ညံၚ်အကြေပ်ဂြတ်ဍုၚ်ဗၟာ ဟွံဂွံကၠောံထၞာန်အာ ကဆံၚ်ပြဿနာဒေသန္တရမာန် သွက်ဂွံရီုဗၚ်ကဵုဂှ် NLD အာတ်မိက်

လ္ဂုၚ်၊ သေပ်တေမ်ဗာ (၂၈)

ညံၚ်အကြေပ်ဂြတ်ဍုၚ်ဗၟာ ဟွံဂွံကၠောံထၞာန်အာ ကဆံၚ်ပြဿနာဒေသန္တရမာန်ဂှ် နကဵုကၟိန်ဍုၚ်မဟာမိတ်တံကဵု ပွဳူဗွိုၚ်ဍုၚ်သ္အာၚ်တံ ညံၚ်ဂွံရီုဗၚ်ကဵုအိုတ်ညိဂှ် ဗော်NLD အာတ်မိက်လဝ်ရ။

ပ္ဍဲဂိတုသေပ်တေမ်ဗာ၊ စၟတ်တ္ၚဲ(၂၇) တ္ၚဲဒက်ပ္တန်ဗော် NLD ပေၚ်(၃၅)သၞာံဂှ် ဂအုပ်ဂကောံဒဳမိုကရေဇြဳကောန်ဂကူ ကဝ်မတဳကမၠောန်ဗဟဵု NLDဂှ် လလောၚ်တြးအာတ်မိက်လဝ်ရ။

ပ္ဍဲတၚ်လလောၚ်တြးဗော် NLD ဂှ်တှ်ေ ပါလုပ်သီုဥက္ကဌဗော် ဒဝ်အံၚ်သာန်သုကျဳ ဒးဒုၚ်ရပ်ဒက်လဝ်တံကဵု ကောန်ထံၚ်ပရေၚ်ဍုၚ်ကွာန်သီုဖအိုတ် ညံၚ်သ္ဂောံဗၠးၜးသီုညးဖအိုတ်ကေုာံ ညံၚ်ညးဍုၚ်ကွာန်ဒးဘဲပၞာန်တံ သ္ဂောံဂွံအရီုဗၚ်ပရေၚ်ဗ္စာရဏာမၞိဟ်တံလေဝ် ပါလုပ်မံၚ်ရ။

သ္အာၚ်နူဂှ်ပၠန် ညံၚ်သ္ဂောံဒေါံဒေၚ်ကဵု ပွဗ္တိုက်စွံပွန်လ္တူကောန်အရာပ်တံကဵု သွက်အခေါၚ်သ္ပစၞးကၟိန်ဍုၚ်ဗၟာ ပ္ဍဲကုလသမဂ္ဂဂၠးကဝ်ဂှ် ညံၚ်သ္ဂောံဆက်သ္ပကဵုစၟတ်သမ္တီ ကုအမာတ်ကလုတ်ဥူကျဝ်မိုဝ်ထောန် ပအပ်ခါန်ကၞက်လဝ် ပ္ဍဲလက်ထက်အလဵုအသဳညးအရာပ်တံဂှ်လေဝ် NLD ဖ္တိုက်ဖ္အောဝ်လဝ်ရ။

ပ္ဍဲကာလသီအဝဵုဂှ် ကောန်ဂကောံ NLD ဗ္ဒါဲ ၁၈၀၀ ဒးဒုၚ်ရပ်ထိၚ်လဝ်တုဲ၊ ကောန်ဂကောံ (၉၇)တၠ ဒးဒုၚ်ဂစိုတ်လဝ်တုဲ သ္ၚိဒၟံၚ်ကောန်ဗော် ၃၇၀ မပြၚ်တံ ဒးဒုၚ်ကၟာတ်လဝ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဗော် NLD ရ။

ဂကောံပၞာန်တံဂှ် ၜက်ၜေတ်လုပ် ဂအုပ်ရုၚ်ဗဟဵုဗော် NLD မပါလုပ် ဂအုပ်ရုၚ်ဂကောံအဆံၚ်ၚ်တံတုဲ ဒးဂဗလဝ် ကုပွကၠတ်ယိုက်ပ္တိတ်ကပေါတ်တံ၊ ပွဖံက်ဗ္တိုဟ်ပလီုပလာ်တံ ကေုာံ ပွစံၚ်ပလီုပလာ်တံ (၁၆၀)ဝါရဂှ် သ္ဂးရ။

ပြဟ်ဟ်ဏံဂှ်တှ်ေ နကဵုဗော် NLDဂှ် သုၚ်စောဲ ပလက်ဝှမ် ဒဳဂျေတ်ဒေဝ်အောန်လာၚ်တံတုဲ ပကောံပကေဝ် ဇြဟတ်ဂအုပ်ဂကောံ၊ ကောန်ဂကောံတံတုဲ ကၠောန်ဗဒှ်လဝ် ကောံဓရီုကဝ်မတဳဗဟဵု စဵုကဵုဗၞတ်(၃)ဝါတုဲ ဖျေံစၟတ်ထ္မံက်မံၚ်ရုပ်ရဴ ကုလၟေၚ်ကမၠောန်အဓါန်ဂတဗော်တံရဂှ်လေဝ် ဟီုဂးလဝ်ရ။

ကုအခန်ကၞာစၟတ်သမ္တီ တ္ၚဲဒက်ပ္တန်ဗော် ဂအုပ်ဂကောံဒဳမိုကရေဇြဳကောန်ဂကူ ပေၚ်(၃၅)သၞာံဂှ် ကဝ်မတဳသ္ပစၞးကၠတ်ထဝ်ကၟိန်ဍုၚ်(CRPH)ကေုာံ ကံၚ်ဇြဳကဵုကသပ် ပရေၚ်ညဳသၟဟ်ဂကူ (NUCC)တံလေဝ် ပလံၚ်ဗ္စိုပ်လဝ်လိက်သဝဏ် မိပ်စိုတ်တံရ။

ပရိုၚ်-သြၚ်လောန်တိုၚ်မ်

ဗီု-Social Media