သွက်ဂွံထ္မံက်ပေါဲဗ္တိုက် တၚ်နွံပၟိက်မကမ်တံ သၠုၚ်တိုန်ကၠုၚ်ရောၚ် ဒပ်ပၠန်ဂတးကရေၚ်ဍာဲတံ ဟီု

မိုဝ်ဗျေဝ်၊ သေပ်တေမ်ဗာ (၂၆)

ပ္ဍဲကဵုဒပ်ပၠန်ဂတး မၞုံအပ္ဍဲတွဵုရးကရေၚ်ဍာဲ မက္တဵုဒှ်ဒၟံၚ်ပေါဲဗ္တိုက်ဆေၚ်မုက် ကုဒပ်ကံၚ်ဇြဳပၞာန်သီအဝဵုတံ ကြပ်လၟေၚ်တ္ၚဲဂှ် သွက်ဂွံထ္မံက်ပေါဲဗ္တိုက်ဂှ် တၚ်နွံပၟိက်မကမ်တံ သၠုၚ်တိုန်ကၠုၚ်ဒၟံၚ်ရောၚ် ညးတာလျိုၚ် ဂကောံဒပ်ပၠန်ဂတးကရေၚ်ဍာဲတံ ဟီုကဵု ဌာန်ပရိုၚ်သြၚ်လောန်ုတိုၚ်(မ်) ရ။

စနူဂိတုဂျောန်မံက်တေံတုဲ မ္ၚးနူကဵု ပွဳပွူဒဳမအ်သဵု၊ ဗဝ်လခေဝ် ကေုာံ လွိုၚ်ကဝ် တွဵုရးကရေၚ်ဍာဲဂှ် ပ္ဍဲကဵုပယျဵု သေံ−ကရေၚ်ဍာဲ၊ မိုဝ်ဗျေဝ် ပယျဵုသေံ−ကရေၚ်ဍာဲတံဂှ် အကြာဒပ်ကံၚ်ဇြဳပၞာန်ကဵု ဂကောံဒပ်ရပ်လွဟ်တံဂှ် ပေါဲဗ္တိုက်ကလေၚ်မွဲဝါပၠန်တံ သ္ကာတ်မြဟ်ကၠုၚ်ရ။

ကရောံပေါဲဗ္တိုက်သ္ကာတ်မြဟ်ကၠုၚ်ဂှ် အခိၚ်ပေါဲဗ္တိုက်လေဝ် လအ်ကၠုၚ်ဂှ်ရ ပ္ဍဲကဵုတမ်ဒပ်လ္ၚဵုတံဂှ် မကမ်ဟွံရုမ်ဂပ်တံ နွံကၠုၚ်တုဲ သွက်ဂွံထ္မံက်ပေါဲဗ္တိုက် အကာဲအရာဒးမၚ်ဒၟံၚ် လွဟ်လက်နက်မကမ်တံ နွံကၠုၚ်ဂှ် ဂွံတီကေတ် အတိုၚ်ဂလာန် ကောန်ဂကောံဒပ်ပၠန်ဂတးကရေၚ်ဍာဲတံရ။

သ္ကိုပ်ပရေၚ်ပၞာန် ဒပ်စဵုဒၞါကောန်ဂကူကရေၚ်ဍာဲ ခူယဳတူဂှ် အပ္ဍဲကဵုပေါဲဗ္တိုက်တံဂှ် ဟိုတ်နူတၚ်နွံပၟိက် မကမ်တံ သၠုၚ်တိုန်ကၠုၚ်ဂှ်ရ နကဵုညးဍုၚ်ကွာန်တံ လ္ပာ်သ္ပမာန် သွက်ဂွံပါလုပ်ရီုဗၚ်ထံက်ပၚ်ကဵုအိုတ်ဂှ် အာတ်မိက်လဝ်ရ။

