မၞိဟ်ဒးဒုၚ်ရပ်လဝ် နဒဒှ်ဇွောံစဵုဒၞါပၞာန် ဒပ်ပၞာန်ဗၟာတံဂမၠိုၚ် ဒးဂဗလဝ် ပွဓဇန်ပရေံအိုတ်တံရောၚ် KHRG ဟီု

မတ်မလီု၊ သေပ်တေမ်ဗာ (၃၀)

ပ္ဍဲကဵုဒေသသ္ကုတ်ဗၟံက်သၠုၚ်ကျာဍုၚ်ဗၟာ အပ္ဍဲကာလဒပ်ပၞာန်သီအဝဵုဏံ ကောန်အရာပ်ဗွဲမဂၠိုၚ် ဒးဒုၚ်ရပ်လဝ် ကဵုဒပ်ကံၚ်ဇြဳပၞာန် သွက်ဂွံရပ်စပ် နဒဒှ်ဇွောံစဵုဒၞါပၞာန်ဂှ်ဝွံ အခိၚ်ဒးဒုၚ်ရပ်ဂှ် ဒးဒုၚ်သ္ပပကီုပရာပ် ပါသီုဇိုၚ်တဲတံဂှ်ကီု၊ ဟွံဂွံလွဳယဲတံဂှ်ကီု၊ စၞစ ကေုာံ အရာနွံပၟိက်သွက်မၞိဟ်မွဲမွဲတံဂှ်လေဝ် ဟွံဂွံရုမ်မ်ဂပ်ပ်တုဲ ဒးဆေၚ်လဝ်မုက်ကဵု ပြဝဓဇန်န် ဟွံမွဲကဵုပရေၚ်ဗ္စာရဏာမၞိဟ်တံရောၚ်ဂှ် ဂကောံအခေါၚ်အရာမၞိဟ်ကရေၚ် KHRG လလောၚ်ပ္တိတ်လဝ်ရ။

လိက်စံၚ်ဗွဲခမၞောန် “သၞိၚ် သၟိၚ်ယီု” မဒှ်ပရူပရာ ကံၚ်ဇြဳပၞာန် ရပ်စပ်ညးဍုၚ်ကွာန်ကောန်အရာပ်တံ နဒဒှ်ဇွောံစဵုဒၞါပၞာန် ပ္ဍဲကဵုသ္ကုတ်ဗၟံက်သၠုၚ်ကျာဍုၚ်ဗၟာ ဗွဲကြဴဒပ်ပၞာန်သီအဝဵုတုဲဏံဂှ် ဂကောံအခေါၚ်အရာမၞိဟ်ကရေၚ် KHRG လလောၚ်ပ္တိတ်လဝ် နကဵုစၟတ်တ္ၚဲ ဂိတုသေပ်တေမ်ဗာ ၂၇ တေံရ။

ပ္ဍဲကဵုလိက်ဒုၚ်စဳရေၚ်ဏံဂှ် နူစဒပ်ပၞာန်သီအဝဵုတုဲ ပ္ဍဲကဵုတွဵုရးကရေၚ်ဂှ် ပဋိပက္ခရပ်လွဟ်တံ သာသ္ကာတ်မြဟ်ကၠုၚ်လဝ်တုဲ ပွဖံက်ပ္ကဝ်အခေါၚ်အရာမၞိဟ် နူကဵုကံၚ်ဇြဳပၞာန် မကလိလောန်လဝ်ဂှ်ဝွံ ဆက်က္တဵုဒှ်ဒၟံၚ်ရောၚ် KHRG သ္ဂးလဝ်ရ။

ကံၚ်ဇြဳပၞာန်ဝွံ ဟိုတ်နူဆက်ဝးပ္ကဝ်ဒၟံၚ် အခေါၚ်အရာမၞိဟ်တံဂှ်ရ အခေါၚ်အရာမၞိဟ် ကေုာံ အကာဲအရာပရေၚ်ဂီုကၠီု ပ္ဍဲကဵုတွဵုရးကရေၚ်တံဂှ်လေဝ် သာတုဲပရေံကၠုၚ်လဝ်တုဲ ပရေၚ်ဗ္တိုက်တရဴကျာ၊ ပရေၚ်ပန်ပှော်လွဟ်ဇၞော် ကံၚ်ဇြဳပၞာန်တံ၊ စံၚ်ပလီုပလာ် ပိုန်ဒြပ်အရပ်ရာ ကောန်အရာပ်တံ၊ သ္ကဵုဆုဲပြံၚ်ကၠေံဌာန်ဒၟံၚ် ဗွဲအဓမ္မကီု၊ ပွမဂစိုတ် ကောန်အရာပ်တံကီု၊ ပရေၚ်ရပ်ဒက်တံကဵု ဍဵုဍိုက်ပျဲပျာံတံ ပါလုပ်ရောၚ်ဂှ် ပါလုပ် ပ္ဍဲလိက်စံၚ် KHRG ဂှ်ရ။

စနူသၞာံ ၂၀၂၁ ဂိတုဖေဖဝ်ဝါရဳတုဲဂှ် သက်သဳသာဓက ကောန်ပၞာန်ကံၚ်ဇြဳပၞာန်တံ ရပ်စပ်လဝ် ညးဒေသကောန်ကွာန် ၅၆၄ တၠ နဒဒှ်ဇွောံစဵုဒၞါပၞာန် ပ္ဍဲကဵုခရိုၚ် (၇) မၞုံတွဵုရးကရေၚ်တံပါလုပ်ဂှ် KHRG ဂွံဒုၚ်လဝ်တဲ လိက်ဒုၚ်စဳရေၚ် ၂၂ တၞးတုဲ ဗွဲစၟတ် ယဝ်ရတော်ရံၚ် လၟေၚ်ဒဒှ်ဒပ်ကံၚ်ဇြဳပၞာန် ရပ်ကော်ဏာ ကောန်ကွာန်တံ နဒဒှ်ညးထ္ၜးဂၠံၚ်ကဵု ပဝ်တာတံဂှ်မ္ဂး ဂၠိုၚ်နူကဵုလၟိဟ် မထ္မံက်ထ္ၜးလဝ် လ္တူဏံမာန်ဂှ် လိက်စံၚ်ဂှ် ထ္မံက်ထ္ၜးလဝ်ရ။

