နေဗျဳဒဝ်၊ သေပ်တေမ်ဗာ(၂၇)
ကံၚ်ဇြဳပၞာန် နူဂကောံဇြဟတ်ပၠန်ဂတးတံကဵု ပွဳဗွိုၚ်ဍုၚ်သ္အာၚ်တံ ကဵုမံၚ်ဇြဟတ်ဂရိုဟ်ဇဳဒိုဟ်ဂှ် ကိုပ်ကၠာနူအာယုက်ကာလကာတၟေၚ် ကေတ်ဗပဵုလဝ်တံ ဟွံပေၚ်ၜါဂိတုဏီဂှ် ပါဲပ္တိတ်ထောံ သ္ကိုပ်ဗိုလ်ပၞာန်လ္ၚဵုတံကဵု ဝန်ဇၞော်လ္ၚဵုတံတုဲ ဒးသၠာဲမံၚ် ညးစၞးတံရ။
ဒုသ္ကိုပ်ဗိုလ်ဇၞော် မိုဝ်မျေတ်ထောန်ကေုာံ ဒုသ္ကိုပ်ဗိုလ်ဇၞော် သဵုထောဋ် ဒးဒုၚ်စၟဳတ်မံၚ် နကဵုအမှုစလာဘ်ဗ္ဇဴတံဂှ် ပ္တိတ်ထောံ နဒဒှ်ကောန်ဂကောံကံၚ်ဇြဳပၞာန်ရဂှ် လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၅)ဂှ်ရ။
ဒၞါဲညးတံမၞိဟ်ၜါဂှ်တှ်ေ ထ္ပက်အဇာ ခါန်ကၞက်လဝ် သ္ကိုပ်ဗိုလ်ဇၞော် ပရေၚ်ပ္ညဳပ္ညပ်ကောပ်ကာဲ ဒပ်ပၞာန်တိုက်၊ ဍာ်၊ ကျာ ကံၚ်ဇြဳပၞာန် မံၚ်ၚ်အေ ကေုာံ ညးကဵုကသပ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ် ဒုသ္ကိုပ်ဗိုလ်ဇၞော်ညဵုသဝ် တံရ။
ဒုသ္ကိုပ်ဗိုလ်ဇၞော်သဵုထောဋ် ဒးဒုၚ်ပါဲပ္တိတ်လဝ်ဂှ် နူနဒဒှ်ဝန်ဇၞော် ရုၚ်ဂကောံအလဵုအသဳကၟိန်ဍုၚ်(၁)ဂှ် ၜိုန်ရသ္ကဵုကလေၚ်ယိုက်ဂၠေၚ်တာလျိုၚ် လ္ပာ်ပၞာန်ကီုလေဝ် ဒုသ္ကိုပ်ဗိုလ်ဇၞော် မိုဝ်မျေတ်ထောန်ဂှ်တှ်ေ သွက်ဂွံကဵုတာလျိုၚ်လ္ပာ်ပၞာန်ဂှ် လလောၚ်တြးလဝ်ဟၟဲရ။
ဒုသ္ကိုပ်ဗိုလ်ဇၞော်မိုဝ်မျေတ်ထောန်ဂှ် ဒှ်မၞိဟ်ပတှ်ေ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်တုဲ ယၟုမြဟ်မံၚ်နဒဒှ်ညးဆက်ဒုၚ်အာဲကၟာဲ နဒဒှ်သ္ကိုပ်ပရေၚ်စဵုဒၞါ ဒၞါဲက္ဍိုပ်သ္ကိုပ်ပၞာန်မွဲတၠရ။
