ညးဒေသမန် ဒပ်ပၞာန်မရပ်ဒက်လဝ် ဗ္ဒါဲ ၂၀ တၠဂှ် ပရိုၚ်ကၠေံဒၟံၚ်

မတ်မလီု၊ သေပ်တေမ်ဗာ (၃၀)

ပ္ဍဲတွဵုရးဍုၚ်မန်၊ ပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ပံၚ်တံဂှ် အပ္ဍဲဂိတုသေပ်တေမ်ဗာဏံ နူကဵုဒပ်ကံၚ်ဇြဳပၞာန်တံ ထ္ၜးဟိုတ်နာနာတုဲ ညးဒေသ ဗ္ဒါဲ ၂၀ တၠ မရပ်ဒက်ဏာဂှ်ဝွံ ဟွံဂွံအဆက်မွဲသာ် ကၠေံဒၟံၚ်ရောၚ် ဂွံတီကေတ် အတိုၚ်ဂလာန် ညးမစုက်လုက်ကဵု ဂြောဝ်ဂတာညးတံရောၚ်ဂှ် ဂွံတီကေတ်ရ။

ပ္ဍဲကဵုဂိတုဏံမံက်တေံ ကြဴနူကောန်ဒပ်ကံၚ်ဇြဳပၞာန်တံကဵု ညးကဵုပရိုၚ် ဟွံအောန်နူကဵု ၃ တၠ ဒးဒုၚ်ပန်ပှော်တုဲဂှ် နူကဵုဒပ်ကံၚ်ဇြဳပၞာန် ရပ်ဒက်ဏာလဝ် ညးဒေသ ပွိုၚ်ဍုၚ်ပံၚ်တံကဵု ပွိုၚ်ဍုၚ်ကျာ်ထဝ်တံ ဗ္ဒါဲ (၃၀) ရ။

ညးဒေသ (၂၃) တၠ ဒၟံၚ်ကွာန်ယျေန်ညုၚ်ကဵု ကွာန် (ဥတ္တံတား) ပွိုၚ်ဍုၚ်ပံၚ် ဒပ်ကံၚ်ဇြဳပၞာန် မရပ်ဒက်လဝ်ဂှ်ဝွံ ကလေၚ်လှဲပြံၚ်ကဵုလဝ် ဂကောံဒပ်ဗၠာဲသၟိၚ်တံ (၅) တၠဓဝ်ကီုလေဝ် ညးဒေသသှ်ေ (၁၈) တၠဂှ် ရပ်ထိၚ်လဝ်ဒၞါဲလဵုရောဟီုဂှ် ကောန်ဇာတ်ညးတံ ဗက်ဂၠိုက်ဂၠါဲဒၟံၚ်ကီုလေဝ် အဆက်ပိုတ်ဒၟံၚ်ရောၚ် မဒှ်ရ။

အာစိုပ်သၟာန်စ သွက်ညးဒးဒုၚ်ရပ်ဒၟံၚ်တံ ပ္ဍဲကဵုဒပ်ဗၠာဲသၟိၚ်ပွိုၚ်ဍုၚ်ပံၚ်တံဂှ်လေဝ် ဒဒှ်ရစိုပ်ကၠုၚ်ဇရေၚ်ညးတံ ဟွံမွဲဂှ်ကီု၊ စိုပ်ကၠုၚ်မ္ဂး ကဵုပရိုၚ်ဏောၚ် ဆၜိုတ်ဏံဟေၚ် သှ်ကဵုဂှ် ညးမစုက်လုက်ကဵု ဂြောဝ်ဂတာညးဒးဒုၚ်ရပ်တံ မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

သ္အာၚ်နူဂှ်ပၠန် ပ္ဍဲကဵုညးဒေသကျာ်ထဝ် (၁၀) တၠ ဒပ်ကံၚ်ဇြဳပၞာန် မရပ်ဒက်ဏာဂှ် ကလေၚ်ဗလးကဵုလဝ် (၈) တၠကီုလေဝ် သမ္ဘာတၠသ္ၚိ (၂) တၠ ဒၟံၚ်ဂၠံၚ်သၞေဟ်ကွဳပၟတ်ကျာ်ထဝ်ဂှ် ဒဵုကဵုအခိၚ်လၟုဟ် ကလေၚ်ဗလးကဵုဟွံမွဲတုဲ အဆက်ပိုတ်ဒၟံၚ်ရ။

ညးဒေသ နူကဵုဒပ်ကံၚ်ဇြဳပၞာန်တံ မရပ်ဒက်ဏာတံဂှ် ၜိုန်ရအဆက်ပိုတ်ဒၟံၚ်ကီုလေဝ် ဟိုတ်နူဂွံကၠုၚ် ဗ္ဒါဲမွဲဂိတုဂှ်ရ ဒးဂွိၚ်ဒၟံၚ် သွက်အန္တရာယ်လမျီုညးတံရောၚ်ဂှ် ဂြောဝ်ဂတာညးတံ ဟီုဂးလဝ်ရ။

အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ် ၜိုတ်က္ဍစိုပ်ဂှ်မ္ဂး နူကဵုဂိတုသေပ်တေမ်ဗာ (၇) စဵုကဵု (၂၉) ဂှ် ညးဒေသ နူပွိုၚ်ဍုၚ်ပံၚ် (၂၃) တၠ၊ နူပွိုၚ်ဍုၚ်ကျာ်ထဝ် (၁၀) တၠ၊ နူပွိုၚ်ဍုၚ်သဓီု (၅) တၠ၊ နူပွိုၚ်ဍုၚ်ဇြပ်ဗု (၃) တၠ ကေုာံ ညးဒေသ နူပွိုၚ်ဍုၚ်မတ်မလီု မွဲတၠ အပံၚ်ဖအိုတ် ၄၂ တၠ ဒးဒုၚ်ရပ်ဒက်လဝ်ရ။

ပ္ဍဲတွဵုရးဍုၚ်မန်ဂှ် အပ္ဍဲကာလဒပ်ပၞာန်သီအဝဵု ပွိုၚ်ၜါသၞာံဘာ်ပြၚ်ဏံ ညးဍုၚ်ကွာန်ကောန်အရာပ် ၈၂၄ တၠ ဒးဒုၚ်ရပ်ဒက်လဝ်ရောၚ် ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် (AAPP) တံ လလောၚ်ပ္တိတ်လဝ် ပ္ဍဲဂိတုသေပ်တေမ်ဗာ (၂၈) တေံရ။

ပရိုၚ်−သြၚ်လောန်တိုၚ်(မ်)

ဗီု−Social Media