ပ္ဍဲသေံ ပ္ဍဲကဵုပွိုၚ် (၉)ဂိတု သၟာကမၠောန်ဆုဲပြံၚ်ကောန်ကၟိန်ဍုၚ်ဗၟာ ဒးဒုၚ်ရပ်လဝ် ဗ္ဒာဲ ၂၀၀၀

မြဝတဳ၊ အံက်တဝ်ဗာ(၁)

ပ္ဍဲကဵုကၟိန်ဍုၚ်သေံ ပ္ဍဲသၞာံဏံ နူဂိတုဂျာန္နဝါရဳ စဵုကဵုစိုပ်ဂိတုသေပ်တေမ်ဗာ ပ္ဍဲပွိုၚ် (၉)ဂိတုဏံ သၟာကမၠောန်ဆုဲပြံၚ် ကောန်ကၟိန်ဍုၚ်ဗၟာ ကၠောန်ဒၟံၚ်ကမၠောန် တၞးလိက်အခေါၚ်ဟၟဲ ဒးဒုၚ်ရပ်လဝ် ဗ္ဒာဲ ၂၀၀၀ ရဂှ် ဂွံတီကေတ် အတိုၚ်လိက်ပရိုၚ် Bangkok Post ဓမံက်ထ္ၜးလဝ်ရ။

ဌာနဝန်ဇၞော်သၟာကမၠောန်သေံဂှ် နူကဵုဂိတုအံက်တဝ်ဗာသၞာံတုဲကၠုၚ်တေံ စဵုကဵုစိုပ်ဂိတုသေပ်တေမ်ဗာ စၟတ်တ္ၚဲ (၂၅) သၞာံဏံ လုပ်စိုပ်စၟဳစၟတ်လဝ် အပံၚ်လၟိဟ် ဗွိုၚ်ကမၠောန် ၅၃,၀၀၀ ပြၚ် နကဵုသၞောတ်ဟွံရုဲစှ်ရ။

ပ္ဍဲအရာစၟဳစၟတ်ဗီုဏံဂှ်လေဝ် ရပ်ဂွံလဝ် သၟာကမၠောန်ဆုဲပြံၚ် ကောန်ဍုၚ်သ္အာၚ် ကၠောန်ဒၟံၚ်ကမၠောန် ဟၟဲကဵုတၞးလိက်အခေါၚ် ၃၄၀၀ ပြၚ်တုဲ ပ္ဍဲကဵုဂှ် သၟာကမၠောန်ဆုဲပြံၚ်ကောန်ကၟိန်ဍုၚ်ဗၟာ ၁၈၅၀ တၠ ဒးဒုၚ်ရပ်လဝ် လၟိဟ်ဂၠိုၚ်အိုတ်ရ။

ဥူပဳတာ ညးရီုဗၚ်ရေၚ်တၠုၚ်ကဵုဒၟံၚ်ပရေၚ်သၟာကမၠောန်ဆုဲပြံၚ် ကောန်ကၟိန်ဍုၚ်ဗၟာ ဖျေံသ္ဇိုၚ်ဍုၚ်သေံဂှ်မ္ဂး သၟာကမၠောန်ဆုဲပြံၚ် ကောန်ကၟိန်ဍုၚ်ဗၟာ ဟၟဲကဵုတၞးလိက်အခေါၚ်တအ်ဂှ် ဒးဒုၚ်ရပ်ဒၟံၚ် ပ္ဍဲဍုၚ်သေံ အရိုဟ်ဒဒှ်တ္ၚဲရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ဆ္ဂးဟိုတ်နူသၞောဝ်ဥပဒေ အလဵုအသဳသေံပိုၚ်ခြာလဝ်တုဲ သွက်သၟာကမၠောန်ဆုဲပြံၚ်ကောန်ကၟိန်ဍုၚ်ဗၟာ တၞးလိက်အခေါၚ်ဟၟဲ ဒးဒုၚ်ရပ်လဝ်တအ်ဂှ် ၜိုန်ရပရေၚ်ကဵုရီုဗၚ် ဇြဟတ်ဍိုန်လျဒၟံၚ်ကီုလေဝ် သွက်ပရေၚ်သၟာကမၠောန် MOU ကေုာံ သၟာကမၠောန်ဆုဲပြံၚ် လုပ်ကဵုသၞောဝ်တအ်ဂှ် ၜိုတ်သ္ပမာန် ရီုဗၚ်ရေၚ်တၠုၚ်ကဵုဒၟံၚ်ရဂှ် ညးဆက်ဟီုလဝ်ရ။

Bangkok Post ဟီုလဝ်မ္ဂး ပ္ဍဲကဵုသၟာကမၠောန် ဒးဒုၚ်ရပ်လဝ်တအ်ဂှ် မ္ၚးနူသၟာကမၠောန်ဆုဲပြံၚ် ကောန်ကၟိန်ဍုၚ်ဗၟာတုဲ ကောန်ဍုၚ်ကမ္ဘောဒဳယာ ၆၄၆ တၠ၊ ကောန်ဍုၚ်လဴ ၅၆၂ တၠ၊ ကောန်ဍုၚ်ဗဳယာတ်နာမ် ၁၄၅ တၠ ကေုာံ ကောန်ဍုၚ်တၞဟ်သ္အာၚ်လေဝ် ပါလုပ်ဒၟံၚ်ရဂှ် ဟီုလဝ်ရ။

ညးပိုၚ်ပြဳအဝဵုအလဵုအသဳသေံတအ်ဂှ် သၟာကမၠောန်ဆုဲပြံၚ်ကောန်ဍုၚ်သ္အာၚ် ကၠောန်ဒၟံၚ်ကမၠောန် ဟွံလုပ်သၞောဝ် လုပ်ကၠောန်ဒၟံၚ် ပ္ဍဲဗွိုၚ်ကမၠောန်ပိုၚ်ခြာလဝ်တအ်ဂှ် ရပ်ဂွံလဝ် ပ္ဍဲၜၚ်ကံက်၊ နန်ထပူရဳ၊ ဇၚ်မာဲ၊ ချောန်ပူရဳ၊ နခမ်ပဓေါမ် ကေုာံ ခရိုၚ်ရနံၚ်တအ် ဂၠိုၚ်အိုတ်ရ။

ပရိုၚ် – သြၚ်လောန်တိုၚ်(မ်)

ဗီု – Bangkok Post