သ္ကိုပ်ဝန်ဇၞော်ဗျိတုၚ် စဳဇန် သွက်ဂွံတာဒၞါ ပွမသုၚ်ၜံက်

ဗျိတိၚ်၊ သေပ်တေမ်ဗာ (၂၄)

သ္ကိုပ်ဝန်ဇၞော်ဗျိၚ်တုၚ် ရဳယှဳသူနက်ဝွံ ညံၚ်တၞောဝ်ဒတောဝ်အနာဂတ်တံ ရာန်ၜံက်ဟွံဂွံ သွက်ဂွံဖျေံစၟတ်အာ အစဳဇန်တာဒၞါတံဂှ် စဳဇန်ဒၟံၚ်ရောၚ် နိဿဲကေတ် တမ်ရိုဟ်ပရိုၚ်အလဵုအသဳတုဲ လိက်ပရိုၚ် The Guardian ထ္မံက်ထ္ၜးလဝ် ပ္ဍဲဂိတုသေပ်တေမ်ဗာ ၂၂ တေံရ။

ဒဒှ်ရသောန်နက် လ္ၚတ်ဒၟံၚ် ကိုန်အစဳဇန် မဗ္တိုက်ပလီု ပွမသုၚ်ၜံက် လအာတုပ်ကဵု သၞောဝ်မစၞောန်ပျးလဝ် ပ္ဍဲနျူဇြဳလာန် သၞာံတုဲတေံဂှ် ထ္မံက်ထ္ၜးစုတ်လဝ်ကီုရ။

ပ္ဍဲကဵုသၞောဝ်ဏံဂှ် ပရေၚ်တာဒၞါ ပွမသွံတြးကဵုၜံက် ကုညးမက္တဵုဒှ်မၞိဟ် ကြဴနူသၞာံ ၂၀၀၉ ဂိတုဂျာန္နဝါရဳ ၁ တံဂှ်ကီု ကိုန်အစဳဇန် ဗ္တိုက်ပလီု ပရေၚ်သုၚ်ၜံက်တံလေဝ် ပါလုပ်ဒၟံၚ်ရ။

“အခိၚ်လၟုဟ် သွက်ဂွံဖအောန်ဖျေံ ဒမြိပ်သုၚ်ၜံက်တံဂှ် စဒၟံၚ်ယျ။ ဟိုတ်ဂှ်ရ တၚ်ရန်တၟံပိုယ် ပ္ဍဲသၞာံ ၂၀၃၀ တေံ ညံၚ်ၜံက်ဟွံဂွံမွဲ ဂွံစိုပ်ဂှ် မိက်ဂွံဖ္တိုက်ဖ္အောဝ် မၞိဟ်ဂမၠိုၚ် သွက်ဂွံထပိုတ်ၜံက်ရ” သာ်ဝွံ ညးမၞုံအခေါၚ်ဟီုဂး အလဵုအသဳဗျိတိၚ် ကလေၚ်သှ်လဝ်ကဵု ဌာန်ပရိုၚ်ရာ်တာ နကဵုအဳမေလ်ရ။

ပ္ဍဲကဵုအစဳဇန်တာဒၞါအာသာ်ဏံဂမၠိုၚ် ၜံက်အဳလက်ထရဝ်နေတ် ဂွံအိုတ်အးဂှ်ကီု၊ အစဳဇန်ကူပေါန် မဆဝ်မ္ၚုဟ်ကဵု ညးဗြဴမၞုံကဵုယဲဒိုက်တံ သွက်ဂွံထပိုတ်ၜံက်တံလေဝ် ပါလုပ်ဒၟံၚ်ဂှ် ဂွံတီကေတ်ရ။

မူဝါဒ မစုတ်အာ ပ္ဍဲကဵုအစဳဇန် ၜံက်ဂွံအိုတ်အးဂှ် ကၠာပေါဲရုဲမာဲသၞာံဂတဏံဂွိုအ်စိုပ် ဂကောံသောန်နက်တံ စွံအာရီုတုဲ ရပ်စပ်အာဏောၚ်ဂှ်လေဝ် ဂွံတီကေတ်ရ။

တုဲကၠုၚ် ပ္ဍဲဂိတုမေတေံ ဗျိတုၚ်ဝွံ ညံၚ်ဟွံဂွံသွံတြးကဵု ၜံက်အဳလက်ထရဝ်နေတ် ကုကောန်ၚာ်သၟတ်တံဂှ် ကၟာတ်လဒဵုအာ ကုမၞိဟ်သွံပရးတံဏောၚ်ဂှ် ကေၚ်လလောၚ်တြးလဝ်ရ။

လၟေၚ်ဒဒှ်မွဲသာ်ပၠန်ဂှ်မ္ဂး ပ္ဍဲဂိတုဂျူလာၚ်တုဲကၠုၚ်ဏံ ကံၚ်ဇြဳမၞုံပ္ဍဲတွဵုရး အေန်ဂလာန် ကေုာံ ဝေလ်တံဝွံ ပွမသွံတြး ၜံက်အဳလက်ထရဝ်နေတ် သုၚ်စောဲမွဲဝါတံဂှ် ဒၟါနူကဵုဟိုတ် စပ်ကဵုပရေၚ်ထတ်ယုက် ကေုာံ ပွဳပွူသဘာဝတံဂှ်တုဲ ပ္ဍဲသၞာံ ၂၀၂၄ ဏံ သွက်ဂွံကၟာတ်ကဵုဂှ် အာတ်မိက်လဝ် အလဵုအသဳရ။

Ref: Asiaone

Source: Reuters