နေဗျဳဒဝ်၊ သေပ်တေမ်ဗာ (၂၄)
ကံၚ်ဇြဳပၞာန် ၜိုန်ရလလောၚ်ပ္တိတ်လဝ် ဒၞါဲညးအာတရဴ အပ္ဍဲဍုၚ်၊ မ္ၚးဍုၚ်တံ အာစိုပ်ဂေတ်ဝေၚ်ထေက် ပ္ဍဲကဵုဍုၚ်ဗၟာ (၁၄) ဒၞါဲဂှ်ကီုလေဝ် ဟိုတ်နူအကာဲအရာပရေၚ်ဂီုကၠီုလၟုဟ်တုဲ နတဲဏံ ဒှ်ဟွံမာန်ဏီပုဟ်ဂှ် ရဲစၞောန်ထ္ၜးဂၠံၚ်ကၟုဲအာတရဴတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဌာနဝန်ဇၞော်အာတရဴ ကေုာံ ဟဝ်တေဝ်ကံၚ်ဇြဳပၞာန်ဂှ် ပ္ဍဲကဵုရာသဳဗြဲကျာတၟးဏံ ဒၞါဲကၟုဲအာတရဴအပ္ဍဲဍုၚ်၊ မ္ၚးဍုၚ်တံ ထေက်ကဵုဂေတ်ဝေၚ် (၁၄) ဒၞါဲဂှ် လလောၚ်ပ္တိတ်ကၠုၚ် ပ္ဍဲကဵုဂိတုသေပ်တေမ်ဗာ (၂၁) တေံရ။
ပ္ဍဲကဵုဒၞါဲ (၁၄) ဒၞါဲ ကံၚ်ဇြဳပၞာန် မစၟတ်လဝ်ဂှ် နေဗျဳဒဝ်၊ လ္ဂုၚ်၊ မာန္တလေဝ်၊ ဗကာံ၊ ၚိုဲသံၚ်၊ ချံၚ်တာ၊ ၚပလဳ၊ ပျေန်ဥူလွေန်၊ အေန်လေဝ်၊ ကလဝ်၊ ဒံၚ်ကျဳ၊ ကျံက်ဖျူ၊ မာန်အံၚ်၊ ပူတာအိုဝ် ကေုာံ ကအ်သံၚ်တံ ပါလုပ်ရ။
နကဵုညးအာတရဴဂမၠိုၚ် ယဝ်ရအာကၠုၚ် ပ္ဍဲဒေသတံဏံမ္ဂး ဂွံဆဵုကေတ် ကျာ်စေတဳပြာကတ်တဴပ္ဍဲဝၚ်ဂမၠိုၚ် မဒှ်အာဲကၟာဲယေန်သၞာၚ်တမၠာတံဂှ်ဏောၚ်တုဲ ဂွံလ္ၚတ်ကေတ် စမြိုၚ်တြေံတြေံဂမၠိုၚ်၊ ယေန်သၞာၚ်အခိုက်ကၞာကောန်ဍုၚ်အရၚ်ဂမၠိုၚ်၊ ရာသဳဥတုသာသာယာယာတံ ကေုာံ ဂွံလ္ၚတ် သဘာဝတိဍာ်ဒဵုဂြိုပ်တံမာန်ရောၚ် စၞောန်လဝ်ရ။
ညးစၞောန်ထ္ၜးဂၠံၚ် ကၟုဲအာတရဴမွဲတၠဂှ် ၜိုန်ရလ္ပာ်ကံၚ်ဇြဳပၞာန်တံ ထ္မံက်ပ္တိတ်ဒၟံၚ် လၟေၚ်တရဴတံကီုလေဝ် ဟိုတ်နူပတေၚ်ဂြတ်လဝ် ပရေၚ်စၟဳတ် ပ္ဍဲဂၠံၚ်တံဂှ်ကီု၊ ကၟာတ်ဒဒန်ပြဟ်ဂှ်ကီု ကေုာံ ဟိုတ်နူအကာဲအရာပရေၚ်ဂီုကၠီုတံတုဲ အခက်အခုဲနွံဒၟံၚ်ရောၚ် ဟီုရ။
“ဍာံဍာံဂှ် လ္ပာ်ဍေံတံ စၟတ်တုဲ ဆ္ဂး လ္ပာ်ပိုယ်တံဂှ် ဂွံအာကၠုၚ် အခက်အခုဲနွံဒၟံၚ်။ ဂွံအာကၠုၚ်ဂှ် ဟွံပြေပြံၚ်ဏီပုဟ်။ မဂၞန်(၁) ဂှ်တှ်ေ ညးလဵုမွဲဒှ်ဒှ် အာတရဴမ္ဂး မိက်ဂွံကဵုအာ ဗၠးဗၠးၜးၜးရ။ ပ္ဍဲကဵုဂၠံၚ်တံဂှ် စနူကဵုအခက်အခုဲ၊ ဒးဒုၚ်စၟဳတ်၊ စၟဳတ်ဖုၚ်တံဂှ် ပိုယ်တံ ဒးဂဗဒၟံၚ် တၟာဂလိုၚ်ရ။ ဗွဲကြဴဏံ ကၟာတ်ကၠုၚ်ဒဒန်တံ ပြဟ်ကၠုၚ်ရ။ ၜိုတ် (၇) နာဍဳ ကၟာတ်ထောံဒဒန်တံယျဟီုတှ်ေ ဥပမာ အာတရဴမွဲယျဟီုတှ်ေ လ္ပာ်စဴ ဂွံကလေၚ်လုပ်ပၠန်ဟီုဂှ် က္တဵုဒှ်အခက်အခုဲတၟာဂလိုၚ်ရ။ ဒးလုပ်ကေတ်အတေၚ်တှ်ေ ဂွံဂေတ်ဝေၚ်ဂှ် ဟွံမိပ်သၠောၚ်ရပုဟ်။ လ္ပာ်ဂီုကၠီုဂှ်တှ်ေ ညိညဓဝ်ရ ဂွံဒၟံၚ်။ ဒၞါဲပိုယ်တံ မိက်ဂွံအာတံဂှ် အာဂေတ်ဝေၚ်ပေၚ်ၚ် ဟွံဂွံပုဟ်။ ဒးကလၚ်ဒၟံၚ်ဗရုရမျာၚ်တံတုဲ ယဝ်ရဒှ်အကာဲအရာဓမ္မတာမှ ပိုယ်တံ ပလံၚ်ကဵုဂွံ။ ထ္မံက်ဒၟံၚ်ရုပ်ရဴဂှ် ထ္မံက်ဒၟံၚ်ရ။ ဆ္ဂး နတဲဏံဂှ် ၜိုတ်ညိညရ အာကၠုၚ်ဂွံဒၟံၚ်” သာ်ဝွံ သ္ဂးရ။
သ္အာၚ်နူဂှ်ပၠန် သွာၚ်အာရဴဝွံ စွံအဓိကကဵု ဂၠံၚ်တရဴကွဳစက်တံသၟးတုဲ ဒးအာကၠုၚ်ဒၟံၚ်ဂှ်ရ ဟိုတ်နူပေါဲဗ္တိုက် မက္တဵုဒှ်ဒၟံၚ် ဒၞါဲပြးဇးတံဂှ်တုဲ ဂီုကၠီုတရဴတံ ဟွံမွဲဂှ်ရ လၟေၚ်တရဴ ကံၚ်ဇြဳပၞာန် မထ္မံက်ဒၟံၚ်ရုပ်ရဴတံဂှ်ဟီုမ္ဂး ဟွံစှ်ေကဵုနတဲပုဟ်ဂှ် ညးဆက်ဟီုရ။
ညးအာတရဴဂမၠိုၚ်ဝွံ ဟိုတ်နူအမိၚ်တိတ်ဗ္တံဟွံဂွံ ကံၚ်ဇြဳပၞာန် မသၞောတ်ဗ္ၜတ်လဝ်ဂှ်ကီု၊ တၚ်မ္ဒးတေၚ် စရၚ်ကၟုဲတံဂှ်ကီု ပါလုပ်သီုကဵု တၚ်သၞောတ်ဗ္ၜတ်တၞဟ်ဟ်တံဂှ်လေဝ် ဟိုတ်နူဟွံဖအောန်ဖျေံကဵုလဝ်ဂှ်ရ လၟိဟ်ညးအာတရဴကၠုၚ်စိုပ်တံ စှ်ေဒၟံၚ်အဆက်က်ရောၚ် တၠကမၠောန်အာတရဴတံ သ္ဂးအိုတ်ရ။
ဌာနဝန်ဇၞော်အာတရဴ ကေုာံ ဟဝ်တေဝ် ကံၚ်ဇြဳပၞာန်ဂှ်ဝွံ လ္တူဂကောံဍုၚ်ပလိုတ်ဂမၠိုၚ် သီုကဵုအမေရိကာန်တံ မလလောၚ်တြးလဝ် ဒဒှ်ရအာတရဴ ဍုၚ်ဗၟာဟွံထေက်ဂှ် ကလေၚ်လလောၚ်ပ္တိတ်ကၠုၚ် နဒဒှ်ဒၞါဲအာစိုပ်ဂေတ်ဝေၚ်ထေက်တံရောၚ် မဒှ်ရ။
ဌာနကာဍုၚ်သ္အာၚ်ဗျိတိၚ်ဂှ် နကဵုကောန်ဍုၚ်ညးတံဂမၠိုၚ် သွက်ဟွံဂွံအာတရဴ ပ္ဍဲကဵုတွဵုရးမန်၊ ကချေၚ်၊ ချေၚ်၊ ကယျာ၊ ကရေၚ်၊ သ္ကုတ်သၟဝ်ကျာတွဵုရးရခေၚ်၊ ရးသက်ကိုၚ်၊ ရးမဂွဵု ကေုာံ ရးတၞၚ်သဳတံအိုတ်ဂှ် ပ္ဍဲဂိတုသေပ်တေမ်ဗာ (၁၈) တေံ ကဵုလဝ်သတိရ။
ကဏ္ဍအာတရဴဍုၚ်ဗၟာ မကော်ခဴစ ရုၚ်စက်ယက်ဟွံတိတ်ဂှ်ဝွံ ဟိုတ်နူပဋိပက္ခရပ်လွဟ် မက္တဵုဒှ်ကၠုၚ် ဟိုတ်နူပရေၚ်သီအဝဵုဂှ်တုဲ ဒးဆေၚ်ဒၟံၚ်မုက် ကုပရေၚ်ဆုတ်ယောၚ်ဟောံဗြံစှ်ေကၠုၚ် ပရေံအိုတ်တုဲ ကမၠောန်အာတရဴဗွဲမဂၠိုၚ် ကျတုဲ ဒေါအ်ကၠုၚ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−TLT
sanlontai