ဆ္ဂး ဟိုတ်နူပွဝေၚ်ၚုဟ်ဒဝ်ဠာ၊ ပွစလာဘ်ဗ္ဇဴတံတုဲ ကဝ်မတဳ ညးကေတ်လဝ်တာလျိုၚ်နဒဒှ်ဥက္ကဌ ပိဂှ်လေဝ် ပ္ဍဲဂိတုသေပ်တေမ်ဗာ စၟတ်တ္ၚဲ(၁၈)ဂှ် ကံၚ်ဇြဳပၞာန်တံ ထ္ပက်အဇာ ခါန်ကၞက်လဝ် ဒုသ္ကိုပ်ဝန်ဇၞော်မျထောန်ဥူ ဝန်ဇၞော်ပရေၚ်ပလံၚ်ဗစိုပ်ကေုာံ ပရေၚ်ဆက်စၠောံဂှ် နဒဒှ်ဥက္ကဌရ။
ဆက်စပ်ကဵု သ္ကိုပ်ဗိုလ်တံဒးဒုၚ်ပ္တိတ်ဂှ်တုဲ ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဒံက်တာလှကျဝ်ဇြဝ်ဂှ် အပ္ဍဲကံၚ်ဇြဳပၞာန်တံဂှ် ဒှ်မံၚ်ပြဿနာတံ ဒှ်မာန်တုဲ ပ္ဍဲကာလဏံ သီုပ္ဍဲသီုမ္ၚး ဒှ်မံၚ်ဆဆဵုဗီုလၟုဟ်ဏံ သ္ကာတ်မြဟ်အိုတ်ရဂှ် သ္ၚဳဂၠိပ်လဝ်ရ။
“ဂကောံမေန်အံၚ်လှာၚ်တံဂှ် ဒှ်မံၚ်ပြဿနာကွေံကွေံရောၚ် ထေၚ်ကေတ်ရ။ သ္ကိုပ်ဗိုလ် ဟီုလဝ်ညးဆက်ဒုၚ်အာဲကၟာဲညး(မိုဝ်မျေတ်ထောန်)ဂှ် ကဵုဇူထောံတုဲ ကလေၚ်ကဵု ညးဒးဒုၚ်ဟီုမံၚ် ဒးဒုၚ်ပါဲလဝ် သ္ကိုပ်ဗိုလ်မျထောန်ဥူဂှ် ရံၚ်ကေတ်တှ်ေ သွက်ညးဂှ် အကာဲအရာ ဟွံခိုဟ်ပုဟ်ဂှ် ထေၚ်ကေတ်ရ။ လ္ပာ်သၞတံ စသရိုဟ်မံၚ်ယျဂှ် ဍာံဍာံရ။ ရိုဟ်အလန်လေဝ် ပ္ဍဲကံၚ်ဇြဳပၞာန်ဂှ် ဒှ်မံၚ်ဗီုလၟုဟ်ကီုရ။ ဆ္ဂးဍေံတံ ညိၚ်ဝတ်ကွေံကွေံတုဲမှ ဒှ်ရ။ ဒှ်မံၚ်ဆဆဵုသီုပ္ဍဲ သီုမ္ၚးဗီုလၟုဟ်ဂှ် ကာလဏံသ္ကာတ်မြဟ်အိုတ်ရ” သာ်ဝွံ ညးသ္ဂးရ။
ပ္ဍဲတၚ်လလောၚ်အမိၚ်ကံၚ်ဇြဳပၞာန် ပ္ဍဲဂတုသေပ်တေမ်ဗာစၟတ်တ္ၚဲ (၂၅)ဂှ် ဥူအံၚ်နာၚ်ဥူ ခါန်ကၞက်လဝ် နဒဒှ် ဝန်ဇၞော်ပရေၚ်ပိုန်ဒြပ်ကေုာံ ပရေၚ်ကူသာန်သွံရာန် ကြဴနူဒပ်ပၞာန်သီအဝဵုတုဲဂှ်လေဝ် ဒးဒုၚ်ပဆုဲပြံၚ်လဝ် နဒဒှ်ဝန်ဇၞော် ရုၚ်အလဵုအသဳကၟိန်ဍုၚ်ရ။
သ္အာၚ်နူဂှ်ပၠန် ဒုသ္ကိုပ်ဗိုလ်ဇၞော်မိုဝ်မျေတ်ထောန် ဒးဒုၚ်ပ္တိတ်လဝ်ဂှ်ကဵု ဒုဝန်ဇၞော်ပရေၚ်ပိုန်ဒြပ်ကေုာံ ပရေၚ်ကူသာန်သွံရာန် ဥူညောအ်အံၚ် ညးစုက်လုက်ကုညးဂှ်လေဝ် ကဵုဇူထောံလဝ်မဒှ်ရ။