ပြဝဒပ်ကံၚ်ဇြဳပၞာန် စကာရပ်စပ် ကောန်ကွာန်တံ နဒဒှ်ပဝ်တာကဵု ညးထ္ၜးဂၠံၚ်တံဂှ်ဝွံ သွက်ဂွံပါဲဒလေတ် ပရေၚ်ဗ္တိုက်ပန်ပှော် ဂကောံရပ်လွဟ်ကောန်ဍုၚ်အရၚ်တံဂှ်တုဲ ရပ်စပ်ဒၟံၚ် နဒဒှ်ဇွောံစဵုဒၞါပၞာန်ရောၚ် ချိၚ်ခယျကေတ်မာန်တုဲ သွက်ဂွံရပ်စပ် နဒဒှ်ဇွောံစဵုဒၞါပၞာန်တုဲ ဒပ်ကံၚ်ဇြဳပၞာန် ပ္ဍဲအရာရပ်ကော်ကောန်အရာပ်တံဂှ်လေဝ် ကောန်ကွာန်ဂမၠိုၚ်ဝွံ ဒးဒုၚ်ရပ်ဒက်ဂစိုတ်ဂှ်ကီု၊ ဒးဒုၚ်ဍဵုဍိုက်ပျဲပျာံဂှ်ကီု၊ ဇီုကပိုက်ကလိဂွံဝပ်တံဂှ်ကဵု ဒးဒုၚ်ဘပဠတံဂှ် ဒးဂဗလဝ်ရောၚ် KHRG သ္ဂးလဝ်ရ။

သ္အာၚ်နူဂှ်ပၠန် သွက်ဂွံပါဲဒလေတ် မာၚ်တိုပ်တိ ကောန်ဒပ်ရပ်လွဟ်ကောန်ဍုၚ်အရၚ်တံ မပစူလဝ်တံဂှ်တုဲ ကောန်ကွာန် မရပ်ဒက်ကော်နၚ် နဒဒှ်ဇွောံစဵုဒၞါပၞာန်တံဂှ် လဆောဝ်လဆောဝ် နဒဒှ်ရဲပသောၚ်မာၚ်တုဲ သ္ကဵုကွာ်ဂတ ကရောၚ်ပၞာန်တံဂှ်တုဲ ကောန်ကွာန်စကာ နဒဒှ်ပဝ်တာတံဂှ်ဝွံ ဟိုတ်နူစကာကဵုအာ ပ္ဍဲကဵုဒေသဒၞါဲမာၚ်တိုပ်တိမၞုံတံဂှ်ရ လိုန်ဒးမာၚ်တိုပ်တိတုဲ ဇီုကပိုက်ချိုတ်တံလေဝ် နွံလဝ်ရောၚ် ထ္မံက်ထ္ၜးလဝ်ရ။

ဒပ်ကံၚ်ဇြဳပၞာန် ရပ်စပ်ကောန်အရာပ်ဒေသတံ နဒဒှ်ဇွောံစဵုဒၞါပၞာန်ဂှ် ယဝ်ရဂကောံဒပ်ပၠန်ဂတးရပ်လွဟ်ဒေသတံ ဂွံဆဵုကေတ်မ္ဂး ပွမဗ္တိုက် ကုဒပ်ကံၚ်ဇြဳပၞာန်တံဂှ် ဝေၚ်ပါဲကၠေံလၟိုန်တုဲ အကြာကံၚ်ဇြဳပၞာန်ကဵု KNLA ဒေသတံ က္တဵုဒှ်ပေါဲဗ္တိုက်မ္ဂး ကောန်ကွာန်ဒးဒုၚ်ရပ်စပ် နဒဒှ်ဇွောံစဵုဒၞါပၞာန်ဂမၠိုၚ်ဝွံ သ္ဂောံကလိဂွံဝပ် ဟွံသေၚ်မ္ဂး သ္ဂောံချိုတ်မာန်တံ ဒှ်ဂၠိုၚ်ဏောၚ်ဂှ် သ္ဂးလဝ်ရ။

သွက်ပြဝတံဏံဂှ် နူကဵု ICC တံကီု၊ ရုၚ်သၞောဝ်ဓဝ်ဍုၚ်သ္အာၚ် ကေုာံ နူကဵုပရေၚ်စဳရေၚ်သၞောဝ်ဓဝ် ဍုၚ်နာနာတံဂှ်မွဲကဆံၚ် စောဲဂဗုတ် ကုက္ဍိုပ်သ္ကိုပ်ကံၚ်ဇြဳပၞာန်တုဲ ဂၠိုက်ဂၠါဲကေတ်ဗဗွဲဓဝ် နူကဵုကံၚ်ဇြဳပၞာန် မရပ်စပ်ဒၟံၚ် နဒဒှ်ဇွောံစဵုဒၞါပၞာန်ဂှ်တုဲ သွက်ဂွံကဵုကံၚ်ဇြဳပၞာန် ကေတ်တာလျိုၚ် ဒုၚ်လျိုၚ်တံဂှ် KHRG ဖ္တိုက်ဖ္အောဝ်လဝ်ရ။

ပရိုၚ်−သြၚ်လောန်တိုၚ်(မ်)

ဗီု−KHRG