ရေဝ်၊ သေပ်တေမ်ဗာ (၂၇)
ဂကောံဂီုကၠီု တိုက်သြန်မြဝတဳ ဒပ်ပၞာန်ပိုၚ် မၞုံအရာပ်ယာန်ကျဳအံၚ်၊ ဍုၚ်ရေဝ်၊ တွဵုရးဍုၚ်မန် ဒးဒုၚ်ပန်ပှော်တုဲဂှ် ကောန်ဒပ်ကံၚ်ဇြဳပၞာန်မွဲတၠပါလုပ်ဂှ် ၂ တၠ ချိုတ်အာလဝ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုသေပ်တေမ်ဗာ ၂၆ အခိၚ်လဒေါဝ်တ္ၚဲ ၜိုတ် (၁) နာဍဳဂှ် ဂကောံရပ်လွဟ်ဟွံတီယၟု ၄ တၠ ကၠုၚ်စိုပ်ကဵု ကွဳလိုန်ဓာတ် ၂ ဖ္ဍိုက်တုဲ ပန်ပှော်ဗ္တိုက်လဝ် ကောန်ဒပ်ဂီုကၠီုကံၚ်ဇြဳပၞာန် မၞုံတိုက်သြန်မြဝတဳတံဂှ်ရ။
ဟိုတ်နူဂကောံဂီုကၠီုတိုက်သြန် ဒးဒုၚ်ဗ္တိုက်ဂှ်တုဲ အကြာပ်ဒပ်ကံၚ်ဇြဳပၞာန်မွဲတၠ ချိုတ်အာလဝ် ပ္ဍဲဒၞါဲဒှ်ပရူဂှ်တုဲ ကောန်ဂကောံပၞာန်ညးဍုၚ်ကွာန်တြေံ မဒှ်ညးမၚ်ဂီုကၠီု ကလိဂွံလဝ်ဝပ်ဂှ်လေဝ် အခိၚ်မပလံၚ်ဗစိုပ် ရုၚ်ဂဥုဲရေဝ်ဂှ် ထပ်ချိုတ်အာလဝ်ပၠန်ရ။
ကြဴနူဂကောံဂီုကၠီုတိုက်သြန် ဒးဒုၚ်ဗ္တိုက်တုဲဂှ် ဒပ်ကံၚ်ဇြဳပၞာန်တံ စၟဳစၟတ်ဂၠိုက်ဂၠါဲကၟာတ်လဒဵုတံဂှ် ကၠောန်ၜိုတ်လဝ်တုဲ ညးဒေသ (၄) တၠ နူကဵုပွဳပွူတိုက်သြန်ဂှ်လေဝ် ရပ်ဒက်ဏာလဝ်ရောၚ် ဂွံတီကေတ် အတိုၚ်ဂလာန် ညးလ္တူဍုၚ်တံရ။
ပ္ဍဲဂိတုသေပ်တေမ်ဗာ ၂၆ အခိၚ်ဇိုၚ်သဝ်တ္ၚဲ ၜိုတ် ၅ နာဍဳကဝိုက် ဂကောံလကိုဟ်ဍုၚ်ရေဝ် လလောၚ်ပ္တိတ်ကၠုၚ်ပရိုၚ် ဒဒှ်ရဂကောံညးတံ ပန်ပှော်ဗ္တိုက်လဝ် ဂကောံဂီုကၠီုတိုက်သြန်မြဝတဳ မၞုံလဒေါဝ်ဍုၚ်ရေဝ်ဂှ်ရ။
ပရေၚ်ဗ္တိုက်ဏံဂှ်ဝွံ ၜိုန်ရပလေဝ်ပလေတ်လဝ် ညံၚ်ဂွံလုပ်စိုပ်အာ စဵုကဵုအပ္ဍဲတိုက်သြန်တေံဂှ်ကီုလေဝ် ဟိုတ်နူအကာဲအရာပရေၚ်ဂီုကၠီုတုဲ ဇီုကပိုက်ဒးဟွံမွဲမွဲသာ် ဆုတ်ကလေၚ်မာန်လဝ်ရောၚ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် ဟီုဂးလဝ်ရ။
ပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ဒပ်ကံၚ်ဇြဳပၞာန် အကြာမတေၚ်ဂြတ်လဝ် ပရေၚ်ဂီုကၠီု ဗွဲတၟေၚ်ဂှ် တမ်ဒပ်ကံၚ်ဇြဳပၞာန်၊ ဗ္ဒိုပ်ဒပ် ကေုာံ ရုၚ်ဌာနမဆေၚ်စပ်တံ ဒးဒုၚ်ဗ္တိုက်လဝ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု−PAN
sanlontai