သွံ Sim Card ဟွံပ္တိုန်လဝ်အခေါၚ်တံဂှ်မ္ဂး ကေတ်ဒုဟ်ဖျေံထံၚ်ဏောၚ် ကံၚ်ဇြဳပၞာန် ကဵုသတိ

နေဗျဳဒဝ်၊ သေပ်တေမ်ဗာ (၂၈)

ပ္ဍဲအရာသွံတြး Sim Card ဟွံပ္တိုန်လဝ်အခေါၚ်တံကီု၊ လှဲပြံၚ်တံကီုဂှ် ယဝ်ရကလေၚ်ပ္တိုန်လဝ်အခေါၚ်ဟွံမွဲမ္ဂး ကေတ်အာဒုဟ် ကုမိုဝ်ဗိုၚ်အဝ်ပရေတာတံကဵု ညးစၞးသွံတြးတံ နကဵုၝောံပိုဒ် (၇၂) သၞောဝ်ဆက်စၠောံဂှ်ဏောၚ်ဂှ် ကံၚ်ဇြဳပၞာန် လလောၚ်ပ္တိတ်ကၠုၚ် ပ္ဍဲဂိတုသေပ်တေမ်ဗာ (၂၅) တေံရ။

ဆေၚ်သွံ မိုဝ်ဗိုၚ်အဝ်ပရေတာဂမၠိုၚ်၊ ညးစၞးသွံတြး မချုက်လဝ်လိက်ဗွဲမလုပ်သၞောဝ် ကုအဝ်ပရေတာတံဏံဂှ်ကဵု ဆေၚ်ဖျာဂမၠိုၚ်ဝွံ ပ္တိုန်အခေါၚ် နကဵုတၚ်စၞောန် စပ်ကဵုပရေၚ်ပ္တိုန်အခေါၚ် မၞိဟ်ရပ်စပ်တံဂှ်တုဲမှ သွံတြးကဵု Sim Card တံဂွံဏောၚ်ဂှ် သ္ဂးရ။

ပ္ဍဲအရာသွံတြးတံဂှ် Sim Card သွံတြးအာတၟိတၟိတံကဵုဒှ်၊ Sim Card တြးလဝ်လၟုဟ်တံကဵုဒှ် ပါလုပ်သီုဖအိုတ်ရောၚ်ဂှ် ဌာနဝန်ဇၞော်ဆက်စၠောံ ကေုာံ ပလံၚ်ဗစိုပ် ကံၚ်ဇြဳပၞာန် ကဵုလဝ်သမ္တီရ။

ညးလဵုမွဲဟွံဟီု Sim Card ပ္တိုန်လဝ်အခေါၚ် အတိုၚ်တၚ်စၞောန် စပ်ကဵုပ္တိုန်စရၚ်မၞိဟ်ရပ်စပ်တံဟွံမွဲဂှ်ကီု၊ လီဠာန်တုဲ ပ္တိုန်လဝ်အခေါၚ်ဂှ်ကီု ဟွံသေၚ်မ္ဂး Sim Card ဟွံပ္တိုန်လဝ်အခေါၚ်တံဂှ် သွံတြးဟွံဂွံပုဟ်ဂှ် စၟတ်လဝ်ရ။

သ္အာၚ်နူဂှ်ပၠန် ညးလဵုဟွံဟီု ပ္ဍဲအရာလှဲပြံၚ်ကေတ် Sim Card မပ္တိုန်လဝ်စရၚ် ဗွဲမကိတ်ညဳကဵု တၚ်စၞောန်စပ်ကဵုပရေၚ်ပ္တိုန်စရၚ်မၞိဟ်ရပ်စပ်တံဂှ်မ္ဂး ဒးကလေၚ်ပ္တိုန်အခေါၚ် နကဵုတၚ်နၚ်မၞိဟ်ဒုၚ်တဲဂှ် ဍာံဍာံဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ယဝ်ရစၟဳတ်ဂွံဆဵုကေတ် ဒဒှ်ရဝးပ္ကဝ်ကလိလောန်ဒး အရာမစၟတ်လဝ် မပါလုပ်ပ္ဍဲကဵုတၚ်နၚ်တံဏံ မွဲမွဲဂှ်မ္ဂး လ္ဂောံကဵုသၞောဝ်ပရေၚ်ဆက်စၠောံ ၇၂ ဂှ် ဒဏ်ထံၚ်ဟွံပဵုနူကဵု ၆ ဂိတုကဵုဒှ်၊ ဒဏ်သြန်ကဵုဒှ် ဖျေံစၟတ်အာ သီုၜါဒဏ်ဏောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။

