တၞၚ်သြဳ၊ သေပ်တေမ်ဗာ(၃၀)
ဟိုတ်နူကံၚ်ဇြဳပၞာန် ပိုၚ်ခြာကၟာတ်ဒၞာလဝ်တုဲ ပ္ဍဲဂကောံကွာန်တကူ၊ ပွိုၚ်ဍုၚ်တၞၚ်သြဳ၊ ရးဒေသဇၞော်တၞၚ်သြဳဂှ် ဒးဆဵုဂဗဒၟံၚ် ဇွောံမသ္ၚုပိုတ်သ္ကုတ်ဒၟံၚ်တုဲ ၚုဟ်သ္ၚုတအ်လေဝ် က္ဍၚ်တိုန်ကၠုၚ် ဂၠိုၚ်ကဵုချရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္ပတံနူဂိတုသေပ်တေမ်ဗာမံက်တုဲဂှ် နူကဵုသၞေဟ်ကၚ်စၟဳစၟတ်ကံၚ်ဇြဳပၞာန် မၞုံတၞုၚ်ဂၠံၚ်ကွာန်ဇြဝေဝ် ဟိုတ်နူကၟာတ်ဒၞာလဝ် အခေါၚ်တတ်ကၠောံအာကၠုၚ် လုပ်စိုပ်ပ္ဍဲဒေသတကူဂှ်မာန်တုဲ ဟိုတ်နူမၞိဟ်၊ ယာဉ်ကွဳစက်အာကၠုၚ်ဟွံဂွံဂှ်ရ ဒးဆဵုဂဗကၠုၚ်ကဵု ကပေါတ်ဗၞိက်ပိုတ်သ္ကုတ် ပါလုပ်သီုသ္ၚုရ။
ဟိုတ်နူဒးဆဵုဂဗကၠုၚ်ဒၟံၚ်ဇွောံမသ္ၚုပိုတ်သ္ကုတ်တုဲ ဂကောံသ္ၚိကၟိန်သြန်ဟၟဲတအ်ဂှ် စဵုကဵုအကာဲအရာ ဒးၜိုဟ်စဒၟံၚ်ပုၚ် ဒှ်ကၠုၚ်ရဂှ် ဂွံတီကေတ် အတိုၚ်လဟီု ညးဒေသတအ်ရ။
အာဂတနူဏံ နူကဵုသၞေဟ်ကၚ်စၟဳစၟတ်ကံၚ်ဇြဳပၞာန် ဟွံကဵုအခေါၚ်တတ်ကၠောံအာကၠုၚ်တုဲ ယဝ်ရဆက်ကၟာတ်လဝ်ဏီမ္ဂး ပ္ဍဲဍာ်ဇမၠိၚ် ညးဒေသတအ် ၜိုန်သြန်နွံလေဝ် ရာန်စဟွံဂွံတုဲ ဒးဆဵုဂဗကၠုၚ်ဘဲကၞောဝ်မာန်ဒၟံၚ်ရဂှ် ဟီုလဝ်ရ။
ကပေါတ်ဗၞိက်ပါလုပ်သီုသ္ၚုတအ်ဂှ် နူဂၠံၚ်တၞဟ်သ္အာၚ်၊ ဂၠံၚ်ဂြိုပ်တအ်ဂှ် ၜိုန်ရပ္ဍိုက်ကေတ်ဒၟံၚ်ကီုလေဝ် ဟိုတ်နူအခက်ခုဲပရေၚ်အာကၠုၚ်တုဲ ဒးဆဵုဂဗဒၟံၚ်အခက်ခုဲပရေၚ်ပ္ဍိုက်ပလံၚ်ရ။
ဟိုတ်နူအခက်ခုဲပရေၚ်ပ္ဍိုက်ပလံၚ်သ္ၚုတုဲ သ္ၚုအေအ်မထ လုပ်ဂကောံသ္ၚုပရံၚ် မွဲရိုက်မ္ဂး နူကဵု ၇၀၀၀၀ ပြၚ် စဵုကဵုဗ္ဒာဲ ၁၅၀၀၀၀ ၚုဟ်က္ဍၚ်တိုန်ဒၟံၚ် ကရပ် ၂ ချရ။
ပွိုၚ်ဍုၚ်တၞၚ်သြဳ ပ္ဍဲကဵုဂကောံကွာန်တကူဂှ်၊ ကွာန်ဗ္ဒာဲ (၂၀) ကွာန် ပါလုပ် သီုကွာန်တကူ၊ သာရဘောၚ်၊ သိန္နော၊ ကအ်မပြၚ် နွံရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီု – CJ
sanlontai