိက် ညးဍုၚ်ကွာန်တံတုဲ အခိၚ်လၟုဟ် KNU ရေၚ်တၠုၚ်ဒၟံၚ် ပရေၚ်စဳရေၚ်သၞောဝ်ဓဝ်၊ ပရေၚ်အုပ်ဓုပ်တံရောၚ်ဂှ် ဟီုဂးလဝ်ရ။

လ္တူဍုၚ်ကျာ်ပိလၟုဟ်ဂှ် တမ်ဒပ်ကံၚ်ဇြဳပၞာန် (၁) ဒပ်ကဵု ဗ္ဒိုပ်ဗၠာဲသၟိၚ်မွဲ နွံတုဲ ပ္ဍဲကဵုသၞေဟ်ကၚ်ဗ္ဒိုပ်လုပ်ဍုၚ်ဂှ် BGF ကေုာံ DKBA ၊ ပ္ဍဲကဵုသၞေဟ်ကၚ် လ္တူပၞောန်ပယျဵုသေံ−ဗၟာဂှ် ဒပ်ကံၚ်ဇြဳပၞာန်ကဵု ဒပ် BGF တံ ဖျေံလဝ်ဒပ်တုဲ မ္ၚးနူကဵုဒပ်ပၞာန်ဗၠးၜးကောန်ဂကူကရေၚ် KNLA ဂှ် ဂကောံရပ်လွဟ်တၞဟ်ဟ်တံလေဝ် အာကၠုၚ်ချဳဒရာၚ်ဒၟံၚ်ကီုရ။

ပရိုၚ်−သြၚ်လောန်တိုၚ်(မ်)

ဗီု−Social Media