ဒပ်ပၞာန်ပန်ဖျေံလွဟ်ဇၞော် ပ္ဍဲဘာပရေၚ်ပညာခမဳသၚ်ဗ္တောန် ကောန်ၚာ် (၁၈)တၠ ဒးလဝ်ဘဲဝပ်

ဝေါန်တိုဝ် – သေပ်တေမ်ဗာ(၂၉)

ရးဒေသသေတ်ဂါၚ်၊ ပွိုၚ်ဍုၚ်ဝေါန်တိုဝ် ဘာတိုက်ခန္တဳဝံသာရာမ မၞုံအရာပ်ဘူတာ ကွာန်ဂျိုဝ်ထောၚ်ဂှ် ကံၚ်ဇြဳပၞာန် ခ.မ.ရ – ၁၀၂ ပန်ဖျေံလဝ်လွဟ်ဇၞော် ဟောၚ်ဝေစ်ဇြာ(Howitzer) ဟိုတ်နူဒတုံစှ်ေပါ်ခတိုဟ်လဝ် ပိမတုဲ ကောန်ၚာ် (၁၈)တၠ ဒးလဝ်ဘဲဝပ်တုဲ ဒးဆေၚ်ဒၟံၚ်မုက်ကဵု အကာဲအရာဒးဒှ်ဓဝိၚ် (၆) တၠရဂှ် ဌာနဝန်ဇၞော် NUG လလောၚ်တြးလဝ် ပရိုၚ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၂၇) အခိၚ်ဒေါဝ်တ္ၚဲဂှ် ပန်ပှော်ဖျေံလဝ်တုဲ အခိၚ်လွဟ်ဇၞော်ဒတုံစှ်ေပါ်ခတိုဟ်လဝ်ဂှ် ဒှ်အခိၚ်ကောန်ၚာ် နူကွာန်ဂျိုဝ်ထောၚ်တအ် ဗ္တောန်ဒၟံၚ်ပညာ ပ္ဍဲဘာလကျာ်ရဂှ် ဟီုလဝ်ရ။

ပ္ဍဲကဵုဘာလကျာ် ကောန်ၚာ်ဗ္တောန်ကေတ်ဒၟံၚ်ပညာဂှ် ဟွံပါ်ပါဲသွာၚ်ညးအရာပ် သွာၚ်ပၞာန်မွဲသာ် ဟိုတ်နူပန်ဖျေံလဝ်လဝ်လွဟ်ဇၞော်တုဲ ကောန်ၚာ်တအ် ဇီုကပိုက်ဒးလဝ်ဘဲဝပ်ရ။

ကမၠောန်ပြဝဏံဂှ် ဒှ်ပရေၚ်ပရောထ္ၜးပျးဒၟံၚ်သ္ပပြာကတ်ဒၟံၚ် ဒဒှ်ရဂကောံပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် က္ဍိုက်လဝ်က္ဍိုပ် ကလိလောန်ဒၟံၚ် ဒုဟ်ရာဇဝတ် မွဲရဂှ်လေဝ် ဌာနဝန်ဇၞော်ပရေၚ်စဵုဒၞာ NUG ဟီုလဝ်ရ။

ပ္ဍဲဂိတုသေပ်တေမ်ဗာ သၞာံတုဲကၠုၚ်တေံလေဝ် ဟိုတ်နူကံၚ်ဇြဳပၞာန် ပန်ဖျေံလဝ် ပ္ဍဲဘာဗ္တောန်လိက် ကွာန်လေတ်ယေတ်ကုမ် နကဵုက္ၜၚ်ကျာတုဲ ပါလုပ်သီုကောန်ၚာ် မၞိဟ်ဇၞော် ဒးချိုတ်လဝ် (၁၃)တၠရ။

သ္အာၚ်နူဂှ်ပၠန် ပ္ဍဲဂိတုဨဗြဴ စၟတ်တ္ၚဲ (၁၁) ဂှ်လေဝ် ဟိုတ်နူကံၚ်ဇြဳပၞာန် ဗတိုက်လဝ်ကွာန်ပဇြဳဂျဳ ကဵုက္ၜၚ်ကျာတုဲ ပါလုပ်သီုကောန်ၚာ်၊ ညးဗြဴမၞုံကဵုယဲဒိုက် ကေုာံညးဗြဴ ညးဍုၚ်ကွာန်တအ် ဒးချိုတ်လဝ် (၁၆၈)တၠရဂှ် NUG လလောၚ်တြးလဝ်တုဲ ပ္ဍဲကဵုတၚ်ဂၞၚ်ဒေသတအ်ဂှ် ဒးချိုတ်လဝ် (၁၇၄)တၠဂှ် ဟီုလဝ်ရ။

ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲ သ္ကုတ်လကြဴဏံ ပ္ဍဲကဵုရးသေတ်ဂါၚ်ဂှ် ဟိုတ်နူဗတိုက်ကဵုက္ၜၚ်ကျာ၊ ပန်ဖျေံလွဟ်ဇၞော် ကေုာံထ္ပက်ဒၟံၚ်ကရောၚ်ပၞာန် ပ္ဍဲဗလးမုက်တိတုဲ ညးဍုၚ်ကွာန် ဗ္ဒာဲ (၂၀၀၀) ဒးချိုတ်လဝ်ရဂှ် ဓမံက်ထ္ၜးလဝ် ပ္ဍဲဂကောံမၚ်မွဲရံၚ်စံၚ် ကောန်ထံၚ်ပရေၚ်ဍုၚ်ကွာန် AAPP ရ။

ပရိုၚ် – သြၚ်လောန်တိုၚ်(မ်)

ဗီု – ပရေၚ်ထံက်ပၚ်ညးပါဲဘဲပၞာန်ဒဳပေဝ်ယေန် (ဘာဗ္တောန်လိက်လေတ်ယေတ်ကုန် ဃောဒးဒုၚ်ပန်လဝ်ကဵုက္ၜၚ်ကျာ)