နေဗျဳဒဝ်၊ သေပ်တေမ်ဗာ(၂၄)
သြန်လုပ်ဍုၚ်သ္အာၚ် ကောန်ကလောန်ဍုၚ်ဗၟာစိုပ်ဍုၚ်သ္အာၚ်တံဂှ် သ္ပပ္တံနူဂိတုအံက်တဝ်ဗာတုဲ ဒးကဵုအကံက်ခေါန်သြန်လုပ် ၁၀ တၟံကၠံရောၚ် နကဵုစၟတ်တဲ က္ဍိုပ်သ္ကိုပ်ပၞာန်သီအဝဵုဂှ် လလောၚ်တြးလဝ် နူကဵုလိက်ပရိုၚ်ကၟိန်ဍုၚ်ပိုၚ် ပ္တိတ်လဝ်ပ္ဍဲဂိတုသေပ်တေမ်ဗာ စၟတ်တ္ၚဲ (၂၃)ဂှ်ရ။
နဒဒှ်ဥပဒေပလေဝ်ပလေတ် ဥပဒေအကံက်ခေါန်ကၟိန်ဍုၚ် မလေပ်စၞောန်ပျးတဴ မွဲသၞာံမွဲအလန်ဂှ် ကံၚ်ဇြဳပၞာန်တံ စၞောန်ပျးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၂)ဂှ်တုဲ သ္ပပ္တံနူ ဂိတုအံက်တဝ်ဗာသၞာံဏံ စဵုကဵုဂိတုမာတ်(ချ်) သၞာံဂတတေံဂှ် လမျီုလုပ်အာရောၚ်ဂှ် သ္ဂးရ။
ပ္ဍဲသၞောဝ်ဥပဒေအကံက်အခေါန် ကံၚ်ဇြဳပၞာန်ပလေဝ်ပလေတ်လဝ်ဂှ်တှ်ေ ဟွံနုက်ပ္တိတ် အခေါၚ်သက်သာတံမွဲသာ် မ္ၚးနူသြန်ဂိတုဂှ် ဒးကဵုအာအခေါန်သြန်လုပ် နကဵုသြန်ဍုၚ်သ္အာၚ် ကောန်ဍုၚ်ဒၟံၚ်ဍုၚ်သ္အာၚ်က္လိဂွံတံ ၁၀ တၟံကၠံရောၚ်ဂှ် ထ္မံက်ထ္ၜးလဝ်ရ။
ဥူအံၚ်ကျဝ် ညးကဵုကသပ် ဇာဇၞိက်အခေါၚ်အရာကောန်ကလောန်ဆုဲပြံၚ်ဂှ် ပရေၚ်အုပ်ဓုပ်ကောပ်ကာဲ ဗၠေတ်မှာတုဲ အခက်အခုဲအကြေပ်ဂြတ်တံ ဂၠိုၚ်ကၠုၚ်ဂှ်ရ နကဵုနဲဒှ်မာန်တံဂှ် ကံၚ်ဇြဳပၞာန်တံ ဂ္စာန်မံၚ် သွက်ဂွံရေက်ကးပ္တိတ်ပရဲ ကုစရိတ်ကမၠောန် နူဇရၚ်ကောန်ကလောန်ဆုဲပြံၚ်ဍုၚ်ဗၟာတံရောၚ်ဂှ် သ္ၚဳဂၠိပ်လဝ်ရ။
“ပလေဝ်ပလေတ်မံၚ် သွက်ဂွံကေတ် စရိတ်ကမၠောန် နူဇရေၚ်ကောန်ကလောန်ဆုဲပြံၚ် စိုပ်ဍုၚ်သ္အာၚ်တံဂှ် အတိုၚ်ပိုဲတံညးဖအိုတ်တီလဝ်တုဲဂှ်ရ။ ပ္ဍဲကၟိန်ဍုၚ်ဂှ် ပရေၚ်အုပ်ဓုပ်ကောပ်ကာဲတံ ဒှ်ကၠုၚ်ဗၠေတ်တ်မှာမှာတုဲ အခိၚ်အကြေပ်အဂြတ်ကၟိန်ဍုၚ် ဂၠိုၚ်တိုန်ကၠုၚ်ဂှ် ဂ္စာန်မံၚ် သွက်ဂွံရေက်ကးပ္တိတ်ပရဲ နူဇရေၚ် ကောန်ကလောန်ဆုဲပြံၚ် အာစိုပ်ကၠောန်မံၚ်ကမၠောန် ပ္ဍဲဍုၚ်သ္အာၚ် နကဵုဂၠံၚ်တရဴမဂဗတံရဂှ် အဲသ္ၚဳဂၠိပ်ရ” သာ်ဝွံ ညးသ္ဂးရ။