“ပ္ဍဲကဵုပေါဲဗ္တိုက်ဍာ်ဇမၠိၚ်ဂှ် အဓိကတၚ်နွံပၟိက်ဂှ်တှ်ေ မကမ်ရဏောၚ်။ အတိုၚ်အဲဟီုလဝ်ကၠာတေံဂှ်ရ ပိုယ်တံဂှ် မကမ်လွဟ်လက်နက်တံဂှ် ဒှ်ဒၟံၚ်အဓိကဏောၚ်။ အေ ဂှ်တှ်ေ လွဟ်လက်နက်တံဂှ်တှ်ေ ပိုယ်တံ ကေတ်နၚ် နူကဵုသၞပိုယ်တံဏောၚ်။ ပိုယ်တံဂှ် မကမ်နွံတှ်ေ တုဲဒၟံၚ်ရ။ ညးဍုၚ်ကွာန်တံဂှ် ဆက်တုဲအေၚ်ဒုၚ်ကဵုတုဲ ထံက်ပၚ်ကဵုညိဂှ် မိက်ဂွံဟီုရ” သာ်ဝွံ သ္ဂးရ။

အတိုၚ်ဂလာန် ဂကောံပၠန်ဂတးတွဵုရးကရေၚ်ဍာဲတံဂှ်မ္ဂး အပ္ဍဲပေါဲဗ္တိုက် လလအ်ပွိုၚ် (၃) နာဍဳမွဲဂှ် ခရိတ်အိုတ်ဂှ်တှ်ေ နူကဵု ၃၀၀ ကိုဋ် စဵုကဵုပွဳပွူ ၄၀၀ ကိုဋ်နွံတုဲ ယဝ်ရပေါဲဗ္တိုက်သ္ကာတ်မြဟ်ဒၟံၚ်ကွေံကွေံမ္ဂး ၚုဟ်ဍေံဒှ်အာ စဵုကဵုလ္ၚီကိုဋ်ပြၚ် နွံဒၟံၚ်ရောၚ် သ္ဂးရ။

သွက်ဂွံဂွံလွဟ်လက်နက်မကမ်တံဂှ် နူကဵုဂကောံဒပ်ပၠန်ဂတးတံ ကၠောန်ဒၟံၚ် ကာမ်ပိန်တံ၊ ဖံက်ဒၟံၚ်မာဲတံ နွံတုဲ ဗွဲကြဴဏံ ဂွံကၠုၚ်အထံက်အပၚ်အောန်ကၠုၚ်ဂှ် ညးမကၠောန်ဒၟံၚ် ပရေၚ်ထံက်ပၚ်တံ ဟီုဂးအိုတ်ရ။

ပ္ဍဲကဵုဏံ ဒပ်စဵုဒၞါကောန်ဂကူကရေၚ်ဍာဲ KNDF ဂှ် ၜိုန်ရကၠောန်လဝ်ကာမ်ပိန်မကမ် “စိုပ်ဍုၚ်ကရေၚ်ဍာဲ ဒပ်မအလကၠေံ” မကၠောန်ဗဒှ်လဝ် အပ္ဍဲဂိတုအဝ်ဂါတ် ၂၃ စဵုကဵု ဂိတုသေပ်တေမ်ဗာ ၂၃ ဂှ်ကီုလေဝ် ဂွံလဝ်အရီုဗၚ် ၜိုတ် ၃၀ တၟံကၠံညိကီုဂှ်ရ ဒးထပ်ပပဵုပ္တိုန်လဝ်တ္ၚဲရ။

ဂကောံဒပ်စဵုဒၞါညးဍုၚ်ကွာန်မိုဝ်ဗျေဝ်ဂှ်လေဝ် တမ်ဒပ် (၂) ဒပ် ပံၚ်တုဲ ကၠောန်ဒၟံၚ်ကာမ်ပိန် “ပွိုက်ဖိုက်မွဲ သွက်မိုဝ်ဗျေဝ်” တုဲ အပ္ဍဲၜါသတ္တာဟဂှ် ကလိဂွံလဝ်အရီုဗၚ် ၄ ဒဿမ ၆ တၟံကၠံညိကီုဂှ် ဂွံတီကေတ်ရ။