ညးမပါလုပ်ဒၟံၚ် ပ္ဍဲပၠန်ဂတး နဒဒှ်မၞိဟ်ထံက်ပလံၚ်မွဲဂှ် နကဵုကံၚ်ဇြဳပၞာန် လလောၚ်ပ္တိတ်လဝ် သာ်ဏံဂှ်ဝွံ ညံၚ်သြန်လုပ်ပရေၚ်ပၠန်ဂတး ဂွံဒေါအ်အာဂှ်ကီု သွက်ဂွံရပ်စပ်တံဂှ်ကီုတုဲ ကၠောန်လဝ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ အဓိကဂှ်တှ်ေ သြန်လုပ်ဒၟံၚ်ပ္ဍဲပၠန်ဂတးပိုယ်တံဂှ် ဍေံတံ (စကစ) မိက်ဂွံကဵုဒေါအ်အာ ဒှ်သဘဴဏံရ။ ဍေံတံဗက်ကေတ် နူကဵုဏံတုဲ ကၠောန်ကၠုၚ်သွက်ဂွံရပ်စပ်ရဏောၚ်။ လ္တူနူပရေၚ်လီဠာန်ဂှ် ဒှ်သဘဴမိက်ဂွံဗဒေါအ် သြန်လုပ်ပရေၚ်ပၠန်ဂတးတံတုဲ ကၠောန်လဝ်ရ” သာ်ဝွံ ညးသ္ဂးရ။

ကံၚ်ဇြဳပၞာန်ဂှ် ပ္တိုန်လဝ်စရၚ် Sim Card တံ ချိုတ်တ်ပၠိုတ်တ် ဟွံမွဲမွဲသာ် ဟိုတ်နူရာန်သုၚ်စောဲကေတ်မာန်ဂှ်ရ ညးရာန်သုၚ်စောဲတံဂှ် မ္ၚးနူကဵုပရေၚ်ရေၚ်တၠုၚ်သြန်လှုဲ ဆက်စၠောံလဝ်ကဵု Sim Card ဏံတုဲ သုၚ်စောဲဒၟံၚ်တံဂှ်သၟးဟွံက သီုကဵုဒးဒုၚ်လီဠာန် ပ္ဍဲကဵုပရေၚ်ရေၚ်တၠုၚ်အောန်လာၚ်တၞဟ်ဟ်တံမာန်ဂှ်ရ ပ္ဍဲအရာဖအိုတ်ကၠေံ အမှုရာဇဝတ်တံဂှ် အခက်အခုဲနွံကၠုၚ်မာန်ရောၚ် သ္ဂးရ။

ရပ်စပ်စကာ Sim Card ဟွံပ္တိုန်လဝ်အခေါၚ်တံဂှ်တုဲ နူကဵုဇာဇၞိက်ဆက်စၠောံတံဂှ် ဟိုတ်နူကၠောန်ကၠုၚ် အမှုရာဇဝတ်တံ၊ ပရေၚ်ပကီုပရာပ်တံ ကေုာံ ပရေၚ်သ္ပအန္တရာယ်ဘပဠတံ သာကၠောန်ကၠုၚ်ဂှ်ရ သ္ကဵုဇီုကပိုက်တဴ ပရေၚ်ညိၚ်ဝတ်ကၟိန်ဍုၚ်ကဵု ပရေၚ်သၞောဝ်အုပ်လဒံတံရောၚ်ဂှ် ကံၚ်ဇြဳပၞာန် လလောၚ်ပ္တိတ်လဝ်ရ။

