အလုံမွဲကၟိန်ဍုၚ် အပံၚ်လၟိဟ်သ္ၚိဒၟံၚ် ဒးဒုၚ်စံၚ်ပလီုလဝ် စဵုကဵု ၈၆,၀၀၀ ပြၚ် နွံကၠုၚ်

သေတ်ဂါၚ်၊ သေပ်တေမ်ဗာ (၃၀)

ကြဴနူပရေၚ်ဒပ်ပၞာန်သီအဝဵုတုဲ ပ္ဍဲပွိုၚ်ၜါသၞာံပြၚ်ဏံ အလုံမွဲကၟိန်ဍုၚ် ဟိုတ်နူပဋိပက္ခရပ်လွဟ် ကေုာံပေါဲဗတိုက်တအ်တုဲ သီုစမြိုၚ်ပရေၚ်ဘာသာ အပံၚ်လၟိဟ်သ္ၚိဒၟံၚ် ၈၆,၀၀၀ ပြၚ် ဒးဒုၚ်စံၚ်ပလီုလဝ်ရဂှ် ISP-Myanmar လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၂၉) ဂှ်ရ။

အတိုၚ်တၚ်ဂၞၚ် ISP-Myanmar မဒှ်ဂကောံသုတေသနဂှ်မ္ဂး ပ္ဍဲပွိုၚ်ဍုၚ်ဟွံအောန်နူ ၁၁၀ ပွိုၚ်ဍုၚ် မဒှ်လၟိဟ်ပွိုၚ်ဍုၚ် ပိဂအုံမွဲဂအု အလုံံမွဲကၟိန်ဍုၚ်ဂှ် သ္ၚိဒၟံၚ်၊ စမြိုၚ်တအ် ဒးဒုၚ်စံၚ်ပလီုလဝ်ရ။

အပံၚ်လၟိဟ်စမြိုၚ် ၅၅,၀၀၀ မပြၚ် ဗၞတ် ၆၄ တၟံကၠံ ဗ္ၜတ်ဒးဒုၚ်စံၚ်ပလီုလဝ်တအ်ဂှ် က္တဵုဒှ်လဝ် ပ္ဍဲသၞာံ ၂၀၂၂ တုဲ ပ္ဍဲဂိတုဖေဖဝ်ဝါရဳ သၞာံဏံ ကြဴနူလလောၚ်တြးလဝ် ပရေၚ်အုပ်ဓုပ်ပၞာန်တုဲဂှ် ပရေၚ်သ္ၚိဒၟံၚ်တအ် ဒးဒုၚ်စံၚ်ပလီုလဝ် ကလေၚ်ဂၠိုၚ်တိုန်ကၠုၚ်ပၠန်ရ။

ဆ္ဂးသ္ပတံနူလဒေါဝ်သၞာံ သၞာံဏံတုဲ ပရေၚ်ကံၚ်ဇြဳပၞာန်ထ္ပက်ပၞာန်တအ်ဂှ် ပ္ဍဲကဵုဒေသလ္ၚဵုဂှ်မ္ဂး ပြံၚ်သၠာဲအာဗီုပြၚ် နဒဒှ် ပၞာန်ဒုၚ်တုဲဂှ် ပရေၚ်ပရောသ္ၚိဒၟံၚ်ဒးဒုၚ်စံၚ်ပလီု ကလေၚ်ယအ်စှ်ေကၠုၚ်ရဂှ် ISP-Myanmar ဟီုလဝ်ရ။

ပ္ဍဲကဵုရးသေတ်ဂါၚ် ပရေၚ်ဒုၚ်ဒဝ်ပၠန်ဂတးသၞောတ်တၠအဝဵုပၞာန် ဇြဟတ်ခိုဟ်ဒၟံၚ် နဲကဲစုၚ်ဂှ် ဒှ် ၇၂ တၟံကၠံ ပရေၚ်ဒးဒုၚ်စံၚ်ပလီု အလုံမွဲကၟိန်ဍုၚ် ဂၠိုၚ်အိုတ်တုဲ နလၟိဟ်ဂှ် ၆၂,၂၀၀ ပြၚ် နွံရ။

ပ္ဍဲရးသေတ်ဂါၚ်ဂှ် ပၞောဝ်ကဵုပွိုၚ်ဍုၚ် မၞုံ (၃၇) ပွိုၚ်ဍုၚ်ဂှ် ပ္ဍဲပွိုၚ်ဍုၚ်ဟွံအောန်နူ ၃၂ ပွိုၚ်ဍုၚ် ပရေၚ်ဒးဒုၚ်စံၚ်ပလီုသ္ၚိဒၟံၚ်စမြိုၚ်တအ် နွံလဝ်တုဲ ပ္ဍဲကဵုဂှ် ပွိုၚ်ဍုၚ်ယှိုဲဘိုလ်ဂှ်မ္ဂး သ္ၚိဒၟံၚ် ၇,၃၀၀ မပြၚ် ဒးဒုၚ်စံၚ်ပလီုလဝ် လၟိဟ်ဂၠိုၚ်အိုတ်ရ။

အတိုၚ်ဂၞန်သၚ်္ချာ ISP-Myanmar ဓမံက်ထ္ၜးလဝ်မ္ဂး နူကဵုဂိတုဂျာန္နဝါရဳသၞာံဏံ စဵုကဵုဂိတုအဝ်ဂါတ် ပွိုၚ်ဒ္စာံဂိတုဏံ ပ္ဍဲကဵု ၈၂ ပွိုၚ်ဍုၚ် အလုံမွဲကၟိန်ဍုၚ်ဂှ် သီုစမြိုၚ်ပရေၚ်ဘာသာ အပံၚ်လၟိဟ်သ္ၚိဒၟံၚ်စမြိုၚ် ၂၈,၃၀၀ ပြၚ် ဒးဒုၚ်စံၚ်ပလီုလဝ်ရ။

ပရေၚ်ဒးဒုၚ်စံၚ်ပလီုလဝ် ပ္ဍဲကဵုသၞာံဏံ ၜိုတ်ဗ္ဒာဲကဝက်ဂှ် ဒှ်လဝ် ပ္ဍဲပွိုၚ် ၂၉ ပွိုၚ်ဍုၚ် ကံၚ်ဇြဳပၞာန် လလောၚ်တြးလဝ် သွက်ဂွံသုၚ်စောဲ အမိၚ်ပရေၚ်အုပ်ဓုပ်ပၞာန်ရဂှ် တၚ်ဂၞၚ် ISP-Myanmar ဓမံက်ထ္ၜးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – လလောၚ်ပရိုၚ်ဍာံ ပွိုၚ်ဍုၚ်ခေန်ဥူ