ညးတာလျိုၚ် နူကဵုဂကောံဒပ်စဵုဒၞါညးဍုၚ်ကွာန်မိုဝ်ဗျေဝ်မွဲတၠဂှ် ယဝ်ရကာမ်ပိန်မကမ်တံဏံ အံၚ်ဇၞးမ္ဂး ထ္မံက်ပေါဲဗ္တိုက်ဇၞော်ဇၞော်တံမာန်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“အကာဲအရာပၞာန်ဂှ်တှ်ေ သာ်လဵုဂွံဟီုရောဟီုတှ်ေ မွဲလ္ပာ်ကုမွဲလ္ပာ် ထံၚ်ဒၟံၚ်ပရိုၚ်တံ နွံဒၟံၚ်ရ။ အခိၚ်လဵုကလေၚ်ဒှ်ရောဟီုဂှ် ဟီုဟွံလေပ်ဏီပုဟ်။ ပြဟ်ဟ်ဏံ ဒှ်ဒၟံၚ်အခိၚ်ကာမ်ပိန်တုဲ ပွိုက်ဖိုက် မၞုံပၟိက်ဒၟံၚ်ဂှ် ယဝ်ရဂွံမ္ဂး ပိုယ်တံ ထပ်ဂွံထ္မံက်ပေါဲဇၞော်ဇၞော်တံရနွံ” သာ်ဝွံ သ္ဂးရ။

ခရိတ်အိုတ် သွက်လွဟ်ပွိုက်ဖိုက် မရန်တၟံလဝ် သ္ဂောံစကာ သီုဗလးတိ သီုလ္တူကျာဂှ် စၟတ်လဝ် ၅၀၀၀ ကိုဋ်ဒ္ကေဝ်ရောၚ် ညးဆက်ဟီုရ။

မွဲလ္ပာ်ပၠန်ဂှ် ဂကောံဒပ်ပၠန်ဂတးရပ်လွဟ်တံဝွံ ဟိုတ်နူၚုဟ်ဒဝ်ဠာကဵု ၚုဟ်သြန်ၝာတ်တံ သၠုၚ်တိုန်ဒၟံၚ်ဂှ်ရ ပ္ဍဲအရာရာန်လွဟ်လက်နက်မကမ်တံဂှ် ဒးဆေၚ်ဒၟံၚ်မုက် ကုအခက်အခုဲနာနာသာ်ရ။

ဒပ်ကံၚ်ဇြဳပၞာန်ဝွံ စနူတ္ၚဲအကြာတံဏံတုဲ ထပ်ဗပေၚ်ကၠုၚ် ဇြဟတ်ဒပ် အပ္ဍဲကဵုတွဵုရးကရေၚ်ဍာဲတံဂှ်ကီု၊ မ္ၚးနူကဵုကမ်လှောဝ်ခြာဇမ္ၚောဲ ပန်နကဵုအတောဲဂှ် ကၠောန်သ္ပပလံၚ်ပ္တိုန်ဒၟံၚ် သီုကဵုကွဳစၚ်ခြပ်ပသဲတံရောၚ်ဂှ် ဂွံတီကေတ် အတိုၚ်ဂလာန်ဂကောံဇြဟတ်ပၠန်ဂတးတံရ။

ပ္ဍဲတွဵုရးကရေၚ်ဍာဲဂှ် အပ္ဍဲဂိတုအဝ်ဂါတ်တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်အပံၚ် ၅၀ ပြၚ် က္တဵုဒှ်လဝ်တုဲ လ္ပာ်ကံၚ်ဇြဳပၞာန်ဂှ် ဗ္ဒါဲ ၁၀၀ ချိုတ်အာလဝ်ရောၚ် ဒပ်စဵုဒၞါကောန်ဂကူကရေၚ်ဍာဲ KNDF လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNDF