မတ်မလီု၊ သေပ်တေမ်ဗာ (၂၈)
ၚုဟ်ထဝ်မဳဠေန်အပ္ဍဲဍုၚ် မသၠုၚ်တိုန်ကၠုၚ်လဝ် မွဲဒ္ကေဝ် စဵုကဵု ၃၈ ကိုဋ်ဒ္ကေဝ်ဂှ်ဝွံ စနူဂိတုသေပ်တေမ်ဗာ သတ္တာဟတတိယဂှ်တုဲ ကလေၚ်စှ်ေကၠုၚ်ဒၟံၚ် သိုက်က်ရောၚ် တၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ်အပ္ဍဲဍုၚ်ဝွံ ဟိုတ်နူအသိၚ်အလိုန် ကံၚ်ဇြဳပၞာန် တက်တြးပ္တိတ် တၞးသြန်ၜါဠက်ဒ္ကေဝ်ဂှ်တုဲ ထဝ်မွဲဒ္ကေဝ်ဂှ် ၚုဟ်သၠုၚ်တိုန်လဝ် စဵုကဵု (၃၈) ကိုဋ်ဒ္ကေဝ်တုဲ အခိၚ်လၟုဟ်ဂှ် ၚုဟ်ကလေၚ်စှ်ေအာ စဵုကဵု (၃၃) ကိုဋ်ဒ္ကေဝ်ရ။
ၚုဟ်ထဝ်အပ္ဍဲဍုၚ်ဝွံ ဟိုတ်နူၚုဟ်ထဝ်ဂၠးတိ စှ်ေဒၟံၚ်အဆက်က်ဂှ်ကီု၊ ဟိုတ်နူဇြဟတ်ရာန်အပ္ဍဲဍုၚ် အောန်ဒၟံၚ်ဂှ်တုဲ ၚုဟ်ကလေၚ်စှ်ေကၠုၚ်ရောၚ်ဂှ် ညးတာလျိုၚ် ဂကောံတၠကမၠောန်ထဝ် ရးဒေသလ္ဂုၚ်မွဲတၠ ဟီုရ။
“အလုံဂၠးတိဂှ် အာဒၟံၚ် နကဵုဒဳဇြေမ်ဗာဗာတ်ဂျက်တုဲ လၟုဟ်ဂှ် ဒှ်ရာသဳၚုဟ်ထဝ်စှ်ေရ။ တုဲပၠန် အပ္ဍဲဍုၚ်ဂှ်လေဝ် ပရေၚ်သွံရာန်ဂှ် အောန်ဒၟံၚ်ကွေံကွေံဏောၚ်။ တုဲပၠန် ထဝ်ညံၚ်ရဴမဇွါဇုက်ဗၠဲလုပ်ကၠုၚ် နူကဵုလ္ပာ်ရးတံဂှ်ဂၠိုၚ်တုဲ ပ္ဍဲကဵုပိုယ်တံဂှ် ထဝ်ဂအုံဒၟံၚ်ဏောၚ်။ စၟတ်လဝ်ကိုန်ဂစိုတ်ဟွံဂွံပုဟ်။ ဇြဟတ်ရာန်အပ္ဍဲဍုၚ်မ္ၚးဍုၚ် နွံဏောၚ်။ ၚုဟ်ဒဝ်ဠာအပ္ဍဲဍုၚ် နွံဏောၚ်။ ၚုဟ်ထဝ်ဂၠးတိ နွံ။ (၃)ဏံ ဆက်စၠောံဒၟံၚ်တုဲ ၚုဟ်ထဝ်ဂၠးတိ တိုန်ကၠုၚ်မ္ဂး ကလေၚ်တိုန်ပၠန်ဏောၚ်။ ၚုဟ်ထဝ်ဂၠးတိဂှ်တှ်ေ ပြဟ်ဟ်ဏံ စှ်ေဒၟံၚ်အဆက်က်ရ။ အဓိကဂှ်တှ်ေ ဇြဟတ်ရာန်၊ ဇြဟတ်သွံရဏောၚ်။ ဇြဟတ်ရာန်ဂှ် ဟွံမွဲဟဂှ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ယဝ်ရၚုဟ်ထဝ်ဂၠးတိကဵု ဇြဟတ်ရာန်အပ္ဍဲဍုၚ် ဆက်အာအတိုၚ်ဏံမ္ဂး စဵုကဵုဂိတုဒဳဇြေမ်ဗာဂှ် ၚုဟ်ထဝ် ထပ်စှ်ေကၠုၚ်မာန်တုဲ ၚုဟ်ဒဝ်ဠာအပ္ဍဲဍုၚ်လေဝ် ထပ်စှ်ေကၠုၚ်မ္ဂး ၚုဟ်နှေန်တံ စှ်ေကၠုၚ်နူဏံ တီတီမာန်ဂှ် ညးဆက်ဟီုရ။
ၚုဟ်ထဝ်ဂၠးတိဝွံ တုဲကၠုၚ်ပ္ဍဲဂိတုအဝ်ဂါတ် သတ္တာဟလက္ကရဴအိုတ်ဂှ် ထဝ်မွဲအံၚ်သ နူကဵုဂွံလဝ်ၚုဟ် ဒဝ်ဠာအမေရိကာန် ၁၉၅၀ ဂှ် အခါလၟုဟ် မွဲအံၚ်သဂှ် ၚုဟ်စှ်ေဒၟံၚ် စဵုကဵု ဗ္ဒါဲ ၁၈၉၀ ဒဝ်ဠာရ။
