ထိုၚ်ဝါန်၊ သေပ်တေမ်ဗာ (၂၉)
ထိုၚ်ဝါန်ဝွံ နဒဒှ်လဂါံဇိုၚ် သ္ကဵုဒှ်ဇြဟတ် ကုပရေၚ်တဝ်စၞေဟ် ပွပလာပ်ပထုဲတာဒၞါ ကေုာံ ပရေၚ်စဵုဒၞါတ္ကအ်တံဂှ်တုဲ ပ္ဍဲဂိတုသေပ်တေမ်ဗာ (၂၈) ဂှ် ထ္မံက်ပ္တိတ်ထ္ၜးပျးလဝ် က္ၜၚ်ဗၠိုပ်ဍာ် ကၠောန်ပ္တိတ်နူအပ္ဍဲဍုၚ်ကိုပ်ကၠာအိုတ်ရ။
ကြုက်ဝွံလေဝ် သွက်ဂွံကလေၚ်ဂွံ အဝဵုအပိုၚ်အခြာခိုၚ်ၚ်ဗိုန်န် ကုထိုၚ်ဝါန် မစၟတ်လဝ် နဒဒှ်တိဍာ်တွဵုဒၞက်ဍေံဂှ်တုဲ ကၠောန်ဒၟံၚ် ပရေၚ်ပ္ကတ်ပ္ကေၚ်ပရေၚ်ပၞာန်တံ လၟေၚ်ဒဒှ်တ္ၚဲရ။
ပ္ဍဲကဵုအကာဲအရာဏံဂှ် ထိုၚ်ဝါန်ဝွံလေဝ် ညံၚ်ဂကောံရပ်လွဟ်ဍေံတံ ဂွံဂတာပ်ခေတ် တောတက်ဂှ်တုဲ စၟတ်ကေတ် နဒဒှ်လစှ်ေပရဝ်ဂျက်မၞုံကဵုတၚ်ရန်တၟံဇၞော်ဇၞော်မွဲတုဲ ပ္တိတ်ဒၟံၚ်ဇြဟတ်ရ။
သမ္မတထိုၚ်ဝါန် သာၚ်အေန်ဝါန် မစကေတ်လဝ်တာလျိုၚ် ပ္ဍဲသၞာံ ၂၀၁၆ တေံဂှ် ဒှ်မၞိဟ်စလဝ် အစဳဇန်ဏံတုဲ ပ္ဍဲဂိတုသေပ်တေမ်ဗာ (၂၈) ဂှ် က္ၜၚ်ဗၠိုပ်ဍာ်တၟိ ပၞောဝ်ကဵုဒ္စါံဖ္ဍိုက်ဂှ် ထ္ၜးပျးလဝ် မွဲဖ္ဍိုက် ပ္ဍဲကဵုဍုၚ်ခံၚ်ယှုံၚ် မၞုံသ္ကုတ်သၠုၚ်ကျာဍုၚ်ဂှ်ရ။
“ကၠာတေံဂှ်တှ်ေ သွက်ဂွံခၞံဗဒှ် က္ၜၚ်ဗၠိုပ်ဍာ်အပ္ဍဲဍုၚ်ဂှ် ဒှ်ကလောန် ဒှ်ဟွံမာန်ဏောၚ် ထေၚ်ကေတ်ရ။ ဆ္ဂး ပ္ဍဲကဵုခေတ်ဏံ က္ၜၚ်ဗၠိုပ်ဍာ် ပ္တိတ်လဝ်ဒဳဇြာၚ် ခၞံဗဒှ်လဝ် နကဵုညးဍုၚ်ကွာန်ပိုယ်တံဂှ် သွက်ပေါဲပၞာန်ဒပ်ဍာ် ဇြဟတ်ဟွံတုပ်သၟဟ် ညံၚ်ဇြဟတ်ဂွံခိုဟ်ကၠုၚ်ဂှ် ပါလုပ်အာ နူကဵုအခန်ကဏ္ဍ ပၟိက်ဇၞော်တံဏောၚ်” သာ်ဝွံ သမ္မတသာၚ် ဟီုဂးလဝ်ရ။
“အန္တရာယ်တံ၊ တၚ်ကော်ဆဴတံ ၜိုတ်လဵုနွံနွံ ထိုၚ်ဝါန် ဂါံကေတ်လဂါံဇိုၚ်ဏံတုဲ ညံၚ်မူဝါဒစဵုဒၞါကောန်ဂကူ ဇကုဇကု ဂွံဇၞော်မောဝ်အာ ပ္ဍဲတိပိုယ်ဏံဂှ် ဒးကဵုအခေါၚ်ကၠောန်ဏောၚ်” သာ်ဝွံ သာၚ် ဒတူဂတက္ၜၚ်တုဲ ဟီုဂးလဝ်ရ။
