မတ်မလီုမပါလုပ် ပ္ဍဲပွိုၚ်ဍုၚ်အပံၚ် (၂၀) တံဂှ် စကံက်ကေတ်ဒၟံၚ် စရၚ်လၟိဟ်မၞိဟ်စမ်ၜတ်

မတ်မလီု၊ အံက်တဝ်ဗာ(၃)

ကံၚ်ဇြဳပၞာန်သီအဝဵုဂှ် နဒဒှ် စရၚ်လၟိဟ်မၞိဟ်အာဂတဂှ် မတ်မလီုမပါလုပ် ပ္ဍဲပွိုၚ်ဍုၚ်အပံၚ်(၂၀)ပွိုၚ်ဍုၚ် နူပ္ဍဲကၟိန်ဍုၚ်တံဂှ် ကၠောန်သ္ပမံၚ် ပွစမ်ၜတ်ကံက်ကေတ်စရၚ်လၟိဟ်မၞိဟ်တံရဂှ် လလောၚ်တြးကၠုၚ် နူကဵု လိက်ပရိုၚ်တြးဝါဒတံရ။

ကံၚ်ဇြဳပၞာန် သီကေတ်လဝ်အဝဵု နကဵုတၚ်ထ္ၜးဟိုတ်မမာဲဟွံဓဝ်ယာဂှ် ပ္ဍဲသၞာံ ၂၀၂၄ဏံ ညံၚ်သ္ဂောံကံက်ကေတ် စရၚ်လၟိဟ်မၞိဟ်ဗ္ၜတ်ကၟိန်ဍုၚ်မာန်ဂှ် သ္ပပ္တံနူ ဂိတုအံက်တဝ်ဗာ (၁) စဵုကဵုဂိတုအံက်တဝ်ဗာ(၁၅) သၞာံဏံဂှ် ကံက်ကေတ်မံၚ် စရၚ်လၟိဟ်မၞိဟ်စမ်ၜတ်ရ။

နဒဒှ် ပွကံက်ကေတ်စရၚ်လၟိဟ်မၞိဟ်စမ်ၜတ်ဂှ် ရုဲစှ်စၟတ်လဝ် ပွိုၚ်ဍုၚ်ရးဒေသကေုာံတွဵုရးတံ (၂၀)ပွိုၚ်ဍုၚ်တုဲ လၟိဟ်ဒၞါဲကံက်အပံၚ် ၁၀၀ ဂှ် သွက်ဂွံကံက်ကေတ်အာ အတိုၚ်အစဳအဇန် ကံက်ကေတ်ကဆံၚ်အလုံကၟိန်ဍုၚ်ဂှ် စဳဇန်လဝ်ရ။

ပ္ဍဲအရာကံက်ကေတ် စရၚ်လၟိဟ်မၞိဟ်စမ်ၜတ်ဂှ် တိုန်မွဲသ္ၚိစှ်ေမွဲသ္ၚိ သုၚ်စောဲ Mobile Tablet တံတုဲ နကဵုသၞောတ် CAPIဂှ် သွက်ဂကောံဂှ် တၚ်သၟာန် ၁၈၊ သွက်ဂကောံသ္ၚိကၟိန်တံဂှ် တၚ်သၟာန် ၆၈ ဂှ် သွက်ဂွံသၟာန်သၟုက်ကံက်ကေတ်အာဂှ် နွံမံၚ်ရ။

ညးချဳဒရာၚ်ကတိုၚ်ကၟိုဟ် ပရေၚ်ဒဳမိုကရေဇြဳ ကိုဝ်မေန်တွေတေတ်ဂှ် ပ္ဍဲအရာကံက်ကေတ် စရၚ်လၟိဟ်မၞိဟ်စမ်ၜတ် ကံၚ်ဇြဳပၞာန်ဂှ် ဒှ်ပွဒစးဒုၚ်ပလေဝ်ပလေတ် သွက်ပေါဲရုဲမာဲတုဲ ဟိုတ်နူမိက်သ္ဂောံဂွံ တၚ်နၚ်ပူဂိုလ်ပါလုပ် ပ္ဍဲပၠန်ဂတးတံ သောဲသောဲဗြောဲဗြောဲတံ ဒှ်မာန်ရဂှ် ဟီုကဵု သြၚ်လောန်တိုၚ်မ်ရ။

“ကံၚ်ဇြဳပၞာန်တံ ကံက်စရၚ်လၟိဟ်မၞိဟ်ဂှ် တၚ်ရန်တၟံ(၂)ဂကူ နွံမာန်ရ။ မိက်ဂွံကၠောန်ပေါဲရုဲမာဲတုဲ ကံက်စရၚ်လၟိဟ်မၞိဟ်လေဝ် ဒှ်မာန်တုဲ တၚ်ရန်တၟံလ္ပာ်လက္ကရဴဂှ် မိက်ဂွံတီစရၚ် ညးဆက်စပ်မံၚ်ကဵု ဂကောံဇြဟတ်ပၠန်ဂတး မၞုံမံၚ်ပ္ဍဲဍုၚ်ဗၟာတံ၊ ညးဂြိပ်ဒဴပါဲဓလေတ်မံၚ်တံ၊ တုဲပၠန် ဂကောံဇြဟတ်ပၠန်ဂတး ပါဲဓလေတ်မံၚ် လ္ပာ်ဍုၚ်သေံတံ ဟွံသေၚ်မ္ဂး ပ္ဍဲဒေသတိဍာ်ထိၚ်ဒက်ကောန်ဍုန်အရၚ် ဒၞါဲပရေၚ်အုပ်ဓုပ်ဍေံတံ က္ဍတဲဟွံစိုပ်တံ၊ စရၚ်ကောန်သ္ဂံၚ်လုပ်မံၚ်ပေါဲဗ္တိုက်တံ ချိုတ်တ်ပၠိုတ်တ်တုဲ ကၠောန်လဝ်လေဝ်ဒှ်မာန်ရ။ ဣဏံဂှ် တၚ်ရန်တၟံ လ္ပာ်လက္ကရဴ၊ နကဵုဍေံတံဂှ် ဗာ်မွဲလတုန် ပိုတ်ၜါသ္ကုတ် ကၠောန်ကမၠောန်ဏံရဂှ် စၟတ်လဝ်ရ” သာ်ဝွံ သ္ဂးရ။

ပွိုၚ်ဍုၚ်ကံၚ်ဇြဳပၞာန်ရုဲစှ်လဝ် သွက်ဂွံကံက်စရၚ်လၟိဟ်မၞိဟ်စမ်ၜတ်တံဂှ် တိဍာ်ညိၚ်ဝတ်မံၚ် ပ္ဍဲကာလသီအဝဵုဏံ ဗွဲမဂၠိုၚ်ပါလုပ်မံၚ် မဒှ်ရ။

ညးမၞုံအခေါၚ်ဟီုဂး ဖိုရာမ်ရးသက်ကိုၚ် ကိုဝ်လွေန်တူဂှ်လေဝ် ပေါဲရုဲမာဲဂှ် ဟိုတ်နူဒှ်မံၚ်ပၞော်တိတ်ကံၚ်ဇြဳပၞာန်တုဲ တုဲတဴကဵုအကာဲအရာ ကံက်ကေတ်စရၚ်လၟိဟ်မၞိဟ်တံဂွံဂှ်တုဲ ကၠောန်သ္ပအာ ပေါဲရုဲမာဲမာန်ရဂှ် သ္ၚဳဂၠိပ်လတ်ရ။

