ပံၚ်၊ အံက်တဝ်ဗာ (၄)
မၞိဟ်တြုံနူကဵုဒေသ ဒၟံၚ်ကွာန် ( ဥတ္တံတား) ပွိုၚ်ဍုၚ်ပံၚ်၊ တွဵုရးဍုၚ်မန် ဒပ်ကံၚ်ဇြဳပၞာန်တံ မရပ်ဒက်ဏာ (၄) တၠဂှ် ထပ်ပံက်လဝ်ဂဗုတ် နကဵုၝောံပိုဒ်သၞောဝ်ဗ္တိုက်ပလီု ပွပကီုပရာပ်တံရောၚ်ဂှ် ဂၠိုက်ဂၠါဲဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
တုဲကၠုၚ် ပ္ဍဲဂိတုသေပ်တေမ်ဗာ (၃) တေံ ကြဴနူဗၠာဲသၟိၚ်ထိၚ်ရး ယျေဝ်ကိုဝ်ဝ်လွေန် နူကဵုဗ္ဒိုပ်ဗၠာဲသၟိၚ်ဍုၚ်ပံၚ် ဒးဒုၚ်ပန်ဂစိုတ်ကဵု သေနာတ်တုဲဂှ် ဒပ်ကံၚ်ဇြဳပၞာန်ဝွံ ကြဴနူထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲကွာန် ( ဥတ္တံတား) ဂှ်တုဲ ရပ်ဒက်ဏာလဝ် ညးဒေသ ဟွံအောန်နူကဵု ၂၀ ရ။
ပ္ဍဲကဵုဏံ ညးဒေသဂမၠိုၚ် ကိုဝ်ချေတ်တူပိုၚ်၊ ကိုဝ်မေန်ထောန်မျေတ်ကျဝ်၊ ကိုဝ်သဝ်ရာဇာမေန်၊ ကိုဝ်အံၚ်မေန်ထိုဲတံ (၄) တၠ ဂှ် ပ္ဍဲဂိတုအံက်တဝ်ဗာ (၂) တေံ ထပ်ပံက်လဝ်အမှု နကဵုၝောံပိုဒ်ဗ္တိုက်သ္အးပကီုပရာပ် ၅၀ (ည) သၟးဟွံက သီုကဵု ၅၂ (က) တံရ။
ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုသေပ်တေမ်ဗာ (၂၈) ဂှ်လေဝ် ဒဝ်ခေန်တာန်နု၊ ဒဝ်ဇြေန်မာထောန်၊ ဒဝ်စန္ဒာလေန် ညးဒေသ ကွာန်( ဥတ္တံတား) (၃) တၠ မရပ်ဒက်လဝ်ဂှ် ထပ်ပံက်လဝ်ဂဗုတ် နကဵုၝောံပိုဒ်သၞောဝ်ဗ္တိုက်သ္အးပကီုပရာပ်တံရ။
သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ (၂၀) တေံဂှ်လေဝ် ဒဝ်ချဵုဝေန်၊ ဒဝ်ခေန်သဳတာ၊ ကိုဝ်ဖိုဝ်ချိုဝ်တံ (၃) တၠ ဒၟံၚ်ကွာန် ( ဥတ္တံတား) မဒးဒုၚ်ရပ်လဝ်ဂှ် ပံက်လဝ်ဂဗုတ် နကဵုသၞောဝ်ဗ္တိုက်သ္အးပကီုပရာပ်တံရ။
ညးဒေသ (၁၀) တၠဝွံ လ္ဂောံကဵုသၞောဝ်ပကီုပရာပ် ကံၚ်ဇြဳပၞာန်တံ မပံက်လဝ်ဂဗုတ်ဂှ်မ္ဂး ယဝ်ရဒုဟ်ဒဏ်ပြာကတ်မ္ဂး ဒးဒုၚ်ဖျေံစၟတ်အာ ဒဏ်ထံၚ်မွဲအာယုက်မာန်ရ။
အပ္ဍဲကာလသီအဝဵုဏံ ပ္ဍဲကဵုတွဵုရးဍုၚ်မန်ဂှ် ညးဍုၚ်ကွာန်ကောန်အရာပ် (၈၀၀) ပြၚ် ဒးဒုၚ်ရပ်ဒက်လဝ်တုဲ ဗွဲမဂၠိုၚ်ဝွံ ဒးဒုၚ်ဖျေံစၟတ်လဝ် ဒဏ်ထံၚ်၊ ဒုဟ်ဒဏ်နာနာသာ်ဂှ် ဂွံတီကေတ် အတိုၚ်တၚ်လလောၚ်တြး ဂကောံမၚ်မွဲရံၚ်စံၚ်ကောန်ထံၚ်ပရေၚ်ဍုၚ်ကွာန် (AAPP) ရ။
ပရိုၚ်−သြၚ်လောန်တိုၚ်(မ်)
ဗီု− CJ
sanlontai