ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်လက်ပါန် ပွိုၚ်ဍုၚ်ဝဝ် ဒးဒုၚ်ဗ္တိုက်

ဝဝ်၊ သေပ်တေမ်ဗာ (၂၇)

ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်လက်ပါန်၊ ပွိုၚ်ဍုၚ်ဝဝ်၊ ရးဒေသဇၞော်တၞၚ်သဳဂှ် ပ္ဍဲဂိတုသေပ်တေမ်ဗာ ၂၆ အခိၚ်နူဂယးပြဟ်ဟ်ဂှ် အာစိုပ်ဗ္တိုက်လဝ်ရောၚ် ဂွံတီကေတ် နူကဵုဂကောံဒပ်ပံၚ်ကောံပၠန်ဂတးတံရ။

ဒပ်ပံၚ်ကောံ PDF, ဒပ်ပၞာန်ဗၠးၜးကောန်ဂကူကရေၚ် KNLA တံ အာစိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ဇြဟတ်ပၞာန်ညးဍုၚ်ကွာန် ကေုာံ ဒပ်ကံၚ်ဇြဳပၞာန် ဗ္ဒါဲ (၃၀) ပြၚ် မဖျေံဒပ်မံၚ်ဒၟံၚ်ဂှ်ရ။

ဟိုတ်နူပရေၚ်ဗ္တိုက်ဏံတုဲ ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ် ၁၅ မိနေတ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်တုဲ ကောန်ဂကောံပၞာန်ညးဍုၚ်ကွာန် ၂ တၠ ကလိဂွံလဝ်ဝပ်ရ။

အပ္ဍဲပရေၚ်ပန်ပှော်ၜါလ္ပာ်ဂှ် နူကဵုကံၚ်ဇြဳပၞာန်ဂှ် သီဂိုၚ်ဂွံလဝ် သေနာတ် G3 မွဲဇကိုအ်၊ ဖျေဲလွဟ် ၄၊ မကမ် ၆၂ ဒကောၚ် ကေုာံ ဗုမ်တဲမွဲမတုဲ နူကဵုဂကောံဒပ်ပံၚ်ကောံတံ ဇီုကပိုက်ဒးဟွံမွဲပုဟ်ဂှ် ကောန်ဂကောံဒပ်စဵုဒၞါဒေသမွဲတၠ ဟီုရ။

ကြဴနူပရေၚ်ပန်ပှော်တုဲဂှ် နူကဵုဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ဒုၚ်ဇြယိတ်ဂှ်ကဵု ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်(ပေါက်တန်း) ပွိုၚ်ဍုၚ်ဝဝ်တံ ပန်ပှော်လဝ်လွဟ်ဇၞော်ဂှ် ဂွံတီကေတ် အတိုၚ်ဂလာန်ညးဒေသတံရ။

တုဲကၠုၚ် ပ္ဍဲဂိတုသေပ်တေမ်ဗာ ၁၀ တေံဂှ်လေဝ် ဂကောံဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်လက်ပါန်တာန်တံ ဒးဒုၚ်ဗ္တိုက်ဂှ်ရ ကောန်ဂကောံဒပ်ကံၚ်ဇြဳပၞာန် (၂) တၠ ချိုတ်အာလဝ်ဏီရ။

ပရိုၚ်−သြၚ်လောန်တိုၚ်(မ်)

ဗီု−PDF ဒေသ