ပ္ဍဲဍုၚ်ကာန်ပါတ်လေတ် ဒပ်ပၠန်ဂတးတအ် စပစူပ္တိုန်အလာံ

ကာန်ပါတ်လေတ် – သေပ်တေမ်ဗာ (၃၀)

ဒၞာဲလုပ်ဍုၚ်ကာန်ပါတ်လေတ်၊ တွဵုရးချေၚ် ယန္တရာပရေၚ်အုပ်ဓုပ်ကံၚ်ဇြဳပၞာန် ဗ္ဂေတ်ဟွံမာန်ဂှ် ဒပ်ပၠန်ဂတးတအ် ပစူပ္တိုန်လဝ် အလာံတွဵုရးချေၚ်ရဂှ် ဒပ်စဵုဒၞာဒေသ CDF-Kanpetlet လလောၚ်တြးလဝ် ပရိုၚ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၂၈)တ္ၚဲဏံဂှ် ပ္ဍဲဒၞာဲလုပ်ဍုၚ်ကာန်ပါတ်လေတ် ပ္ဍဲဒၞာဲဂတဵုမုက် “ လောက်နူးမြေကန်ပက်လက်မြို့မှ လှိုက်လှဲစွာကြိုဆိုပါ၏” ဂှ် ပစူပ္တိုန်လဝ်အလာံ တွဵုရးချေၚ် ကေုာံ အလာံ CDF-Kanpetlet ရ။

ကောန်ဒပ် CDF-Kanpetlet တအ်ဂှ် ကၠာနူဟွံဂွံပ္တိုန်အလာံဏီ ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၂၇) တ္ၚဲတုဲကၠုၚ်တေံလေဝ် လုပ်စိုပ်က္ဍိုက်ဗတိုက်လဝ် ပ္ဍဲရုၚ်ဌာနက္ဍိုက်က္ဍိုပ်ပရေၚ်အုပ်ဓုပ် ကေုာံ ရုၚ်သ္ကိုပ်ပရေၚ်ပညာ ဒၞာဲဒပ်ကံၚ်ဇြဳပၞာန် ဖျေံလဝ်ဗဒိုပ်ဂှ်ရ။

ပ္ဍဲကဵုဍုၚ်ကာန်ပါတ်လေတ် ဂကောံဒပ်ပၠန်ဂတးတအ် ထိၚ်ဒဝ်လဝ်ဂှ်မ္ဂး ယန္တရာပရေၚ်အုပ်ဓုပ်ကံၚ်ဇြဳပၞာန် ဟၟဲဒၟံၚ် ဒှ်ကၠုၚ်ကဵုသၞာံတုဲ ဒပ်ကံၚ်ဇြဳပၞာန်လေဝ် ပ္ဍဲကဵုဒၞာဲရုၚ်ဌာနမဆေၚ်စပ်ဟေၚ် ဟွံတိတ်မ္ၚးတုဲ ဆက်ဖျေံလဝ်ဗဒိုပ်ရ။

လၟိဟ်မၞိဟ်လ္တူဍုၚ်ကာန်ပါတ်လေတ် ၜိုတ် (၈၀) တၟံကၠံတအ်ဂှ် နူကဵုပေါဲဗတိုက်လ္တူဍုၚ် စဒှ်လဝ်တေံ ဒးဓလေတ်ပါဲဒၟံၚ်ဘဲပၞာန်တုဲ စဵုကဵုအခိၚ်လၟုဟ် ဟွံဂွံကလေၚ်စဴ ဌာန်ဒၟံၚ်ဏီရ။

ဂကောံဇြဟတ်ပၠန်ဂတးတအ်ဂှ်မ္ဂး သွက်ဂွံထိၚ်ဒဝ်ဍုၚ်ကာန်ပါတ်လေတ်ဏံ ပေၚ်ၚ်မာန်ဂှ် ဟိုတ်နူစချဳဓရာၚ်ဒၟံၚ်ပၞာန်တုဲ ညးဍုၚ်ကွာန်တအ် ညံၚ်ဟွံဂွံမံၚ် ပ္ဍဲဒၞာဲစုက်လုက်ကြပ်ညောန်ကဵုဒပ်ကံၚ်ဇြဳပၞာန်ဂှ် ကဵုလဝ်သမ္တီရ။

ပရိုၚ် – သြၚ်​လောန်တိုၚ်(မ်)

ဗီု – CDF-Kanpelet