ဥူညောအ်အံၚ်ဂှ် ပ္ဍဲကဝ်မတဳ ပရေၚ်ဗၞိက်ဇွောဝ်စှ်ေတံ သ္ဂောံမြက်ဇက်ဍာံစၟတ်ဂှ် ကေတ်လဝ်တာလျိုၚ် နဒဒှ်ဝန်အပ္ဍဲတုဲ ပ္ဍဲလက်ထက်အလဵုသဳ ဥူတုၚ်ဇြုၚ်ဂှ် ဟိုတ်နူပွစလာဘ်ဗ္ဇဴတံတုဲ ဒှ်ညးဒးဒုၚ်ပါဲပ္တိတ်လဝ် နူနဒဒှ်သ္ကိုပ်စၞောန်ပ္ညုၚ် ဌာနက္ဍိုက်က္ဍိုပ်ပရေၚ်ကူသာန်သွံရာန်ရ။
ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော်အလဵုသဳညဳသၟဟ်ဂကူ (NUG) ဥူနေဖုမ်လာတ်ဂှ် အကာဲအရာလၟုဟ်ဏံဂှ် အပ္ဍဲဂကောံပၞာန်တံ မ္ၚးနူပရေၚ်စလာဘ်ဗ္ဇဴတံဂှ် ပရူပရာတၞဟ်သ္အာၚ်တံလေဝ် နွံမာန်မံၚ်ရဂှ် သ္ၚဳဂၠိပ်လဝ်ရ။ “သ္ကိုပ်ဗိုလ်ပၞာန်ဗၟာတံကဵု ပရေၚ်စလာဘ်ဗ္ဇဴတံဟီုဂှ် ဒှ်အရာပါ်ခြာဟွံဂွံတံရဂှ် ဟီုစဂွံရ။ စညိညိကဵု စဂၠိုၚ်ၚ်တံရ ကွာဏောၚ်။ စသ္ၚိတ်တ်တံကဵု စညာန်န်တံရ ကွာဏောၚ်။ ၜိုတ်ဏံရနွံ။ ပ္ဍဲတံဏံဂှ် လၟုဟ်ဂှ် ထ္မံက်ပ္တိတ်ယၟုလ္ၚဵုတံတုဲ ကၠောန်ကၠုၚ်ဟီုဂှ်တှ်ေ မ္ၚးနူပရေၚ်စလာဘ်ဗ္ဇဴဏံဂှ် ကိစ္စတၞဟ်သ္အာၚ်တံလေဝ် ပါလုပ်ဆက်စပ်မာန်မံၚ်ရဂှ် ပိုဲတံသ္ၚဳဂၠိပ်လဝ်ရ” သာ်ဝွံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကောန်ဂကောံ ကဝ်မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်လဝ် ဥူဘယာန်ယှံၚ်ဂှ်လေဝ် ကဵုဇူထောံတုဲ ဒၞါဲသၠးအာတံဂှ် ထ္ပက်အဇာခါန်ကၞက်လဝ် ဥူခေန်ဇြဝ်၊ ပ္ဍဲဒၞါဲဝန်ဇၞော်ပရေၚ်ပိုန်ဒြပ် ကေုာံ ပရေၚ်ကူသာန်သွံရာန်ဂှ် ဥူထောန်အုံ ကေုာံ ဒၞါဲဒုဝန်ဇၞော်ဂှ် ဥူမေန်န်တံရ။
