ပံၚ်၊ အံက်တဝ်ဗာ(၁)
တွဵုရးဍုၚ်မန်၊ ပွိုၚ်ဍုၚ်ပံၚ်၊ ညးဗြဴ ဒပ်ကံၚ်ဇြဳပၞာန်ရပ်ကေတ်ဏာလဝ် ပ္ဍဲကွာန်ဥတ္တတာ (၃) တၠတအ်ဂှ် ဒးထပ်ဒုၚ်ပံက်လဝ်ဂဗုတ် နကဵုသၞောဝ်ဥပဒေဗ္တိုက်သရိုဟ်ပွပ္ကီုပရာပ် မဖျေံဒဏ်ထံၚ် စဵုကဵုမွဲအယုက်မာန်ရဂှ် ညးလုက်စုက်ကဵု ဂကောံသ္ၚိကၟိန်ညးတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူဗၠာဲသၟိၚ်ထိၚ်ရး ကိုဝ်ကိုဝ်လွေန် နူဗဒိုပ်ဗၠာဲသၟိၚ်ၝောံဍုၚ်ပံၚ် ဒးဒုၚ်ပန်ဂစိုတ်လဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၃) တုဲကၠုၚ်တေံဂှ်တုဲ ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်ဥတ္တတာတုဲ ရပ်ကေတ်ဏာလဝ် ညးဒေသ ဟွံအောန်နူ (၁၀) တၠရ။
ပ္ဍဲကဵုဂှ် ဒဝ်ခေန်တာန်နု၊ ဒဝ်ဇြေန်မာထောန် ကေုာံ ဒဝ်စန္ဒာလေန် ဒၟံၚ်ကွာန်ဉတ္တတာတအ်ဂှ် ပံက်လဝ်ဂဗုတ် ကေတ်လဝ်အရေဝ် နကဵုသၞောဝ်ဥပဒေဗ္တိုက်သရိုဟ်ပွပ္ကီုပရာပ် ၝောံပိုဒ် – ၅၂ (က)၊ ၅၀ (ည) ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၂၈)ရဂှ် ဂွံတီကေတ်ရ။
ညးဗြဴကောန်ဒေသ ကံၚ်ဇြဳပၞာန်ရပ်ကေတ်ဏာပံက်လဝ်ဂဗုတ် (၃) တၠတအ်ဂှ် နကဵုတၚ်စောတ်စောဲ ဟိုတ်နူဆက်စၠောံကဵု ဒပ်စဵုဒၞာညးဍုၚ်ကွာန် PDF ၊ ထံက်ပၚ်ကဵုလဝ်သြန်၊ ထံက်ပၚ်ကဵုလဝ်ဇွောံမစၞစတုဲ ပံက်လဝ်ဂဗုတ် ကေတ်လဝ်အရေဝ်ရ။
ပ္ဍဲကဵုဂိတုသေပ်တေမ်ဗာ သတ္တာဟဒုတိယ တုဲကၠုၚ်တေံလေဝ် ညးမဒှ်ကောန်ဒေသ ကွာန်ဥတ္တတာ ဒဝ်ဇျှောဇျှောဝေန်၊ ဒဝ်ခေန်သဳတာကျဝ် ကေုာံကိုဝ်ဖိုဝ်ချိုဝ်တအ် ညး (၃) တၠလေဝ် နူကဵုဒပ်ဗၠာဲသၟိၚ်ကံၚ်ဇြဳပၞာန် ပံက်လဝ်ဂဗုတ် ကေတ်လဝ်အရေဝ် နကဵုသၞောဝ်ဥပဒေဗတိုက်သရိုဟ်ပွပ္ကီုပရာပ်ရ။
ပၞောဝ်ကဵု ညးဒေသ ကောန်ကွာန်ဥတ္တတာ ဒပ်ကံၚ်ဇြဳပၞာန်ရပ်ဏာ (၁၄) တၠတအ်ဂှ် ၜိုန်ကလေၚ်ဗၠးတိတ်ကၠုၚ်လဝ် (၅) တၠကီုလေဝ် ဒးဒုၚ်ပံက်လဝ်ဂဗုတ် ကေတ်လဝ်အရေဝ် (၆) တၠတုဲ သှ်ေ (၃) တၠဂှ်မ္ဂး ဆက်စၟဳစၟတ်ဒၟံၚ်ရဂှ် ဂွံတီကေတ် နူညးစုက်လုက်ကဵု ဒပ်ဗၠာဲသၟိၚ်ကံၚ်ဇြဳပၞာန်ရ။
ပရိုၚ် – သြၚ်လောန်တိုၚ်(မ်)
ဗီု – CJ
sanlontai