သၞေဟ်ကၚ်စၟဳတ်တၞၚ်သဳ ဒးဒုၚ်ဗ္တိုက်တုဲ ဗိုလ်အကြာပ်မွဲတၠပါလုပ်ဂှ် ၂ တၠ ချိုတ်အာ

တၞၚ်သဳ၊ သေပ်တေမ်ဗာ (၂၉)

ဟိုတ်နူသၞေဟ်ကၚ်စၟဳတ် မၞုံဗ္ဒါဲကွာန်ညံၚ်ပေန်ကွေန်၊ ပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳ ဒးဒုၚ်ဗ္တိုက်ဂှ်တုဲ သီုကဵုပါလုပ် ဗိုလ်အကြာပ်ကံၚ်ဇြဳပၞာန်မွဲတၠဂှ် (၂) တၠ ချိုတ်အာလဝ်ရောၚ် ဂွံတီကေတ် နူကဵုဂကောံဒပ်ဒမၠုက်ဟွံဗက်လ္ပာ်တံရ။

ပ္ဍဲဂိတုသေပ်တေမ်ဗာ ၂၈ အခိၚ်ဇိုၚ်သဝ်တ္ၚဲ ၜိုတ် (၅) နာဍဳဂှ် ဂကောံဒပ်ပံၚ်ကောံစဵုဒၞါဒေသတံ အာစိုပ်ဗ္တိုက်လဝ် သၞေဟ်ကၚ်စၟဳတ် ဒၞါဲကောန်ဒပ်ကံၚ်ဇြဳပၞာန် ဟွံအောန်နူကဵု ၁၀ တၠ ဖျေံဗ္ဒိုပ်မံၚ်တန်တဴဒၟံၚ်ဂှ်ရ။

ဟိုတ်နူပရေၚ်ဗ္တိုက်ဂှ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ် ၂၀ မိနေတ်တုဲ လ္ပာ်ကံၚ်ဇြဳပၞာန်တံ ဇီုကပိုက်ချိုတ်အာတံ နွံလဝ်ရ။

အပ္ဍဲပရေၚ်ပန်ပှော်ဂှ် ဗိုလ်အကြာပ်မွဲတၠ ကဵု ကောန်ဒပ်မွဲတၠ နူကဵုဒပ်ကံၚ်ဇြဳပၞာန်တံ ချိုတ်အာလဝ်တုဲ ကောန်ဒပ်မွဲတၠ ကလိဂွံလဝ်ဝပ်ရောၚ် ညးတာလျိုၚ် ဂကောံဒပ်ဒမၠုက်ဟွံဗက်လ္ပာ်မွဲတၠ ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

ကြဴနူပရေၚ်ပန်ပှော်ဂှ်တုဲ နူကဵုတမ်ဒပ် ခမရ စၟတ် (၅၆၁) ဖျေံသ္ဇိုၚ်တၞၚ်သဳတံ ပန်ပှော်လဝ် လွဟ်ဇၞော် လ္ပာ်ကွာန်ညံၚ်ပေန်ကွေန်တံဂှ်ကီုလေဝ် ဇီုကပိုက်လီုလာ်ကလိဂွံဝပ်တံ ဟွံမွဲပုဟ်ဂှ် ဂွံတီကေတ် အတိုၚ်ဂလာန် ညးဒေသတံရ။

သၞေဟ်ကၚ်စၟဳတ် ကံၚ်ဇြဳပၞာန် မဒးဒုၚ်ဗ္တိုက်ဂှ်ဝွံ ကောန်ဒပ် နူကဵုဒပ်ခမရ ၅၆၁ တံ ဖျေံသ္ဇိုၚ်တုဲ ရပ်ဒက်စၟဳတ် ရဲအာကၠုၚ်တံဂှ်တုဲ ဒယှ်ဒၟံၚ် နကဵုယၟုပရေံပရေံ နဒဒှ်သၞေဟ်ကၚ် ဘပဠကံက်ဒၟံၚ်သြန်မွဲရ။

ပရေၚ်ဗ္တိုက်ဏံဂှ် ဂကောံဒပ်ဒမၠုက်ဟွံဗက်လ္ပာ်၊ တမ်ဒပ်ခရိုၚ်ဗိက် ၂ ကေုာံ ကောန်ဂကောံ SWDF တံ ကၠောန်သ္ပလဝ်ရောၚ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−Tanitharyi PDF