သ္အာၚ်နူဂှ်ပၠန် နဒဒှ်ဒုတိယဝန်ဇၞော် ဌာနဝန်ဇၞော်ကာဍုၚ်သ္အာၚ်ဂှ် ပ္တိုန်ကဆံၚ်ခါန်ကၞက်ကဵုလဝ် အမာတ်ကလုတ် ဍုၚ်ရုရှာဖက်ဒရေယှေန် ဥူလွေန်ဥူ မဒှ်ရ။
ဗိုလ်ဇၞော် CDM ကံၚ်တူဝေန်ဂှ်တှ်ေ နကဵုက္ဍိုပ်သ္ကိုပ်ပၞာန်ဂှ် ပလှ်ပ္တိတ်ထောံ ညးယၟုပရေံတိတ်မံၚ်တံဂှ်တုဲ မၞိဟ်ဒှ်ကြိုက်စိုတ်တံဂှ် ကဵုဒၞါဲသၠုၚ်ပ္တိုန်ကဆံၚ်တုဲ ရုဲစှ်ထ္ပက်မံၚ်အဇာဏီဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“မေန်အံၚ်လှာၚ်ဂှ်တှ်ေ မၞိဟ်ညးဒးစိုတ်ဂှ်ရ စုတ်တုဲ ထ္ပံက်မံၚ်အဇာဏီရ။ မၞိဟ်ဏံဂှ် ဟွံဒးစိုတ်ပုဟ်ဟီုတှ်ေ ပ္ဍဲညးဂှ် သွက်ဂွံထ္ပက်အဇာဂှ် သ္ကိုပ်ဗိုလ်ပၞာန်တံ နွံမံၚ်ကၠးကၠးရ။ သၠုၚ်ပ္တိုန်ကဵုကဆံၚ် ကုညးမွဲမွဲကဵုဒှ်၊ ကဵုဒၞါဲကဵုဒှ် ညးဒးတိတ်ဂှ်တိတ်၊ ဆက်ဒှ်ကၠုၚ်မံၚ် ဗီုဏံဏီရ။ ညးယၟုတိတ်ဗီုဏံဂှ် တိတ်တုဲ မၞိဟ်သှ်ေမံၚ်တံဂှ် ရုဲစှ်ထ္ပက်မံၚ်အဇာ အတိုၚ်ကြိုက်စိုတ်ညးဏီရဂှ် အဲညာတ်ကေတ်ရ” သာ်ဝွံ ညးသ္ဂးရ။
ပရေၚ်ပလေဝ်ပလေတ်ဒက်ပ္တန် ကံၚ်ဇြဳပၞာန်ဂှ် ကြဴနူကေတ်ဗပဵုအာယုက်ကာလကာတၟေၚ်တုဲမှဟေၚ် လေပ်ကၠောန်စကီုလေဝ် ဗီုလၟုဟ်ပြံၚ်သၠာဲ ပ္ဍဲအခိၚ်ကာလကာတၟေၚ် အကြာဟွံပေၚ်ပိဂအုံမွဲဂအုံဂှ် ပ္ဍဲဂကောံပၞာန်တံ ရုပ်ရဴလီုမံၚ်တံဒှ်မာန်ရဂှ် ညးခါတ်အကာဲပရေၚ်ဍုၚ်ကွာန်တံ ထံက်ထ္ၜးလဝ်အိုတ်ရ။
ပ္ဍဲအကာဲအရာဏံဂှ် ဂကောံဇြဟတ်ပၠန်ဂတးတံဂှ် ကေတ်အခေါၚ်ခိုဟ် ကုပြဿနာပ္ဍဲဂကောံပၞာန်တံတုဲ သွက်ဂွံဆက်ဇက်ဂၠောဲတိုန်အာ ပ္ဍဲပေါဲဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်တံ ကောံကောံကဠောံကဠောံ ကတိုၚ်ကတိုၚ်ကၟဟ်ဟ်အိုတ်ညိဂှ် ဖ္တိုက်ဖ္အောဝ်လဝ်တံ နွံမံၚ်ရ။
ပရိုၚ်-သြၚ်လောန်တိုၚ်မ်
ဗီု-TLT
sanlontai