ပ္ဍဲရေဝ် သီုဒုသ္ကိုပ်တံဒပ်ကံၚ်ဇြဳပၞာန် (၃) တၠ ဒးဒုၚ်ဗတိုက်တုဲ ဒးချိုတ်လဝ်

​ရေဝ်၊ အံက်တဝ်ဗာ(၁)

တွဵုရးဍုၚ်မန်၊ ပွိုၚ်ဍုၚ်ရေဝ် ကောန်ဒပ်ကံၚ်ဇြဳပၞာန် ၃ တၠ ပါလုပ်သီုဒုသ္ကိုပ်တံဒပ် တံဒပ်ပၞာန်တိုက်ကံၚ်ဇြဳပၞာန် စၟတ် (၅၉၁) ဖျေံသ္ဇိုၚ်ကွာန်ဘာ ဂကောံလကိုဟ်ဍုၚ်ရေဝ် ပန်ပသောၚ်လဝ်ရဂှ် ရုၚ်ဒုသ္ကိုပ်ဒေသပၞာန်လ္ပာ်၊ ဒေသပၞာန်လ္ပာ် စၟတ် ၃၊ သ္ကုတ်ရးသၠုၚ်ကျာ လလောၚ်တြးလဝ်ရ။

တ္ၚဲဏံ ဂိတုသေပ်တေမ်ဗာ စၟတ်တ္ၚဲ (၃၀) အခိၚ်ဒေါဝ်တ္ၚဲ ၜိုတ် (၁၁) နာဍဳဂှ် မွဲကရောံကဵု ဒုသ္ကိုပ်တံဒပ်ကံၚ်ဇြဳပၞာန် တိတ်ကၠုၚ်မ္ၚးဒပ်ဂှ် ကွဳစက်ကောန်ပၞာန် (၂) တၠ ဍိုက်ပါဗက်ကၠုၚ် ပ္ဍဲဒၞာဲသ္ၚောဲတိတ်နူဒပ်ပၞာန် ၅၀၀ ဂိုက်ဂှ် အတိုၚ်ဂွံလဝ်ပရိုၚ် ဂကောံလကိုဟ်ဍုၚ်ရေဝ် မၚ်ဗတိုက်ဒၟံၚ်ရ။

ဟိုတ်နူပရေၚ်ဗတိုက်ပန်ဏံတုဲ ပါလုပ်သီုဒုသ္ကိုပ်တံဒပ်ကံၚ်ဇြဳပၞာန် ဒးချိုတ်လဝ်လွာဲဂှ် (၃) တၠတုဲ ဒၞာဲပန်ပှော်လဝ်ဂှ် ဟိုတ်နူကြပ်ညောန်ကဵု ခမရ ၅၉၁ လောန်ဂှ်ရ သီကေတ်လွဟ်လက်နက် သီုကပေါအရပ်စပ်ပၞာန်တအ် ဟွံမာန်မွဲသာ်တုဲ ကလေၚ်ဆုတ်တိတ်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲကဵုပရေၚ်ပရော ဂကောံဒုသ္ကိုပ်တံဒပ်ကံၚ်ဇြဳပၞာန် ဒးဒုၚ်ဗတိုက်ပန်လဝ်ဏံ ကွဳစက်အာတရဴဟိုက်ဂျေတ်မွဲဖ္ဍိုက်လေဝ် ဟိုတ်နူဒးလဝ်တုဲ ကောန်အရာပ် ဒးချိုတ်လဝ် (၂) တၠတုဲ ဒးလဝ်ဘဲဝပ် (၁) တၠရဂှ် ၜိုန်ရဂွံတီကေတ်ကီုလေဝ် နကဵုသြၚ်လောၚ်တိုၚ်(မ်) သွက်ဂွံထပ်သ္ပဒ္တန်မာန်ပၠန် ဃောဂ္စာန်ပ္တိတ်ဒၟံၚ်ဇြဟတ်ရ။

​ရးသ္ကုတ်သၠုၚ်ကျာ၊ ဒေသပၞာန်လ္ပာ် စၟတ် (၃) ဂှ်မ္ဂး သွက်ဂွံအုပ်ဓုပ်ထိၚ်ဒတ်တိဍာ် ပ္ဍဲမွဲဒမြိပ်ဂၠံၚ်ကၟိန်ဍုၚ် စၟတ် (၈) မတ်မလီု – ရေဝ် – ထဝါဲကီု သီုသွက်ညးဍုၚ်ကွာန်အာတရဴတအ် ဂွံအာကၠုၚ်ဂီုကၠီုဖျေံစိုတ်ဂှ် ဒပ်ပံၚ်ကောံ KNLA၊ PDF တအ် ရေၚ်တၠုၚ်စၟဳစၟတ်ဒၟံၚ် အတိုၚ်ပရေၚ်ဂီုကၠီု အရိုဟ်ဒဒှ်တ္ၚဲ နွံရဂှ် လလောၚ်တြးလဝ်ရ။

ဃောဒပ်ပၠန်ဂတးပံၚ်ကောံတအ် စၟဳစၟတ်ဒၟံၚ်ဗီုလၟုဟ်ဏံ သွက်ဂွံဒုၚ်စၟဳစၟတ် နစိုတ်ဗုဗုအးအးကီု၊ ညံၚ်ဟွံဂွံပ္ဍိုက်ဏာနၚ် မၞိဟ်၊ ကပေါကညောတ် ဆေၚ်ဆက်ကဵုဒပ်ပၞာန်ကီု၊ နကဵုညးဍုၚ်ကွာန်တအ် ညံၚ်ဟွံဂွံဍိုက်ပါဗက် ကရောံယာဉ်ကွဳစက် ကံၚ်ဇြဳပၞာန်ကီု သီုကဵုယာဉ်ကွဳစက် ဂကောံရပ်လွဟ်ကောန်ဍုၚ်အရၚ်တၞဟ် သုၚ်စောဲဒၟံၚ်တအ်ဂှ်လေဝ် ညံၚ်ဂွံဒုၚ်စၟဳစၟတ် နကဵုစိုတ်ဗုဗုအးအးဂှ် ဗတိုက်ဖ္အောဝ်လဝ်ရ။

ပရိုၚ် – သြၚ်လောန်တိုၚ်(မ်)

ဗီု -JOC