မတ်မလီု၊ သေပ်တေမ်ဗာ(၂၉)
ပ္ဍဲတွဵုရးဍုၚ်မန်ဂှ် ဟိုတ်နူရာသဳဥတုအပြံၚ်အလှာဲက္တဵုဒှ်မံၚ်ပြဟ်ဟ်ဏံဂှ်တုဲ ပါလုပ်သီုကောန်ၚာ်တံကီု၊ မၞိဟ်ဇၞော်ဇၞော်တံကီုဂှ် က္တဵုဒှ်ယဲမတ်ဂိဂၠိုၚ်မံၚ်ရဂှ် အ္စာဂဥုဲတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ယဲမတ်ဂိဂှ် က္တဵုဒှ်ဟိုတ်နူစၟယဲဗိုၚ်ရာတ်မွဲဂကူတုဲ ဟိုတ်နူပရေၚ်ကၠောံထၞာန်က္တဵုဒှ် နူကျာမွဲကဆံၚ်ဂှ်ရ ဒမြိပ်ကၠောံထၞာန်မြက်ဇက်တုဲ ပ္ဍဲဒေသဂှ် ပရေၚ်က္တဵုဒှ်ဂၠိုၚ်ကၠုၚ်ရ။
အ္စာဂဥုဲမွဲတၠဂှ်တှ်ေ ယဲမတ်ဂိဂှ် သ္ဇက်ဂွံဒးဂွိၚ်ဟၟဲကီုလေဝ် အဃောဒှ်မံၚ်ယဲဂှ် ဒးဝေၚ်ပါဲ ပွဗဵုဖုၚ်တံကဵု ပွစုက်လုက်ကုလျးစၚ်ၚ်တံ ထေက်ရောၚ်ဂှ် ကဵုလဝ်ကသပ်ရ။
“ပ္ဍဲတ္ၚဲအကြာတံဏံဂှ် ဟိုတ်ရာသဳဥတုက္တဴက္တာန်ကၠုၚ်ကွေံကွေံတုဲ ဒှ်ကၠုၚ်ရ။ ဂကူစၟဗိုၚ်ရာတ်ရဏောၚ်ဟီုတှ်ေ ဗိုၚ်ရာတ်ကၠောံထၞာန်နူကျာမွဲကဆံၚ်ရ။ ဒမြိပ်ကၠောံထၞာန်ဂှ် မြက်မံၚ်ရ။ ကၠေက်ဒးနကဵုတဲတံ၊ ဗလာ်တံ၊ ဗတဳတံ ဟွံသ္အးဇ္ၚးမ္ဂး ကၠောံရ။ ပရေၚ်က္တဵုဒှ်ဂှ် ဂၠိုၚ်မံၚ်ရ။ ဆ္ဂး ဒှ်စလေပ်မံၚ်ရ။ သ္ဇက်ဂွံဒးဂွိၚ်ဂှ် ဟွံမွဲပုဟ်။ ဍေံဂှ် ဒှ်ယဲလေပ်က္တဵုဒှ်စ ဓမ္မတာမွဲရ။ အဃောဒှ်မံၚ်ဂှ်တှ်ေ ဗဵုဖုၚ်ဟွံထေက်ပုဟ်။ ဗဵုဖုၚ်ဂၠိုၚ်တံ၊ ဒးလျးစၚ်ၚ်ဂၠိုၚ်တံ၊ ဒးကျာဂၠိုၚ်တံတှ်ေ ဟွံဗၠးမွဲသာ် ဖဵုပရေံပရေံတၞဟ်ဟ် ဒှ်ကၠုၚ်လေပ်ရ။ပွဒးကောန်မတ်တံ၊ ကောန်ကတေၚ်ဆီမတ်တံ ဗ္တိုဟ်အာတံ ဒှ်စလေပ်ရ” သာ်ဝွံ သ္ဂးရ။
ယဲမတ်ဂိဂှ် အောန်အိုတ်နူ (၃)တ္ၚဲ စဵုကဵုမွဲသတ္တာဟ ဒှ်လေပ်တုဲ ယဝ်ရဟွံစုတ်ဂဥုဲမတ်၊ ဟွံသုၚ်ဂဥုဲမ္ဂး သွက်ဂွံဗၠးဂှ် အခိၚ်လအ်မာန်ရ။ အ္စာဂဥုဲမွဲတၠဂှ်လေဝ် ယဲမတ်ဂိဂှ် ဒှ်မံၚ်အယဲဟွံရုဲတုဲ ယဝ်ရဆဵုလက္ချန်ယဲမ္ဂး ထ္ၜးရုၚ်ဂဥုဲဗွဲမပြဟ်မှဟေၚ် ဒမြိပ်ကၠောံထၞာန်တံ ယအ်စှ်ေကၠုၚ်ရောၚ်ဂှ် ဟီုရ။
“လၟုဟ်ဂှ် ကောန်ၚာ်၊ မၞိဟ်ဇၞော်ဇၞော် ဒှ်မံၚ်အယဲဟွံရုဲရ။ ဒးစွံသတိကဵု ညးလက္ချန်ယဲမတ်ဂိတံနွံဂှ်ရ။ ဥပမာ- မတ်ဂှ်ဍာဲမံၚ်၊ အိက်မတ်တိတ်ဂၠိုၚ်မံၚ်ဏောၚ်ဟီုတှ်ေ တံဏံဂှ်ဗွဲအပြောံ မတ်ဂိမံၚ်ရဂှ် စၟတ်ဂွံရ။ ညးလက္ချန်ယဲ ဟွံထ္ၜးစကွေံကွေံဂှ်တှ်ေ ဍာ်ရမတ်တိတ်ဏောၚ်၊ ဍေံဟွံဒှ်ပက္ကတိပုဟ်၊ ၜိုတ်ဏံရ။ ဒှ်ဗီုဏံဏောၚ်တှ်ေ ယာတ်ဇိုတ်မုက်ဂွံ လ္ပာ်ပရအ်သုၚ်စောဲညိ။ မတ်ဂှ် လ္ပရပ်ကဵုတဲညိ။ ဒှ်ယျဟီုတှ်ေလေဝ် ထ္ၜးရုၚ်ဂဥုဲ၊ စုတ်ဂဥုဲမတ်ညိ ဗီုဏံတှ်ေ ဒမြိပ်ကၠောံထၞာန်ဂှ်လေဝ် အောန်အာရလေဝ်” သာ်ဝွံ သ္ဂးရ။
ယဝ်ရဒှ်ယဲမတ်ဂိမ္ဂး ဂဥုဲမတ်မဂ္ဗနူဆေၚ်ဂဥုဲတံတှ်ေတုဲဂှ် စုတ်ဟွံထေက်တုဲ ညံၚ်ဟွံဂွံဒှ်အန္တရာယ်ဂှ် သဳကၠဳကုအ္စာဂဥုဲတံ တုဲမှဟေၚ် စုတ်ဂဥုဲသွက်ယဲမတ်ဂိတံ ထေက်ရောၚ်ဂှ် အ္စာဂဥုဲတံ ဖ္တိုက်ဖ္အောဝ်လဝ်ရ။
ယဲမတ်ဂိဂှ် ဟိုတ်နူကၠောံထၞာန်မာန် ဗွဲမလောဲသွာဂှ်ရ ညံၚ်ယဲဟွံဂွံကၠောံထၞာန်ဂှ် ညံၚ်ဟွံဂွံပရအ်သုၚ်စောဲ ကပေါတ်အရပ်စပ် ညးဒှ်မံၚ်ယဲမတ်ဂိတံဂှ်ကဵု ညံၚ်ဟွံဂွံအာဝေၚ်ဍာ် ပ္ဍဲကၟာဍာ်ညးဂမၠိုၚ်အာကၠုၚ်မံၚ်တံဂှ်လေဝ် နွံပၟိက်မံၚ်ရ။
ပ္ဍဲတွဵုရးဍုၚ်မန်ဂှ်တှ်ေ ယဲမတ်ဂိတံဂှ် လေပ်က္တဵုဒှ် ပ္ဍဲအရာပ်ကေုာံကွာန်လ္ၚဵုတံဂၠိုၚ်တုဲ ဒှ်ယျဟီုမ္ဂးလေဝ် ဒှ်မံၚ်အကာဲအရာဒးဒုၚ်ကၠောံထၞာန်မံၚ် အလုံမွဲဂကောံသ္ၚိကၟိန်တံရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai