ပ္ဍဲပေါဲဗ္တိုက်ပွိုၚ်မွဲဂိတု ခရိုၚ်ဘာပန် KNU ဂှ် လ္ပာ်ကံၚ်ဇြဳပၞာန် ချိုတ်အာလဝ် ဗ္ဒါဲ ၄၀ တၠ

ဘာပန်၊ အံက်တဝ်ဗာ (၄)

ပ္ဍဲတိဍာ်အုပ်ဓုပ် ခရိုၚ်ဘာပန် ဗော်သွးကောန်ဂကူကရေၚ် KNU ဂှ် အပ္ဍဲဂိတုသေပ်တေမ်ဗာတုဲကၠုၚ်တေံ ပေါဲဗ္တိုက်ၜါလ္ပာ် က္တဵုဒှ်လဝ် ၈၄ ဝါတုဲ လ္ပာ်ကံၚ်ဇြဳပၞာန် ချိုတ်အာလဝ် ဗ္ဒါဲ ၄၀ ရောၚ် ဂွံတီကေတ် အတိုၚ်တၚ်လလောၚ်တြး ဒပ်မဟာ (၅) KNU ရ။

အပ္ဍဲဂိတုသေပ်တေမ်ဗာတုဲကၠုၚ်တေံ ပ္ဍဲကဵုပေါဲဗ္တိုက် မက္တဵုဒှ်လဝ် အကြာဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ် BGF၊ ကံၚ်ဇြဳပၞာန်တံဂှ် လ္ပာ်ဒပ်ပၞာန် ၃၉ တၠ ချိုတ်လဝ်တုဲ ညးမၞုံကဆံၚ်ဗိုလ်ဇၞော် ၂ တၠ ပါလုပ်ဂှ် ၄၆ တၠ ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ၅ တၠ ပြဟ်လလုဲအာလဝ်တုဲ ၁၃ တၠ ကလိဂွံလဝ်ဝပ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။

ပ္ဍဲကဵုဂိတုဂှ်ဂှ် ဒပ်ကံၚ်ဇြဳပၞာန် ပန်ပှော်လဝ် မကမ်လွဟ်ဇၞော် ၂၀ မတုဲ ဟိုတ်နူပရေၚ်ပန်ပှော်လွဟ်ဇၞော်ဂှ်တုဲ မိဇၞော်ဗျု နူကဵုကွာန်တွာခိုဝ်လဝ် မွဲတၠ ဒးမကမ်လွဟ်ဇၞော် ချိုတ်အာလဝ်တုဲ ဒပ်ကံၚ်ဇြဳပၞာန် ပန်ဂစိုတ်ဏာလဝ် သီုကဵုညးဒေသဘာပန်မွဲတၠရောၚ်ဂှ်လေဝ် KNU သ္ဂးရ။

သ္အာၚ်နူဂှ်ပၠန် အပ္ဍဲဂိတုသေပ်တေမ်ဗာ ၁၅ တုဲကၠုၚ်တေံ ကံၚ်ဇြဳပၞာန် ကၠုၚ်စိုပ်ပန်ပှော်လဝ် နကဵုက္ၜၚ်ကျာပၞာန် (၁၀) ဝါ အပ္ဍဲကွာန်ထဳကဝ်ထာ ပွိုၚ်ဍုၚ်ဒွါလိုဝ်ဂှ်ကဵု ဒေသဂါယူ၊ တာခေဝ်ဒါ၊ ဒဝ်ဗိုဝ်နဝ်၊ တေတူခဳ၊ ကဝ်ရိုဝ်ဗဝ်ထာ ပွိုၚ်ဍုၚ်လူတဝ် ခရိုၚ်ဘာပန် KNU တံဂှ်တုဲ ပ္ဍဲကဵုပရေၚ်ပန်ပှော်ဂှ် ကၠောန်သ္ပပန်ပှော်လဝ် နကဵုသေနာတ်စက် ကေုာံ ဗုမ်ကလက်သတာ ၂၃ မ တံရောၚ်ဂှ် လလောၚ်ပ္တိတ်လဝ်ရ။

ဟိုတ်နူပရေၚ်ဗ္တိုက်တရဴကျာ ကံၚ်ဇြဳပၞာန်တံတုဲ ကွးဘာ (၃) တၠ သၟဝ်အာယုက် ၁၅ သၞာံ နူကဵုဘာတန်လ္ဒေါဝ်ထဳကဝ်ဂှ်ကဵု ကမ္မတဳဘာမွဲတၠ ချိုတ်အာလဝ်တုဲ ကွးဘာ၊ အ္စာ၊ အ္စာၝောံ ကေုာံ ကောန်ကွာန်တံ အပံၚ်သီုဖအိုတ် (၈) တၠ ကလိဂွံလဝ်ဝပ်တုဲ စမြိုၚ်ပရေၚ်ဘာသာ (၂) မ၊ ဘာဗ္တောန်လိက် (၁) မ၊ သ္ၚိမၞိဟ်ဒၟံၚ် ၁၂ မ ဇီုကပိုက်လီုလာ်လဝ်တုဲ တိရစ္ဆာန်သ္ၚိ ၅ လေဝ် ချိုတ်အာလဝ်ကီုရ။

ဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ်တံဂှ်တုဲ ဟိုတ်နူသၠုၚ်ပ္တိုန်အသိၚ် ကၠောန်ကၠုၚ်ပရေၚ်ဗ္တိုက်လွဟ်ဇၞော် နကဵုတရဴကျာတံဂှ်ရ လၟိဟ်ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် ပ္ဍဲကဵုတိဍာ်ဒပ်မဟာ (၅) ခရိုၚ်ဘာပန် KNU ဂှ် ဗ္ဒါဲ (၉၀၀၀၀) နွံဒၟံၚ်ရောၚ် ဂွံတီကေတ် အတိုၚ်လိက်စံၚ် ဇာဇၞိက်ပရေၚ်ၜိုဟ်လလမ်ကရေၚ် KPSN မလလောၚ်ပ္တိတ်လဝ်ဂှ်ရ။

ပရိုၚ်−သြၚ်လောန်တိုၚ်(မ်)

ဗီု− KNU