ဟိုတ်နူၚုဟ်ထဝ်အပ္ဍဲဍုၚ် စှ်ေကၠုၚ်ဂှ်ရ အပ္ဍဲဗွဝ်ဖျာဂှ် ပရေၚ်သွံရာန် ညိၚ်ဒၟံၚ်တုဲ ပရေၚ်လုပ်စိုပ်ဂၠိုက်ဂၠါဲတံဂှ်လေဝ် မွဲဏှမွဲဏှဟီုဂွံ နွံဒၟံၚ်ဂှ် တၠကမၠောန်ထဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ၚုဟ်ဂှ် ဒှ်အာစဵုကဵု ၃၈ ကိုဋ်ကီုလေဝ် ညးမွဲမှ ဟွံသွံရာန်တုဲ ဗွဝ်ဖျာဂှ် ကၟာတ်အာတုဲ စိုပ်ကၠုၚ်ကဆံၚ်ဏံရ။ ဍေံတံ ဂြဲဖျေံဒဝ်ဠာ စဵုကဵုၜိုတ်လဵုမာန်ရော တန်တဴလ္တူဏံတုဲ ၚုဟ်ထဝ်ဂှ်လေဝ် စှ်ေအာကီုရ။ ယဝ်ရဂြဲဖျေံဒဝ်ဠာ ဂၠိုၚ်နူဏံမာန်မ္ဂး ၚုဟ်ထဝ်ဂှ်လေဝ် ထပ်စှ်ေဒၟံၚ်နူဏံဏီဏောၚ်။ ယဝ်ရဂြဲဖျေံဒဝ်ဠာ စဵုကဵု (၃၃၀၀) မာန်မ္ဂး ၚုဟ်ထဝ်ဂှ်လေဝ် ထပ်ညိၚ်အာကီုဏောၚ်။ ဒှ်အာၜိုတ် (၃၂) ကိုဋ်ဏောၚ်။ ဟိုတ်နူလုပ်စိုပ်ဂၠိုက်ဂၠါဲဒၟံၚ်တံ နွံဂှ်ရ ပရေၚ်သွံရာန်ဂှ်တှ်ေ ညိၚ်ဒၟံၚ်ရ” သာ်ဝွံ သ္ဂးရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ ညံၚ်ၚုဟ်ဗၞိက်စၞစသုၚ်သ္ဇိုၚ် ဂွံစှ်ေဂးတုဲ ရပ်ဒက်စၟဳတ် မၞိဟ်သွံတြး သြန်ဍုၚ်သ္အာၚ်တံဂှ်ကီု၊ ကၟာတ်သီလာၚ်ဇြေန်ကမၠောန်တံကီုဂှ် ကၠောန်လဝ်တုဲ မၞိဟ်သွံတြးထဝ်တံကဵု သၟာဗၞိက်ထဝ်လ္ၚဵုတံဂှ်လေဝ် ရပ်ဒက်စၟဳတ်ဒၟံၚ်တံ ကၠောန်ၜိုတ်ဒၟံၚ်ရ။
သ္အာၚ်နူဂှ်ပၠန် ကံၚ်ဇြဳပၞာန်ဂှ် ညံၚ်ၚုဟ်ထဝ် အပ္ဍဲဍုၚ် ဂွံစှ်ေဂးတုဲ အပ္ဍဲကာလတုဲကၠုၚ်တေံ တက်ပ္တိတ်သွံတြးလဝ် ထဝ်ဂတှ်ေဒၚ်္ဂါတံ နွံတုဲ ကဵုဇြဟတ်ဂရိုဟ် ကုကမၠောန်ထဝ်တံတုဲ ကဵုဖအောန်ဖျေံၚုဟ် သွံတြးဒၟံၚ်တံ နွံကီုလေဝ် ၚုဟ်ထဝ်အပ္ဍဲဍုၚ်ဂှ် ဒဵုကဵုအခိၚ်လၟုဟ် ထိၚ်ဒက်ဟွံမာန်ဏီရ။
ပ္ဍဲကဵုဍုၚ်ဗၟာဂှ် ၚုဟ်ထဝ်အပ္ဍဲဍုၚ်ဝွံ ကၠာဂွိုအ်သီအဝဵု ပ္ဍဲလက်ထက်အလဵုအသဳ NLD ဂှ် မွဲဒ္ကေဝ် နူကဵု (၁၃) ကိုဋ်ဒ္ကေဝ်ဓဝ်ဂှ် ကြဴနူသီအဝဵုတုဲ ၚုဟ်ထဝ် သၠုၚ်တိုန်ကၠုၚ်လဝ် ဗ္ဒါဲ (၃) ဆတုဲ ၚုဟ်ထဝ်ဟွံညိၚ်ဝတ်တံလေဝ် က္တဵုဒှ်ဒၟံၚ် လၟေၚ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai