ဒးဗလးလဝ်တဲ ဆောံလေၚ်လဝ် ဗ္ဒိုပ်ဒပ်ကံၚ်ဇြဳပၞာန် စဵုကဵု ၆၂ ဒပ်

မတ်မလီု၊ သေပ်တေမ်ဗာ (၂၇)

စဵုကဵုဂိတုဂျူလာၚ်သၞာံတုဲတေံ ဒပ်ပၞာန်သီလဝ်အဝဵုဂှ် ပ္ဍဲကဵုဒေသသ္ကုတ်ဒိုဟ်အဂၞဲဍုၚ်ဗၟာဂှ် ဒးဗလးလဝ်တဲ ဆောံလေၚ်လဝ် ဗ္ဒိုပ်ဒပ်ကံၚ်ဇြဳပၞာန် စဵုကဵု ၆၂ ဒပ်ရောၚ် ပ္ဍဲဂိတုသေပ်တေမ်ဗာ ၂၆ တေံ ဇာဇၞိက်အထံက်အရီုပရေၚ်ၜိုဟ်လလမ်ကရေၚ် (KPSN) တံ လလောၚ်ပ္တိတ်လဝ် လိက်ဒုၚ်စဳရေၚ်ရ။

ထ္မံက်ထ္ၜးလဝ် ပ္ဍဲကဵုလိက်ဒုၚ်စဳရေၚ် ဇာဇၞိက်အထံက်အရီုပရေၚ်ၜိုဟ်လလမ်ကရေၚ် (KPSN) နကဵုက္ဍိုပ်လိက် “အပြံၚ်အလှာဲအဝဵု ပရေၚ်အုပ်ဓုပ်ပၞာန် အပ္ဍဲကဵုသ္ကုတ်ဒိုဟ်အဂၞဲဍုၚ်ဗၟာ ဍုန်ဂြက်ကၠုၚ်” မဒှ်ရ။

လ္ဂောံကဵုလိက်ဒုၚ်စဳရေၚ်ဂှ်မ္ဂး စနူသၞာံ ၂၀၂၁ ဂိတုဖေဖဝ်ဝါရဳ ဒပ်ပၞာန်သီအဝဵုတုဲဂှ် အစောံစရာဲ ကံၚ်ဇြဳပၞာန် ထိၚ်ဒက် သ္ကုတ်ဒိုဟ်ဂၞဲဍုၚ်ဗၟာမာန်ဂှ်ဝွံ ပ္ဍဲကဵုပရေၚ်အုပ်ဓုပ်ကီု ပရေၚ်ပၞာန်ကီု သီုၜါဂှ် စှ်ေကၠုၚ်တီတီဒှ်ဒှ်ရောၚ် သ္ဂးရ။

ဟိုတ်နူပၞာန်ထ္ပက် နူကဵုမဟာမိတ်ဂမၠိုၚ် ပါလုပ်သီုကဵု ဒပ်ပၞာန်ဗၠးၜးကောန်ဂကူကရေၚ် KNLA ကုဒပ်ကံၚ်ဇြဳပၞာန် မဆုတ်ယုတ်စှ်ေကၠုၚ်ဒၟံၚ် သီုပရေၚ်ပၞာန်၊ သီုပရေၚ်အုပ်ဓုပ်ဂှ် ဒးဒုၚ်သီလဝ် ဗ္ဒိုပ်ဒပ် ၂၄ တုဲ ဗ္ဒိုပ်ဒပ် မဒးဗလးလဝ်တဲ ၃၈ နွံလဝ်ရောၚ် KPSN ဟီုဂးလဝ်ရ။

အပ္ဍဲကာလသီအဝဵုဏံ ဟိုတ်နူပရေၚ်ဗ္တိုက်ပန်ပှော် လွဟ်ဇၞော် ကေုာံ တရဴကျာ ကံၚ်ဇြဳပၞာန်တံဂှ်တုဲ ကောန်အရာပ် ဗ္ဒါဲ ၁၃၀ တၠ ချိုတ်အာလဝ်တုဲ မၞိဟ်ကလိဂွံဝပ် ၄၈၀ ပြၚ် နွံလဝ်ရ။

ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ကံၚ်ဇြဳပၞာန် မသၠုၚ်ပ္တိုန်ကၠုၚ်ဒၟံၚ်အသိၚ်ဂှ်တုဲ ပ္ဍဲကဵုတိဍာ်ကဝ်တူလေဝ်ဂှ် လၟိဟ်ညးပါဲဒဴဘဲပၞာန် ၆၃၀၀၀၀ ပြၚ် နွံလဝ်တုဲ လၟိဟ်ဏံဝွံ စတော်နူဂိတုဂျာန္နဝါရဳ သၞာံဏံမ္ဂး လၟိဟ်ညးပါဲဒဴဘဲပၞာန် ဂၠိုၚ်တိုန်ကၠုၚ် ၁၈ တၟံကၠံဂှ် KPSN သ္ဂးရ။

အတိုၚ်မတော်ဆလဝ် လ္တူတၚ်နွံပၟိက် ကွက် ၆ ဂိတု သွက်လၟိဟ်မၞိဟ် ကေုာံ လၟိဟ်ညးပါဲဒဴဘဲပၞာန် မဂၠိုၚ်တိုန်ကၠုၚ်တံဂှ်မ္ဂး သွက်ဂွံသောၚ်ကလး အကြေပ်အဂြတ်ဇွောံမစၞစ အပ္ဍဲပွိုၚ် ၁၂ ဂိတုကၠုၚ်စိုပ်ဏံဂှ် တဲဍိုန် ဒဝ်ဠာအမေရိကာန် ၄၂ ပြကောဋိကိုဋ်နွံရောၚ် ဂွံတီကေတ် အတိုၚ်တၚ်လလောၚ်တြး KPSN ရ။

အခိၚ်လၟုဟ်ဂှ်လေဝ် မ္ၚးနူစၞစသ္ဇိုၚ်တံဂှ် စမြိုၚ်၊ ဂဥုဲ၊ အထံက်အပၚ်ဘာတံဂှ်သၟးဟွံက အရီုဗၚ်တၞဟ်ဟ် သွက်ကောန်ၚာ်တံကဵု ညးဗြဴတံဂှ်လေဝ် နွံပၟိက်ဒၟံၚ် ကာတၟေၚ်ရောၚ်ဂှ် KNSN လလောၚ်ပ္တိတ်ဟီုဂးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−KNU