ပ္ဍဲပေါဲဗ္တိုက်တယိတ်ချံၚ်ဂှ် ညးဒေသ (၃) တၠ ဒးဒုၚ်ရပ်ဒက်ပန်ဂစိုတ်

တယိတ်ချံၚ်၊ သေပ်တေမ်ဗာ (၂၆)

ပ္ဍဲကဵုပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန် (ပိတောက်ကြီး) ၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ် နူကဵုဒပ်ကံၚ်ဇြဳပၞာန်တံ ရပ်ဂစိုတ်ဏာလဝ် ညးဒေသ (၃) တၠရောၚ် ဂွံတီကေတ် အတိုၚ်ဂလာန် ကောန်ဂကောံဒပ်စဵုဒၞါဒေသတံရ။

တုဲကၠုၚ် ပ္ဍဲဂိတုသေပ်တေမ်ဗာ (၂၃) တေံ အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ကဵု ဒပ်ပံၚ်ကောံစဵုဒၞါဒေသတံဂှ် က္တဵုဒှ်လဝ်ပေါဲဗ္တိုက်ဆေၚ်မုက် ဗ္ဒါဲကွာန်(ပိတောက်ကြီး) ဂှ်ရ။

အပ္ဍဲကဵုပေါဲဗ္တိုက်ဂှ် ဒပ်ကံၚ်ဇြဳပၞာန်ဝွံ ပန်ဂစိုတ်ဏာလဝ် ညးဒေသ ဂကူကရေၚ် (၃) တၠ မရပ်ကော်နၚ် နဒဒှ်ရဲထ္ၜးဂၠံၚ်ဍေံတံဂှ် နကဵုသေနာတ်ရ။

ညးဒေသ ဒးဒုၚ်ပန်ဂစိုတ်တံဂှ်ဝွံ ဒှ်ကောန်ကွာန် (ပိတောက်ကြီး) သဝ်ဒါတူ၊ သဝ်ပေဖအ် အာယုက်ပွဳပွူ ၂၀ သၞာံ ကေုာံ သဝ်သေဝါ အာယုက် ၃၅ သၞာံတံရောၚ်ဂှ် ညးဒေသတံ ဟီုဂးလဝ်ရ။

ပ္ဍဲကဵုပေါဲဗ္တိုက်ၜါလ္ပာ်ဂှ် ကောန်သ္ဂံၚ် PDF မွဲတၠ ပြဟ်လလုဲအာလဝ်တုဲ ဒပ်ကံၚ်ဇြဳပၞာန်ဝွံ စံၚ်ပလီုဏာလဝ် သ္ၚိဒၟံၚ်ညးဒေသ (၂) မရ။

ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ညးဒေသ (၃) တၠ ဒပ်ကံၚ်ဇြဳပၞာန် မရပ်ဒက်ဂစိုတ်ဏာတံဂှ်ဝွံ ဒှ်ကောန်ဒပ်စဵုဒၞါညးဍုၚ်ကွာန် PDF တံရောၚ်ဂှ် တြးဒၟံၚ်ဝါဒတံ နွံရ။

က္တဵုဒှ်ပေါဲဗ္တိုက်တုဲ ဒပ်ကံၚ်ဇြဳပၞာန် မစံၚ်ပလီုပလာ်ဏာလဝ် သီုကဵုသ္ၚိဒၟံၚ်တံဂှ်ဝွံ ကလေၚ်တိတ်အာ လ္ပာ်ဍုၚ်တယိတ်ချံၚ်ဂှ် ဂွံတီကေတ် ဇရေၚ်ညးဒေသတံရ။

ဟိုတ်နူပေါဲဗ္တိုက်ဂှ်တုဲ ညးဒေသ (၅၀၀) ပြၚ် နူကဵုကွာန် (၃) ကွာန် ပါလုပ်သီုကဵု (ပိတောက်ကြီး) ၊ ပေဝ်ဒက်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံကဵု ဒၞါဲဒဵုဂြိုပ်မကြပ်တံတုဲ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီရ။

ပရိုၚ်−သြၚ်လောန်တိုၚ်(မ်)

ဗီု−Social Media