က္ၜၚ်ဏံ မကဵုလဝ်ယၟု နာဝါဂှ်ဝွံ ပံၚ်ဖျပ်ကဵု က္ၜၚ်ဗၠိုပ်ဍာ်လၟုဟ်ၜါဖ္ဍိုက် မရာန်ကေတ်လဝ် နူကဵုနေဝ်တာလာန် ပ္ဍဲသၞာံ ၁၉၈၀ တေံဂှ်တုဲ ပ္ဍဲသၞာံ ၂၀၂၅ ဏံ စယိုက်ဂၠေၚ်အာတာလျိုၚ်ဏောၚ်ဂှ် ဂွံတီကေတ်ရ။
က္ၜၚ်ဗၠိုပ်ဍာ် မကၠောန်ပ္တိတ်လဝ် အပ္ဍဲဍုၚ်ဂှ်ဝွံ ချူဓဇက်လဝ် နကဵုနဲပညာ ညးစိုန်သ္ကီုဍုၚ်ဗွဲမဂၠိုၚ်တံဂှ်တုဲ သွက်ထိုၚ်ဝါန် မဒတူလိုၚ်ဒၟံၚ်တၞဟ်ခြာ လ္ဂောံကဵုကလုတ်တမာန်ဂှ် ဒှ်ပေါဲအံၚ်ဇၞးမွဲရ။
ဒပ်ဍာ် ကေုာံ ဒပ်ကျာကြုက်တံဂှ် စကၠောန်သ္ပဒၟံၚ် ပရေၚ်ချဳဒရာၚ်တံတုဲ ဟိုတ်ဒၟါနူပရေၚ်ဘပဠတံ တောတက်ကၠုၚ်ဂှ်ရ ထိုၚ်ဝါန်ဂှ် ညံၚ်ပရေၚ်စဵုဒၞါညးတံ ဇြဟတ်ဂွံခိုဟ်ကၠုၚ် ဒးကၠောန်ဏောၚ်ဂှ် ဝန်ဇၞော်ကာဍုၚ်သ္အာၚ်ထိုၚ်ဝါန် ဂျဵုသက်ဝူ ဟီုဂးလဝ်ကဵု အ္စာပရိုၚ်တံရ။
“က္ၜၚ်ဗၠိုပ်ဍာ်နွံဂှ်တှ်ေ ဒှ်ဗျူဟာမွဲကီုရ။ သွက်ရဲပ္တိတ်သၟာန် ကုနဲဗျူဟာ က္ၜၚ်ဗၠိုပ်ဍာ် ထိုၚ်ဝါန်တံဂှ် ဟိုတ်နူနွံပၟိက် ဒးတာဒၞါပေါဲပၞာန်က္တဵုဒှ်ဂှ်တုဲ ညံၚ်ထိုၚ်ဝါန် ဂွံရာန်က္ၜၚ်ဗၠိုပ်ဍာ်ဂှ် အဲ ဒှ်အာ မၞိဟ်ထံက်ဂလာန်အဓိကဏောၚ်” သာ်ဝွံ ဝူ ဟီုဂးလဝ်ရ။
ထိုၚ်ဝါန်ဝွံ ပ္ဍဲသၞာံ ၂၀၂၇ ကၠုၚ်စိုပ်ဏံ သွက်ဂွံတြးဂစာဲအာ က္ၜၚ်ဗၠိုပ်ဍာ်ၜါဖ္ဍိုက် မကၠောန်ပ္တိတ်လဝ် အပ္ဍဲဍုၚ်တံမာန်ဂှ် စၟဳလဝ်တုဲ ဗွဲကြဴ သွက်ဂွံဗ္ဂပ်စုတ် ကမ်လှောဝ်တံမာန်ဂှ်လေဝ် ဒဒှ်ရစၟဳစလဝ်ဂှ် ဟီုဂးလဝ်ရ။
သ္ကိုပ်ဗိုလ်ဒပ်ဍာ် ကဵုကသပ်ပရေၚ်ဂီုကၠီု သမ္မတသာၚ် ညးအာက္ဍိုပ် အစဳဇန်က္ၜၚ်ဗၠိုပ်ဍာ်ပ္တိတ်နူအပ္ဍဲဍုၚ်ဂှ် ပွမတြးဂစာဲထောံလဝ် က္ၜၚ်ဗၠိုပ်ဍာ်ဂမၠိုၚ် ပ္ဍဲသၞေဟ်က္ၜၚ် မွဲဒမြိပ်ပရၚ်ၜဳ သ္ကုတ်ဗၟံက်ထိုၚ်ဝါန်ဂှ်ဝွံ ပ္ဍဲအရာထိၚ်ဒက် လမျီုလတေၚ်ဆီတ္ကအ်ဂှ် ဒှ်ပွတာဒၞါ မစှ်ေကဵုမဟာဗျူဟာမွဲဏောၚ်ဂှ် ထ္မံက်ထ္ၜးလဝ်ရ။
Ref: CNA
sanlontai