” ပ္ဍဲအရာကံက်ကေတ်စရၚ်လၟိဟ်မၞိဟ်ဂှ် ဍေံဂှ် လ္ဂောံကဵုဥပဒေသ္ဇိုၚ်ဒက်ပ္တန် (၂၀၀၈)ဏံဂှ် ကၠောန်သ္ပအာပေါဲရုဲမာဲဂှ်ရ မိက်ဂွံသ္ဂးဂှ် လၟိဟ်မၞိဟ်အခေါၚ်ကဵုမာဲနွံ နူပ္ဍဲဒေသဍေံတံကံက်ကေတ်ဂွံဂှ် ကံက်ကေတ်တုဲမှ ဒေသဍေံကံက်ကေတ်ဟွံဂွံတံဂှ် ကံက်ကေတ်အာဟွံသေၚ်ဂှ်ရ အတိုၚ်စရၚ်ဂှ်တှ်ေ ပ္ဍဲဍုၚ်ဏံဂှ်တှ်ေ ညးမၞုံအခေါၚ်ကဵုမာဲဂှ် နွံဂလိုၚ်ဏံရ။ ဒၞါဲသှ်ေမံၚ်တံဂှ်တှ်ေ ကံက်ကေတ်ဗီုလၟုဟ်ဟွံမာန်ဂှ်ရ ဟွံကံက်မွဲသာ် ကၠောန်ပေါဲရုဲမာဲကဵုဣဏံရတုဲ ကဵုဣဏံရ ဂၠါဲပၞော်တိတ်ပရေၚ်ဍုၚ်ကွာန်မာန်ရဂှ် ပိုဲတံဂှ် သ္ၚဳဂၠိပ်လဝ်ရ” သာ်ဝွံ သ္ဂးရ။

က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ်တှ်ေ ပ္ဍဲသၞာံ ၂၀၂၄ဏံ ကံက်ကေတ်စရၚ်လၟိဟ်မၞိဟ် ဗ္ၜတ်အလုံကၟိန်ဍုၚ်မွဲတုဲမ္ဂး ပ္ဍဲသၞာံ ၂၀၂၅ဂှ် ကၠောန်ဗဒှ်အာ ပေါဲရုဲမာဲရောၚ်ဂှ် ကဵုလဝ်ဒမြိပ်အရေဝ် မဒှ်ရ။

လ္ဂောံကဵု စရၚ်သ္ပသ္ဇိုၚ် စရၚ်လၟိဟ်မၞိဟ်ကေုာံ ပရူပရာသ္ၚိ သၞာံ ၂၀၁၄ဂှ်မ္ဂး ပ္ဍဲဍုၚ်ဗၟာဂှ် လၟိဟ်မၞိဟ်ချိၚ်ခယျ ၅၆ ဒဿမ ၂ ပြကောဋိကိုတ် နွံမံၚ်ရဂှ် ဌာနဝန်ဇၞော် ဇြဟတ်ညးဍုၚ်ကွာန်ကေုာံ ပရေၚ်ကောပ်ကာဲပရေၚ်မၞိဟ်လုပ်တံ လလောၚ်တြးလဝ် ပ္ဍဲဂိတုအံက်တဝ်ဗာ စၟတ်တ္ၚဲ (၁)ဂှ်ရ။

အလုံမွဲကၟိန်ဍုၚ်ဂှ်တှ်ေ မ္ၚးနူပေါဲဗ္တိုက်က္တဵုဒှ်ကၠုၚ် ကြဴနူဒပ်ပၞာန်သီအဝဵုတံဂှ် ဟိုတ်နူပဋိပက္ခရပ်လွဟ်တံတုဲ လၟိဟ်မၞိဟ် ၁ဒဿမ ၆ ပြကောဋိကိုတ်ဂှ် ဒးထောံလသာဌာန်ဒၟံၚ်တုဲ ဒးဂြိပ်ဒဴပါဲဒလေတ်မံၚ်ရဂှ် ဂွံတီကေတ် အတိုၚ်တၚ်လလောၚ်တြး ရုၚ်သ္ကိုပ်ပံၚ်ဗ္စပ်ပ္ညဳပ္ညပ် ပရေၚ်ဗ္စာရဏာမၞိဟ် ကုလသမဂ္ဂ UNOCHA ရ။

ပရိုၚ်-သြၚ်လောန်တိုၚ်မ်

ဗီု-MOI/ MRTV