ပ္ဍဲဥပဒေပလေဝ်ပလေတ်လဝ်ဂှ် ဥပဒေအကံက်အခေါန်ကၟိန်ဍုၚ် သၞာံ ၂၀၂၃ ၝောံပိုဒ်(၃၁)၊ ၝောံပိုဒ်ပါ်(က)၊ ၝောံပိုဒ်ပါ်ဍောတ်(၄)ဂှ် ပလီုထောံလဝ်ရ။ ပ္ဍဲတၚ်စၞောန်ပျး ၝောံပိုဒ်ဥပဒေ ပလီုလဝ်ဏံပါတံဂှ်တှ်ေ သြန်လုပ်နူကဵုက္ဍိုပ်သြန်ဂိတု ကောန်ဍုၚ်နွံပ္ဍဲဍုၚ်သ္အာၚ်တံ ဂွံနၚ်နကဵုသြန်ဍုၚ်သ္အာၚ် ပ္ဍဲဍုၚ်သ္အာၚ်တံဂှ် ကဵုအခေါၚ်ဗၠးနူ အခေါန်သြန်လုပ်တံမဒှ်ရ။
သ္အာၚ်နူဂှ်ပၠန် ပ္ဍဲဥပဒေ ပလေဝ်ပလေတ်လဝ်ဂှ် နုက်ပ္တိတ်ထောံ အခေါၚ်သက်သာတံတုဲမ္ဂး နကဵုနှေန်အကံက်ခေါန် ပါလုပ် ပ္ဍဲဥပဒေအကံက်အခေါန် ၝောံပိုဒ် ၁၉၊ ၝောံပိုဒ်ပါ် (၈)ဂှ် ကံက်အာ အတိုၚ်အကံက်အခေါန်သြန်လုပ်ပ္ဍဲဍုၚ်တံတုဲ ဟွံနုက်ပ္တိတ် အခေါၚ်သက်သာတံမ္ဂး တၟော်ကဵု ၂ တၟံကၠံတုဲ ကံက်အာအခေါန်ရောၚ်ဂှ် ကံၚ်ဇြဳပၞာန် သ္ဂးရ။
ညးဗြဴကောန်ကလောန်ဆုဲပြံၚ် စိုပ်ဍုၚ်သ္အာၚ်မွဲတၠဂှ်တှ်ေ ဟွံဒေါံဟွံဂွံ ဒးကဵုအကံက်ခေါန်သြန်လုပ်မ္ဂးတှ်ေ နကဵုနဲကဲတၞဟ်သ္အာၚ်တံဂှ် ပလံၚ်သြန်ပ္ဍဲသ္ၚိတံရောၚ်မဒှ်တုဲ သွက်ဂွံကဵုအကံက်သြန်လုပ် ဟၟဲလးလးရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ယဝ်ရ ဍေံတံထပိုတ်အခေါန်သြန်လုပ်မ္ဂး တေံနူကဵုဍေံတံစသီအဝဵုတေံရ အရာပလံၚ်သြန်ဟွံဂွံတံ နွံမံၚ်လေဝ်။ အေပ္ဍဲအခိၚ်ဂှ်ဂှ် ဟွံဒှ်ညံၚ်သ္ဂောံဒှ် ညံၚ်သ္ဂောံဂွံဂှ် ပလံၚ်ကၠုၚ်လဝ်ညးသ္ကအ်အိုတ်ဏီရ။ လၟုဟ်လေဝ် ပိုဲတံ ဓလေတ်ဂွံမာန်မံၚ်ဏီတှ်ေ ဓလေတ်တုဲတှ်ေ ဟွံစုတ်လးလးရ။ ဟွံဒေါံဟွံဂွံ ဒးစုတ်ဟေၚ်ဏောၚ်ဟီုတှ်ေ ဇၟာပ်မၞိဟ်ဂှ် ဒးပလံၚ်မံၚ်သြန်ပ္ဍဲသ္ၚိတံ လၟေၚ်ဂိတုရ။ ဟီုဂှ်တှ်ေ ပ္ဍဲပိုဲဂှ်လေဝ် နဲကဲတၞဟ်သ္အာၚ်တံ နွံပၠန်ရ။ အစဳဇန်ဂွံကဵုဂှ် ဟွံမွဲလးလးရ။ ဟွံမွဲလးလးရ” သာ်ဝွံ ညးသ္ဂးရ။
ပ္ဍဲဂိတုဏံလ္ပာ်မံက်ဂှ်လေဝ် သြန်ဂိတုကောန်ကလောန်ဆုဲပြံၚ်ဍုၚ်ဗၟာ စိုပ်ဍုၚ်သ္အာၚ်တံ ၂၅တၟံကၠံ ပလံၚ်ဗ္စိုပ်ဇရေၚ်ဂကောံသ္ၚိကၟိန်တံဂှ် ဟွံဒေါံဟွံဂွံ သ္ဒးသၠဲပြံၚ်နူကဵု တိုက်သြန်လုပ်သၞောဝ်တံရောၚ်ဂှ် စၞောန်ပ္ညုၚ်လဝ်ရ။
နကဵုညးတိတ်ကၠောန်ကမၠောန်ဍုၚ်သ္အာၚ်တံဂှ် သြန်ဂိတုဍေံတံ ၂၅ တၟံကၠံဂှ် မွဲဂိတုမွဲအလန် ဟွံသေၚ်မ္ဂး ပိဂိတုမွဲအလန် ဟွံဒေါံဟွံဂွံ သ္ဒးသၠဲပြံၚ်ကဵုရောၚ်တုဲ အကြာအေဂျေန်ဇြဳတံကဵု ကောန်ကလောန်တံဂှ် ဒဒှ်ရတုပ်စိုတ်ကုတၚ်ဏံဂှ် နွံပၟိက်သ္ဒးချုက်လိက်ကသုက်ရောၚ်ဂှ် သ္ဂးရ။
ညးရီုဗၚ်ကဵုမံၚ် ပရေၚ်ကောန်ကလောန်ဆုဲပြံၚ်တံကဵု ကောန်ကလောန်ဆုဲပြံၚ်တံဂှ်တှ်ေ နကဵုကံၚ်ဇြဳပၞာန် ကံက်အခေါန်ဗီုလၟုဟ်၊ တၚ်စၞောန်ပျး ကံၚ်ဇြဳပၞာန် ဟွံဒေါံဟွံဂွံ ဒးပၠောပ်စရိတ်ကလောန် ပ္ဍဲဒၞါဲမစၟတ်လဝ်တံဂှ် ဇြောတ်မံၚ်ဆီကအ် ကောန်ကလောန်ဆုဲပြံၚ် ဂၠိုၚ်ကဵုပြကောဋိကိုတ်တံရောၚ်ဂှ် ထံက်ထ္ၜးလဝ်အိုတ်ရ။
လောန်ကၠုၚ် အပ္ဍဲမွဲသတ္တာဟပြၚ်တေံဂှ်လေဝ် ဟိုတ်နူကောန်ဂကောံကံၚ်ဇြဳပၞာန်တံ မၚ်ရံၚ်ဂၠိုက်ဂၠါဲမံၚ် ညးကၠောန်ကမၠောန်သၠဲပြံၚ်သြန်ဍုၚ်သ္အာၚ် နွံပ္ဍဲတွဵုရးဍုၚ်မန်တံ အဆက်က်ဂှ်ရ ညးကၠောန်ကမၠောန်သၠဲပြံၚ်သြန် မၞုံပ္ဍဲ ပွိုၚ်ဍုၚ်ပိပွိုၚ်ဍုၚ်တံ ဟွံအောန်နူကဵု (၅)တၠ ဒးဒုၚ်ရပ်ဒက်လဝ် မဒှ်ရ။
ပရိုၚ်-သြၚ်လောန်တိုၚ်မ်
ဗီု-Twitter
sanlontai