ထဝါဲ၊ အံက်တဝ်ဗာ (၃)
ရးဒေသဇၞော်တၞၚ်သြဳ၊ ကောန်ထံၚ်ပရေၚ်ဍုၚ်ကွာန် ဒးဒုၚ်ရပ်ဖျေံလဝ်ထံၚ် ပ္ဍဲထံၚ်စာတ်ထဝါဲ (၁၄) တၠဂှ် ကလေၚ်ဗၠးတိတ်ကၠုၚ် ပ္ဍဲဂိတုအံက်တဝ်ဗာ စၟတ်တ္ၚဲ (၂)ရဂှ် ဂွံတီကေတ် နူဇာနှိက်ကောန်ထံၚ်ပရေၚ်ဍုၚ်ကွာန်ထဝါဲရ။
ပ္ဍဲကဵုညးကလေၚ်ဗၠးတိတ်ကၠုၚ်တအ်ဂှ် ပါဲနူကိုဝ်အောၚ်ဝေယာန် ဥက္ကဋ္ဌသမဂ္ဂကွးဘာတက္ကသိုလ်ထဝါဲတြေံတုဲ ပါလုပ်သီုကောန်ထံၚ်ပရေၚ်ဍုၚ်ကွာန် ကိုဝ်သုတတေန်သိုဝ်၊ ကိုဝ်အောၚ်ဒူရဇြဝ်၊ ကိုဝ်ယျေဝ်ထောန်၊ ကိုဝ်ဝေယာန်ထေတ်၊ ကိုဝ်ကျဝ်မေန်ဥူ၊ ကိုဝ်ဇြေန်မျေတ်ဥူ၊ ကိုဝ်ကိုဝ်လေန်နိုၚ်၊ ကိုဝ်ဝေန်လေတ်ထိုဲတအ် ပါလုပ် (၁၄) တၠရ။
ညးတအ်မၞိဟ် (၁၄) တၠဂှ် ဒှ်ညးဒးဒုၚ်ရပ်လဝ် ပ္ဍဲအရာပ်ဝေဝ်ကျောန်၊ ဍုၚ်ထဝါဲ ပ္ဍဲဂိတုမာတ်ချ် စၟတ်တ္ၚဲ (၁၈) သၞာံ ၂၀၂၁ တေံတုဲ ဗွဲမဂၠိုၚ်ဂှ် ဟိုတ်နူတ္ၚဲအယုက်ထံၚ်ပေၚ်တုဲ ကလေၚ်ဗၠးတိတ်ကၠုၚ်ရလဝ်ရ။
ကောန်ထံၚ်ပရေၚ်ဍုၚ်ကွာန်အယုက်ထံၚ်ပေၚ်တုဲ ကလေၚ်ဗၠးတိတ်ကၠုၚ်လဝ်တအ်ဂှ် မ္ၚးနူသၞောဝ်ဥပဒေရာဇသာတ်ဇၞော် ၝောံပိုဒ် ၅၀၅ (က)တုဲ ဒှ်ညးဒးဒုၚ်ဖျေံလဝ်ဒဏ်ထံၚ် နကဵုၝောံပိုဒ်လွဟ်လက်နက် ၁၉ (စ) ပွိုၚ် (၄) သၞာံညးသ္ကအ်ရ။
အတိုၚ်တၚ်လလောၚ်တြး ဇာနှိက်ကောန်ထံၚ်ပရေၚ်ဍုၚ်ကွာန်ထဝါဲ လလောၚ်တြးလဝ်မ္ဂး ပ္ဍဲမွဲကာလသီအဝဵု ပွိုၚ်ၜါသၞာံဘာ်ဏံ ပ္ဍဲကဵုထံၚ်စာတ်ထဝါဲ ကောန်ထံၚ်ပရေၚ်ဍုၚ်ကွာန် တြုံဗြဴ (၄၀၀) ပြၚ် ဒးဒုၚ်ရပ်ဖျေံလဝ်ထံၚ်ရဂှ် လလောၚ်တြးလဝ်ရ။
ပ္ဍဲရးဒေသဇၞော်တၞၚ်သြဳဂှ်မ္ဂး ပ္ဍဲမွဲကာလသီအဝဵုဏံ ဟိုတ်နူကံၚ်ဇြဳပၞာန် ထ္ၜးဟိုတ်စုတ်ဒုဟ်နာနာသာ်တုဲ ရပ်ကေတ်လဝ်ဂှ် ကောန်အရာပ်ညးဍုၚ်ကွာန် ဗ္ဒာဲ (၁၈၀၀) ပြၚ် ဒးဒုၚ်ရပ်လဝ်တုဲ ဗွဲမဂၠိုၚ်ဂှ် ဒးဒုၚ်ဖျေံလဝ်ဒုဟ်ဒဏ်ထံၚ် ညးသ္ကအ်အိုတ်ရဂှ် ဂကောံမၚ်မွဲရၚ်စံၚ် ကောန်ထံၚ်ပရေၚ်ဍုၚ်ကွာန် AAPP လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁) ဂှ်ရ။
ပရိုၚ် – သြၚ်လောန်တိုၚ်(မ်)
ဗီု – CJ
sanlontai