ညးချဳဒရာၚ်ပရေၚ်ဒဳမဝ်ကရေဇြဳ ကိုဝ်မေန်တိုဲတေတ်ဂှ် နကဵုကံၚ်ဇြဳပၞာန် ဇၟာပ်ဇၟာပ်ဒၞါဲ ရံၚ်ကဵုမတ်ဂီုကၠီုတုဲ ဟိုတ်နူမိက်ဂွံသၞောတ်ဗ္ၜတ်ကၠေံ ကလောန်ဂကောံဒစဵုဒစး ကုဍေံတံဂှ်ရ ကၠောန်လဝ်သာ်ဏံရောၚ်ဂှ် ထံက်ထ္ၜးလဝ်ရ။

“ ဇၟာပ်ပ်ဒၞါဲ ဍေံတံ (စကစ) ရံၚ်ကဵုမတ်ဂီုကၠီုသၟးတုဲ ထိၚ်ဒၟံၚ်ရ။ ဒှ်သာ်လဵုရောဟီုတှ်ေ ဍေံတံမိက်ဂွံထိၚ်လဝ်အဝဵုဂှ်ကီု၊ သီုကဵုမိက်ဂွံသၞောတ်ဗ္ၜတ်ကၠေံ ဂကောံဒစဵုဒစးဍေံတံဂှ်ရ ထ္ၜးဟိုတ်ကုပရေၚ်ဂီုကၠီုတုဲ ထ္ၜးဟိုတ် ကုယၟု ဍေံတံမရပ်စပ်ကၠုၚ်ဒၟံၚ်လၟိုန် သီုကဵုပရေၚ်ဍုၚ်ကွာန်ၜိုဟ်သြိုဟ်သာယာတံဂှ်တုဲ ဍေံတံ ထိၚ်ဒက်လဝ်ရ” သာ်ဝွံ ညးသ္ဂးရ။

ကံၚ်ဇြဳပၞာန်ဝွံ ထံၚ်ပရိုၚ် တၚ်နၚ်ပရိုၚ်စပ်ကဵုပရေၚ်ချဳဒရာၚ် သၟာပၠန်ဂတး မပါလုပ်ဒၟံၚ် ပ္ဍဲပၠန်ဂတးက္ညၚ်ဏံဂှ်တုဲ အကံက်ဗာန်၊ ဂၞန်ဖုၚ် ကေုာံ အကံက်သြန်မိုဝ်ဗိုၚ် ရဲကၠောန်ဒၟံၚ်ထံက်ပလံၚ်ဂမၠိုၚ် မရပ်စပ်ဒၟံၚ်တံဂှ် ကၟာတ်သီလဝ်တံလေဝ် နွံဒၟံၚ်ရ။

အတိုၚ်တၚ်လလောၚ်တြး အဝ်ပရေတာပရေၚ်ဆက်စၠောံအပ္ဍဲဍုၚ်မ္ဂး ပ္ဍဲဍုၚ်ဗၟာ မၞိဟ်ရပ်စပ် Sim Card နာနာသာ်ဂှ် နွံဒၟံၚ် (၆၃) ပြကောဋိကိုဋ်တုဲ အခိၚ်လၟုဟ်ဂှ် ဒပ်ပၞာန်ထိၚ်ဒက်လဝ် ဖုၚ်အဝ်ပရေတာအပ္ဍဲဍုၚ်တံရ။

ကံၚ်ဇြဳပၞာန်ဝွံ သွက်ဂွံကၠတ်ကလၚ်ရပ်စပ် တၚ်နၚ်ပရေၚ်ဆက်စၠောံ မၞိဟ်ဒစဵုဒစးဍေံတံဂှ်ကီု၊ ကုတ်ထပိုတ်ကီု၊ ထိၚ်ဒက်သၞောတ်ဗ္ၜတ်တံကီုဂှ်တုဲ အပ္ဍဲဂိတုမာတ် သၞာံဏံဂှ် စၞောန်ပျးလဝ် နဲဥပဒေဗ္တိုက်သ္အးပကီုပရာပ်တံရ။

ပရိုၚ်−သြၚ်လောန်တိုၚ်(မ်)

ဗီု−AFP