တယိတ်ချံၚ်၊ သေပ်တေမ်ဗာ (၃၀)
ရးဒေသဇၞော်တၞၚ်သဳ ပ္ဍဲပွိုၚ်ဍုၚ်တယိတ်ချံၚ်ဂှ် နူကဵုဒပ်ကံၚ်ဇြဳပၞာန် ဟိုတ်နူထ္ပက်ဒၟံၚ်ကရောၚ်ပၞာန် ဂေတ်ဒၟံၚ်ကွာန်တံဂှ်ရ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၅၀) ပြၚ် မဖျေံလဝ်ဒပ် ပ္ဍဲ (မြွေတောင်) ကွာန်ယၚေဝ်ဂှ်ဝွံ ပ္ဍဲဂိတုသေပ်တေမ်ဗာ ၂၉ အခိၚ်နူဂယး ၜိုတ် ၉ နာဍဳဂှ် စထ္ပက်ကၠုၚ်ကရောၚ်ပၞာန် နူကဵုလ္ပာ်ကွာန်ကျဲအေန်ကုန်တံရ။
ဒပ်ကံၚ်ဇြဳပၞာန် ဟိုတ်နူထ္ပက်ကၠုၚ်ကရောၚ်ပၞာန် ဂေတ်ကၠုၚ်ကွာန်ဂှ်ရ ညးဒေသဗ္ဒါဲ (၂၀၀၀) နူကဵုကွာန် (၅) ကွာန် ပါလုပ်သီုကဵု ကွာန်ကျဲမေန်ကုန်၊ ကျံက်ခမံက်၊ ကနက်သဳရိ၊ ပုၚ်နေဝ်တံ ဒးဂြိပ်ဒဴဒၟံၚ်ရ။
အခိၚ်ကရောၚ်ပၞာန်ကံၚ်ဇြဳပၞာန်လုပ်ဂှ် ဗြဲရိုပ်ဂူဒၟံၚ် သ္ကာတ်တ်ဂှ်ရ ညးဒေသ ကောန်ၚာ်သၟတ်၊ ညးအာယုက်ဇၞော်ဇၞော်တံဝွံ ဒးဂြိပ်ဒဴပါဲဒလေတ်ဒၟံၚ် ပ္ဍဲအကြာဗြဲကျာတံဂှ် ဂွံတီကေတ်ရ။
ၜိုန်ရကရောၚ်ပၞာန်ကံၚ်ဇြဳပၞာန် ဂေတ်ကွာန်ထ္ပက်ဒၟံၚ်ကရောၚ်ပၞာန်ကီုလေဝ် စဵုကဵုအခိၚ်တ္ၚဲစေၚ် ၂ နာဍဳဂှ် ပေါဲဗ္တိုက်က္တဵုဒှ်ဟွံမွဲမွဲသာ် ကရောၚ်ပၞာန်ဂှ်ဝွံ ပ္တဝ်ဒၟံၚ်က္ဍိုပ် လ္ပာ်ကွာန်ကနက်သဳရိတံရောၚ်ဂှ် ဂွံတီကေတ် အတိုၚ်ဂလာန်ကောန်ဂကောံဒပ်စဵုဒၞါဒေသတံရ။
တုဲကၠုၚ် ပ္ဍဲဂိတုသေပ်တေမ်ဗာ ၂၅ တေံဂှ်လေဝ် ကရောၚ်ပၞာန်ဏံဝွံ လုပ်စိုပ်ကၠုၚ် အပ္ဍဲကွာန်ကတောဲတုဲဂှ် စံၚ်ပလီုပလာ်ဏာလဝ် သ္ၚိဒၟံၚ်ညးဒေသ ၂ မဏီရ။
ပရိုၚ်−သြၚ်လောန်တိုၚ်(မ်)
ဗီု−CJ
sanlontai